ନୂଆଦିଲ୍ଲୀ,୨୮।୭ : ବିରୋଧୀ ଦଳମାନେ ସଂସଦ ପରିସରରେ ପ୍ରାୟ ୫୦ ଘଣ୍ଟା ଧରି ଧାରଣାରେ ବସିଥିବା ସେମାନଙ୍କର ଖାଦ୍ୟ ଇତ୍ୟାଦିର ବ୍ୟବସ୍ଥା ପାଇଁ ସ୍ବତନ୍ତ୍ର ବ୍ୟବସ୍ଥା କରାଯାଇଛି। ସେମାନଙ୍କ ପାଇଁ ଦହିଭାତ ଠାରୁ ଆରମ୍ଭ କରି ଇଡଲି-ସମ୍ବର୍, ଗାଜର କା ହାଲୱା, ଫଳ ଆଦିର ବ୍ୟବସ୍ଥା କରାଯାଇଛି। ଏକତା ତଥା ରାଜନୈତିକ ଶକ୍ତି ପ୍ରଦର୍ଶନ ପାଇଁ ବିରୋଧୀ ଦଳ ଏକଜୁଟ ହୋଇଛନ୍ତି। ରାଜ୍ୟ ସଭାର ୨୦ ନିଲମ୍ବିତ ସଦସ୍ୟ ସଂସଦ ପରିସରରେ ନିଜର ବିରୋଧ ପ୍ରଦର୍ଶନ ବୁଧବାରଠାରୁ ଆରମ୍ଭ କରିଛନ୍ତି। ନିଲମ୍ବିତ ଏମ୍ପିମାନଙ୍କ ମଧ୍ୟରୁ ତୃଣମୂଳ କଂଗ୍ରେସର ଡୋଲା ସେନ କହିଛନ୍ତି ଯେ ଏମ୍ପିମାନେ ଗାନ୍ଧୀ ପ୍ରତିମୂର୍ତ୍ତି ସମ୍ମୁଖରେ ବସିଛନ୍ତି।
ରାତିରେ ମଶା କାମୁଡ଼ାରୁ ସୁରକ୍ଷା ପାଇଁ ବ୍ୟବସ୍ଥା କରାଯାଇଥିଲା। ବୁଧବାର ଡିଏମକେ ଏମ୍ପି ତିରୁଚି ଶିବା ଧାରଣା ନେଇଥିବା ଏମ୍ପିମାନଙ୍କ ପାଇଁ ଇଡଲି-ସମ୍ବର ଜଳଖିଆ ପାଇଁ ବ୍ୟବସ୍ଥା କରିଥିଲେ। ଏଥି ସହିତ, ଡିଏମକେ ମଧ୍ୟାହ୍ନ ଭୋଜନ ପାଇଁ ଦହିଭାତର ବ୍ୟବସ୍ଥା କରିଥିବାବେଳେ ତୃଣମୂଳ କଂଗ୍ରେସ ପକ୍ଷରୁ ରୁଟି, ଡାଲ, ପନିର ଏବଂ ଚିକେନ ତନ୍ଦୁରି ରାତ୍ରୀ ଭୋଜନ ପାଇଁ ବ୍ୟବସ୍ଥା କରାଯାଇଥିଲା। ଏହି ବ୍ୟବସ୍ଥାର ତଦାରଖ କରୁଥିବା ଡିଏମକେର କାନିମୋଝି ଗାଜର ହାଲୱା ସହିତ ବିରୋଧ ସ୍ଥଳରେ ପହଞ୍ଚିଥିଲେ।
ଏଥି ସହିତ ତୃଣମୂଳ କଂଗ୍ରେସ ପକ୍ଷରୁ ଫଳ ଏବଂ ସାଣ୍ଡୱିଚ ବ୍ୟବସ୍ଥା କରାଯାଇଥିଲା। ସୂତ୍ରରୁ ପ୍ରକାଶ ଯେ ଗୁରୁବାର ଡିଏମକେ ଜଳଖିଆ ପାଇଁ ବ୍ୟବସ୍ଥା କରିବ ଏବଂ ଟିଆରଏସ ମଧ୍ୟାହ୍ନ ଭୋଜନ ଏବଂ ରାତ୍ରୀ ଭୋଜନ ପାଇଁ ଏଏପି ଦାୟିତ୍ୱ ନେଇଛି। ବିରୋଧ ସ୍ଥଳରେ ସାଂସଦମାନଙ୍କ ପାଇଁ ତମ୍ବୁ ଲଗାଇବା ଲାଗି ଯୋଜନା ଥିଲେ ମଧ୍ୟ ଏହାକୁ ପ୍ରଶାସନ ମନା କରିଦେଇଛି। ଏଭଳି ପରିସ୍ଥିତିରେ ନେତାମାନଙ୍କୁ ଖୋଲା ଆକାଶ ତଳେ ଶୋଇବାକୁ ପଡ଼ିଛି। ତେବେ ବିରୋଧୀ ଏମ୍ପିମାନେ ସଂସଦ ଗୃହର ଲାଇବ୍ରେରୀର ଶୌଚାଳୟକୁ ବ୍ୟବହାର କରୁଛନ୍ତି। ସୁରକ୍ଷା ଦଳ ଏବଂ ପରିମଳ କର୍ମଚାରୀମାନେ ସମ୍ପୂର୍ଣ୍ଣ ସହଯୋଗ କରିଛନ୍ତି।
