ନୂଆଦିଲ୍ଲୀ,୨୩।୮: ଜନ୍ତର ମନ୍ତରରେ ଚାଲିଥିବା ବିରୋଧ ପ୍ରଦର୍ଶନ ସମୟରେ କେନ୍ଦ୍ର ସରକାର ଦେଇଥିବା ପ୍ରତିଶ୍ରୁତି ପୂରଣ କରିବାକୁ ଦାବି କରିଛି କକ୍ରୋଚ ଜନତା ପାର୍ଟି (CJP) । ରବିବାର ଜାରି କରିଥିବା ବୟାନରେ ସଂଗଠନ କେନ୍ଦ୍ର ସରକାରଙ୍କ ଉପରେ ଯୁବବର୍ଗଙ୍କୁ ଧୋକା ଦେବା ଏବଂ ସେମାନଙ୍କ ବିଶ୍ୱାସ ଭାଙ୍ଗିବା ଭଳି ଗୁରୁତର ଅଭିଯୋଗ ଆଣିଛି ।
CJP କହିଛି ଯେ, ଶାନ୍ତିପୂର୍ଣ୍ଣ ଆନ୍ଦୋଳନ ଶେଷ କରାଇବା ସମୟରେ ସରକାର ଯେଉଁ ପ୍ରତିଶ୍ରୁତି ଦେଇଥିଲେ, ଆନ୍ଦୋଳନକାରୀମାନେ ରାସ୍ତାରୁ ହଟିବା ପରେ ସେହି ପ୍ରତିଶ୍ରୁତିରୁ ଓହରିଯିବା ଉଚିତ ନୁହେଁ । ଯୁବବର୍ଗଙ୍କୁ ଦିଆଯାଇଥିବା ପ୍ରତିଶ୍ରୁତି ଅକ୍ଷରେ ଅକ୍ଷରେ ଏବଂ ତାହାର ମୂଳ ଭାବନା ଅନୁସାରେ ପୂରଣ କରାଯିବା ଦରକାର ବୋଲି ସଂଗଠନ ଦାବି କରିଛି । ଛାତ୍ର ଆନ୍ଦୋଳନ ସମୟରେ ଦାଖଲ ହୋଇଥିବା FIR ରଦ୍ଦ କରିବା ପାଇଁ କୋର୍ଟ ପକ୍ଷରୁ ବାରମ୍ବାର ଅନୁରୋଧ ସତ୍ତ୍ୱେ ସରକାର ଏପର୍ଯ୍ୟନ୍ତ ଆବଶ୍ୟକ ତାଲିକା ଦାଖଲ କରିନାହିଁ ବୋଲି CJP ଅଭିଯୋଗ କରିଛି ।
ସଂଗଠନ ଆହୁରି କହିଛି ଯେ, ଆନ୍ଦୋଳନ ପ୍ରତ୍ୟାହାର କରାଇବା ସମୟରେ ଖବରଦାତା ସମ୍ମିଳନୀ ଜରିଆରେ ସରକାର ପ୍ରତିଶ୍ରୁତି ଦେଇଥିଲେ। ଏବେ ସେହି ପ୍ରତିଶ୍ରୁତିକୁ ବିଳମ୍ବ କରିବା କିମ୍ବା ଭିନ୍ନ ଅର୍ଥ କରିବା ଯୁବବର୍ଗଙ୍କ ବିଶ୍ୱାସ ପ୍ରତି ଗୁରୁତର ଆଘାତ ହେବ ବୋଲି CJP କହିଛି । CJP ପୁଣିଥରେ ଆନ୍ଦୋଳନକୁ ଓହ୍ଲାଇବାର ସଙ୍କେତ ଦେଇଛି । ଆଗାମୀ କାର୍ଯ୍ୟପନ୍ଥା ନିର୍ଦ୍ଧାରଣ ପାଇଁ ଅଗଷ୍ଟ ୨୪ରେ ବୈଠକ ହେବ ବୋଲି ସଂଗଠନ କହିଛି । ଏହା ସହ ଦେଶର ଛାତ୍ର, ଯୁବବର୍ଗ, ସମର୍ଥକ ଓ କର୍ମୀମାନଙ୍କୁ ଆଗାମୀ ଘଟଣାକ୍ରମ ପାଇଁ ପ୍ରସ୍ତୁତ ରହିବାକୁ ଆହ୍ୱାନ ଦିଆଯାଇଛି । ସଂଗଠନର ଦାବି ଅନୁସାରେ, ଏହି ବିରୋଧ ପ୍ରଦର୍ଶନ ଯୋଗୁଁ ଧର୍ମେନ୍ଦ୍ର ପ୍ରଧାନଙ୍କୁ ଇସ୍ତଫା ଦେବାକୁ ପଡ଼ିଥିଲା। ଯୁବପିଢ଼ିଙ୍କୁ ଦିଆଯାଇଥିବା ସମସ୍ତ ପ୍ରତିଶ୍ରୁତି ପୂରଣ ନହେବା ପର୍ଯ୍ୟନ୍ତ ଆନ୍ଦୋଳନରୁ ପଛକୁ ହଟିବୁ ନାହିଁ ବୋଲି CJP ଚେତାବନୀ ଦେଇଛି ।
