ଭୁବନେଶ୍ୱର,୧୭ା୯: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଜନ୍ମଦିନ ଅବସରରେ ଓଡ଼ିଶାର ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ତାଙ୍କୁ ଶତ ଶତ ଶୁଭେଚ୍ଛା ଓ ଶୁଭକାମନା ଜଣାଇଛନ୍ତି। ସୋସିଆଲ ମିଡିଆ ‘ଏକ୍ସ’ (X) ରେ ଏକ ଭାବପୂର୍ଣ୍ଣ ବାର୍ତ୍ତା ଦେଇ ମୁଖ୍ୟମନ୍ତ୍ରୀ କହିଛନ୍ତି ଯେ, ଜଣେ ସେବକର ନିଷ୍ଠା ଯେତେବେଳେ ନାୟକର ସଂକଳ୍ପରେ ରୂପାନ୍ତରିତ ହୁଏ, ସେତେବେଳେ ‘ନରେନ୍ଦ୍ର’ଙ୍କ ନେତୃତ୍ୱରେ ନବଭାରତର ନିର୍ମାଣ ହୋଇଥାଏ।
ପ୍ରଧାନମନ୍ତ୍ରୀଙ୍କ ଦୂରଦର୍ଶୀ ନେତୃତ୍ୱ ଓ ଦେଶ ପ୍ରତି ତାଙ୍କର ସମର୍ପଣ ଭାବକୁ ପ୍ରଶଂସା କରି ମୁଖ୍ୟମନ୍ତ୍ରୀ ଲେଖିଛନ୍ତି ଯେ, ମା’ ଭାରତୀଙ୍କ ସେବାରେ ପ୍ରଧାନମନ୍ତ୍ରୀଙ୍କ ଜୀବନର ପ୍ରତ୍ୟେକ ମୁହୂର୍ତ୍ତ ଏକ ସମର୍ପିତ ସମିଧ। ତାଙ୍କର ସଂକଳ୍ପବଦ୍ଧ ନେତୃତ୍ୱ ହେତୁ ଗରିବୀ ଓ ଅସମାନତାର ଅନ୍ଧକାର ଦୂର ହୋଇ ‘ସବକା ସାଥ୍, ସବକା ବିକାଶ, ସବକା ବିଶ୍ୱାସ ଓ ସବକା ପ୍ରୟାସ’ର ମନ୍ତ୍ର ଆଜି ବିକାଶର ମହାମନ୍ତ୍ର ପାଲଟିଛି। ଡିଜିଟାଲ୍ରୁ ଭବିଷ୍ୟତ ଓ ଗ୍ରାମାଞ୍ଚଳରୁ ମହାକାଶ ପର୍ଯ୍ୟନ୍ତ ପ୍ରଧାନମନ୍ତ୍ରୀଙ୍କ ଦୂରଦୃଷ୍ଟି ଦେଶବାସୀଙ୍କୁ କେବଳ ସ୍ୱପ୍ନ ଦେଖାଇନାହିଁ, ବରଂ ସେହି ସ୍ୱପ୍ନକୁ ସାକାର କରିବାର ସାହସ ଓ ଶକ୍ତି ଦେଇଛି।
ଶେଷରେ ମୁଖ୍ୟମନ୍ତ୍ରୀ ମହାପ୍ରଭୁ ଶ୍ରୀଜଗନ୍ନାଥଙ୍କ ନିକଟରେ ପ୍ରଧାନମନ୍ତ୍ରୀଙ୍କ ଦୀର୍ଘାୟୁ, ନିରାମୟ ସ୍ୱାସ୍ଥ୍ୟ ଓ ପ୍ରଶସ୍ତ ଆତ୍ମବଳ ପାଇଁ ପ୍ରାର୍ଥନା କରିବା ସହ ତାଙ୍କ କର୍ମଯୋଗରେ ବିକଶିତ ଭାରତର ସଂକଳ୍ପ ସାକାର ହେଉ ବୋଲି ଆଶାପ୍ରକାଶ କରିଛନ୍ତି।
