ଡେରାବିଶ,୩।୧୧(ବେବର୍ତ୍ତା ଅଜୟ ଦାସ): କେନ୍ଦ୍ରାପଡ଼ା ଜିଲା ଡେରାବିଶ ବ୍ଲକର କ୍ୟାସିୟର ଶଶିକାନ୍ତ ରଣାଙ୍କ ଦ୍ୱାରା ୧ କୋଟି ୬ ଲକ୍ଷ ୩ ହଜାର ୫୯୫ ଟଙ୍କାର ବିଶାଳ ସରକାରୀ ଅର୍ଥ ହଡ଼ପ ଘଟଣା ଦିନକୁ ଦିନ ଅଧିକ ଜଟିଳ ହେବାରେ ଲାଗିଛି। ଏହି ଘଟଣାର ପର୍ଦ୍ଦାଫାଶ ହେବା ପରେ କେନ୍ଦ୍ରାପଡ଼ା ଜିଲାପାଳ ଆର୍. ରଘୁରାମ ଆୟାରଙ୍କ ନିର୍ଦ୍ଦେଶକ୍ରମେ ଡେରାବିଶ ବ୍ଲକ ଫାଇନାନ୍ସ ଅଫିସର ପଞ୍ଚାନନ କାଣ୍ଡି ଓ ମାର୍ଶାଘାଇ ବ୍ଲକ ଫାଇନାନ୍ସ ଅଫିସର ବିଷ୍ଣୁଚରଣ ମହାନ୍ତି ତଦନ୍ତ ଚଳାଇଛନ୍ତି। ଅନ୍ୟପଟେ କେନ୍ଦ୍ରାପଡ଼ା ଭିଜିଲାନ୍ସ ବିଭାଗ ପକ୍ଷରୁ ତଦନ୍ତ ଜାରି ରହିଥିବା ବେଳେ ରାଜ୍ୟ ସରକାରଙ୍କ ନିର୍ଦ୍ଦେଶରେ ଏବେ ସ୍ପେଶାଲ ଅଡିଟ୍ ପ୍ରକ୍ରିୟା ଆରମ୍ଭ ହୋଇଛି।
ମଙ୍ଗଳବାର ଅଡିଟର ବାସୁଦେବ ପ୍ରସାଦ ମିଶ୍ର ଓ ଭି. ବିକ୍ରମ ସିଂହ ଡେରାବିଶ ବ୍ଲକ କାର୍ଯ୍ୟାଳୟରେ ପହଞ୍ଚି ଅଡିଟ୍ କାର୍ଯ୍ୟ ଆରମ୍ଭ କରିଛନ୍ତି। ଏହି ଦୁଇଜଣିଆ ଟିମ୍ ଜିଲା ଟ୍ରେଜେରୀ କାର୍ଯ୍ୟାଳୟକୁ ଯାଇ ହଡ଼ପ ଅର୍ଥ ସମ୍ପର୍କିତ ସମସ୍ତ ଗୁରୁତ୍ୱପୂର୍ଣ୍ଣ ତଥ୍ୟ ସଂଗ୍ରହ କରିଛନ୍ତି। ତେବେ ତଦନ୍ତରୁ କି ତଥ୍ୟ ହାସଲ ହୋଇଛି, ସେ ସମ୍ପର୍କରେ ଅଧିକାରୀଦ୍ୱୟ କୌଣସି ସୂଚନା ଦେବାକୁ ମନା କରିଛନ୍ତି।
ଘଟଣାର ମୁଖ୍ୟ ଅଭିଯୁକ୍ତ କ୍ୟାସିୟର ଶଶିକାନ୍ତ ଗତ ୨୮ ତାରିଖରୁ ଛୁଟିରେ ଥିବାରୁ ସମ୍ପୂର୍ଣ୍ଣ ତଦନ୍ତ ପ୍ରକ୍ରିୟାର ସ୍ୱଚ୍ଛତାକୁ ନେଇ ପ୍ରଶ୍ନ ଉଠାଇଛନ୍ତି ବରିଷ୍ଠ ଆଇନଜୀବୀ ବିଦୁଭୂଷଣ ମହାପାତ୍ର। ମହାପାତ୍ରଙ୍କ କହିବା ଅନୁଯାୟୀ, ଗତ ମାସ ୨୩ ତାରିଖରେ ଜିଲା ଟ୍ରେଜେରୀ ଅଫିସର ସଚ୍ଚିଦାନନ୍ଦ ବେହେରା ଜିଲାପାଳଙ୍କୁ ଚିଠି ଲେଖିବା ସହ ବିଡିଓ ନମିତା ବାରିକଙ୍କୁ ଏହି ହଡ଼ପ ଅର୍ଥ ଭରଣା (ରିକଭରୀ) ପାଇଁ ନିର୍ଦ୍ଦେଶ ଦେଇଥିଲେ। ହେଲେ ଏତେ ବଡ଼ ଘଟଣା ସାମ୍ନାକୁ ଆସିବା ପରେ ବି ବିଡିଓ ବାରିକ ଅଭିଯୁକ୍ତ କ୍ୟାସିୟରଙ୍କୁ କିପରି ୧୫ ଦିନିଆ ଛୁଟି ମଞ୍ଜୁର କଲେ, ସେ ନେଇ ବିଡିଓଙ୍କୁ ମଧ୍ୟ ତଦନ୍ତ ପରିସରଭୁକ୍ତ କରିବାକୁ ସେ ଦାବି କରିଛନ୍ତି। ଏହାସହ ସମସ୍ତ ଘଟଣା ଜାଣିବା ପରେ ମଧ୍ୟ ଜିଲାପାଳ ଅଭିଯୁକ୍ତଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ ନକରିବା ଚକିତ କରିଛି। ରାଜ୍ୟ ସରକାରଙ୍କ ‘ଜିରୋ ଟଲେରାନ୍ସ’ ନୀତି ଏଠାରେ କେତେ କାର୍ଯ୍ୟକାରୀ ହେଉଛି ତାହା ସମସ୍ତେ ଅପେକ୍ଷା କରିଛନ୍ତି ବୋଲି ସେ ପ୍ରକାଶ କରିଛନ୍ତି।
ମିଳିଥିବା ସୂଚନା ଅନୁଯାୟୀ, ଇଣ୍ଟିଗ୍ରେଟେଡ୍ ଫାଇନାନ୍ସିଆଲ୍ ମ୍ୟାନେଜମେଣ୍ଟ ସିଷ୍ଟମ୍ (IFMS) ପୋର୍ଟାଲର ଅପବ୍ୟବହାର କରି ଏହି ଅର୍ଥ ଆତ୍ମସାତ୍ କରାଯାଇଛି। ସରକାରୀ କର୍ମଚାରୀଙ୍କ ଭତ୍ତା ଓ ପ୍ରୋଭିଜନାଲ ଗ୍ରାଚ୍ୟୁଇଟି ବାବଦ ଅର୍ଥକୁ ପୁନର୍ବାର ପ୍ରଦାନ ଦେଖାଇ କ୍ୟାସିୟର ଶଶିକାନ୍ତ ନିଜ ସ୍ତ୍ରୀ ପ୍ରମିଳା ରଣାଙ୍କ ଦୁଇଟି ଜମାଖାତାକୁ ପ୍ରାୟ ୧ କୋଟି ଟଙ୍କା ଟ୍ରାନ୍ସଫର କରିଥିଲେ। ସେହିପରି ଅବଶିଷ୍ଟ ଟଙ୍କା ପୂର୍ବତନ ପିଇଓ ମନ୍ମଥ ମାହୁନ୍ତଙ୍କ ଜମାଖାତାକୁ ଯାଇଥିବା ନେଇ ଟ୍ରେଜେରୀ ଅଫିସର ସୂଚନା ଦେଇଛନ୍ତି। ଏହି ମାମଲାରେ ସମ୍ପୃକ୍ତ ସମସ୍ତ ବ୍ୟକ୍ତିଙ୍କୁ ତଦନ୍ତ ପରିସରଭୁକ୍ତ କରିବାକୁ ଦାବି ଜୋର ଧରିଛି।
