ବର୍ମିଂହାମ୍, ୨୭।୭: ରାଜ୍ୟଗୋଷ୍ଠୀ କ୍ରୀଡ଼ା ୨୦୨୨ ଆଜିଠାରୁ ଇଂଲଣ୍ଡର ବର୍ମିଂହାମ ଠାରେ ଆରମ୍ଭ ହେବ। ଏଥିପାଇଁ ଭାରତୀୟ ଖେଳାଳିମାନେ ସମ୍ପୂର୍ଣ୍ଣ ପ୍ରସ୍ତୁତି ସହ ଇଂଲଣ୍ଡରେ ପହଞ୍ଚିଛନ୍ତି। ଭାରତ ୧୮ ଥରପାଇଁ ରାଜ୍ୟଗୋଷ୍ଠୀ କ୍ରୀଡ଼ାରେ ଭାଗ ନେବାକୁ ଯାଉଛି। ବର୍ମିଂହାମ କ୍ରୀଡ଼ାରେ ଭାରତର ମୋଟ ୨୧୫ ଆଥଲେଟ୍ ଅଂଶଗ୍ରହଣ କରିବେ। ସେମାନଙ୍କ ମଧ୍ୟରେ ୧୦୪ ମହିଳା ଓ ୧୧୧ ପୁରୁଷ ଆଥଲେଟ୍ ସାମିଲ। ଭାରତୀୟ ପ୍ରତିଯୋଗୀମାନେ ମୋଟ ୧୬ଟି କ୍ରୀଡ଼ାରେ ଅଂଶଗ୍ରହଣ କରିବେ। ରାଜ୍ୟଗୋଷ୍ଠୀ କ୍ରୀଡ଼ା ପୂର୍ବରୁ ଭାରତୀୟ ଦଳକୁ ବଡ଼ ଝଟ୍କା ଲାଗିଛି। ଭାରତ ପାଇଁ ସବୁଠାରୁ ବଡ ଆଶା, ନୀରଜ ଚୋପ୍ରା ଆହତ କାରଣରୁ ଏହି ଟୁର୍ନାମେଣ୍ଟରୁ ବାଦ ପଡିଛନ୍ତି। ନୀରଜ ବାଦ୍ ପଡିବା ପରେ ଦୁଇଥର ଅଲିମ୍ପିକ ପଦକ ବିଜେତା ବ୍ୟାଡମିଣ୍ଟନ ଖେଳାଳି ପି.ଭି ସିନ୍ଧୁ ରାଜ୍ୟଗୋଷ୍ଠୀ କ୍ରୀଡ଼ାର ଉଦଘାଟନୀ ସମାରୋହରେ ଭାରତୀୟ ପତାକା ବାହକ ଭାବେ ରହିବେ।
ସ୍ଥାନୀୟ ସମୟ ରାତି ୭ଟା ଏବଂ ଭାରତୀୟ ସମୟ ରାତି ୧୧ଟା ୩୦ରେ ପ୍ରତିଯୋଗିତାର ଉଦ୍ଘାଟନୀ ସମାରୋହ ଅନୁଷ୍ଠିତ ହେବ। ରାଜ୍ୟଗୋଷ୍ଠୀ କ୍ରୀଡା ୨୦୨୨ର ପ୍ରସାରଣ ଅଧିକାର ସୋନି ନେଟୱାର୍କ ନିକଟରେ ଅଛି। ତେଣୁ ସୋନି ନେଟୱାର୍କର ଚ୍ୟାନେଲରେ ସିଧା ପ୍ରସାରଣ ହେବ। ଏହା ବ୍ୟତୀତ ପ୍ରଶଂସକମାନେ ସୋନି ଲାଇଭ ଆପରେ ଲାଇଭ ପ୍ରସାରଣ ଦେଖିପାରିବେ।
