ଯୋଡ଼ା,୨୧।୬ (ଡି.ଏନ.ଏ.) କେନ୍ଦୁଝର ଜିଲାର ଯୋଡ଼ା ଖଣି ମଣ୍ଡଳରେ ବହୁ ସଂଖ୍ୟକ ଲୋକ ଟ୍ରକ୍ ପରିବହନ ବ୍ୟବସାୟ ଉପରେ ନିର୍ଭରଶୀଳ ା ପ୍ରାୟ ୧୦ ହଜାରରୁ ଊର୍ଦ୍ଧ୍ୱ ଟ୍ରକ୍ ଏହି ଖଣିଖାଦାନ ଓ କାରଖାନାରେ ନିୟୋଜିତ ହୋଇଛି। ବର୍ତ୍ତମାନ ଖଣି କ୍ଷେତ୍ରର ମାନ୍ଦା ଅବସ୍ଥା ଏକ ଉତ୍କଟ ସମସ୍ୟା ଭାବେ ମୁଣ୍ଡ ଟେକିଛି ା ରପ୍ତାନି ଶୁଳ୍କ ବୃଦ୍ଧି ପରେ ରାଜ୍ୟ ତଥା ରାଜ୍ୟ ବାହାରେ ଥିବା ବନ୍ଦର ଗୁଡିକୁ ଟ୍ରକ୍ ଦ୍ୱାରା ଲୁହାପଥର ଆଉ ପରିବହନ ହେଉ ନାହିଁ। ଯାହାର ସିଧା ପ୍ରଭାବ ପଡ଼ିଛି ଟ୍ରକ୍ ମାଲିକଙ୍କ ଜୀବନ ଜୀବିକା ଉପରେ। ଏହାକୁ ନେଇ ଖଣି ଅଞ୍ଚଳରେ ଅସନ୍ତୋଷ ବଢ଼ିବାରେ ଲାଗିଛି। ତେଣେ ଘରୋଇ ବ୍ୟବହାରରେ ପରିବହନ ହେଉଥିବା ଲୁହାପଥରର ସିଂହଭାଗ ରେଳ ଦ୍ୱାରା ବିଭିନ୍ନ ରାଜ୍ୟର କାରଖାନାଗୁଡିକୁ ପରିବହନ ହୋଇଯାଉଛି। ଏହାଦ୍ୱାରା କେନ୍ଦୁଝର ସମେତ ଯାଜପୁର, ଭଦ୍ରକ, କେନ୍ଦ୍ରାପଡା, ଜଗତସିଂହପୁର, ଅନୁଗୋଳ, ସୁନ୍ଦରଗଡ ଜିଲାର ଟ୍ରକ୍ ମାଲିକମାନେ ବେଶୀ ପ୍ରଭାବିତ ହେଉଛନ୍ତି। ଏହାର ପ୍ରତିବାଦ କରି ଟ୍ରକ୍ ମାଲିକ ସଂଘର କର୍ମକର୍ତ୍ତାମାନେ ଖଣି ଉପନିର୍ଦ୍ଦେଶକ ଦୀନେଶ ଅଗ୍ରୱାଲଙ୍କୁ ଭେଟିଛନ୍ତି।
ଅଧିକ ପ୍ରଭାବିତ ହେଉଛନ୍ତି କେନ୍ଦୁଝର ଜିଲା ଯୋଡା ଅଞ୍ଚଳର ଟ୍ରକ୍ ମାଲିକମାନେ। ଋଣ କରି ଟ୍ରକ୍ କିଣିଥିବା ଲୋକେ ଏବେ ଋଣ ପରିଶୋଧ କରି ନ ପାରିବାରୁ ଦେବାଳିଆ ହୋଇ ପଡିଲେଣି। ପ୍ରାୟ ୨ ମାସ ହେବ ଯୋଡ଼ା ଖଣି ଅଞ୍ଚଳରେ ଏଭଳି ଅଚଳାବସ୍ଥା ପରିଲକ୍ଷିତ ହୋଇଛି। ଏ ନେଇ ଯୋଡା ଟ୍ରକ ମାଲିକ ସଂଘ ପକ୍ଷରୁ ସମ୍ପାଦକ ସୁଶାନ୍ତ କୁମାର ବାରିକଙ୍କ ନେତୃତ୍ୱରେ ଏକ ପ୍ରତିନିଧି ଦଳ ଖଣି ଉପନିର୍ଦ୍ଦେଶକଙ୍କୁ ଭେଟି ୬୦% ଲୁହାପଥର ଟ୍ରକ୍ ଦ୍ୱାରା ପରିବହନ କରାଇବା ପାଇଁ ଦାବି ଜଣାଇବା ସହିତ ସ୍ଲରୀ ପାଇପ ଲାଇନ ଦ୍ୱାରା ହେଉଥବା ଲୁହାପଥର ପରିବହନକୁ ହ୍ରାସ କରିବା ପାଇଁ ସ୍ମାରକପତ୍ରରେ କେନ୍ଦ୍ର ଓ ରାଜ୍ୟ ସରକାରଙ୍କୁ ନିବେଦନ କରିଛନ୍ତି। ଉପନିର୍ଦ୍ଦେଶକ ଅଗ୍ରୱାଲ କହିଛନ୍ତି, ପରିବେଶ ପ୍ରଦୂଷିତ ହେଉଥିବାରୁ ଖଣିଜ ପରିବହନକୁ ସଡକପଥରେ ଗୁରୁତ୍ୱ ଦିଆଯାଉ ନାହିଁ। ଉତ୍ତରରେ ଅସନ୍ତୋଷ ପ୍ରକାଶ କରି ଟ୍ରକ୍ ମାଲିକ ମାନେ କହିଥିଲେ ଯେ, ଟ୍ରକ୍ ଗୁଡିକରେ ଆଧୁନିକ ଜ୍ଞାନ କୌଶଳରେ ବିଏସ୍- ୬ ପ୍ରଦୂଷଣବିହୀନ ଇଞ୍ଜିନ ବିକଶିତ ହୋଇଲାଗିଛି ା ଏହା ଦ୍ୱାରା କିପରି ପ୍ରଦୂଷଣ ହେଉଛି ବୋଲି ସେମାନେ ପ୍ରଶ୍ନ କରିଥିଲେ। ଅନ୍ୟପକ୍ଷରେ ଖଣି ଅଞ୍ଚଳରେ ରହିଥିବା ବନ୍ଧୁର ରାସ୍ତାରୁ ଧୂଳି ଉଡୁଥିବାରୁ ରାସ୍ତା ଗୁଡିକୁ ଡିଏମ୍ଏଫ୍ ଅର୍ଥରୁ ଟଙ୍କା ଖର୍ଚ୍ଚ କରାଯାଇ ନିର୍ମାଣ କଲେ ପ୍ରଦୂଷଣ ମାତ୍ରା କମିବ ବୋଲି ଉପସ୍ଥିତ ଥିବା ଟ୍ରକ୍ ମାଲିକ ମାୟାଧର ପାତ୍ର, ରାଜେଶ ରୋଶନ, ଅବଦୁଲ ଖାନ କହିଥିଲେ। ଏସମ୍ପର୍କରେ ସଂଘ ସମ୍ପାଦକ ବାରିକ କହିଥିଲେ ଯେ, ତିନିମାସ ତଳେ ଟ୍ରକ୍ଗୁଡିକ କିଛି ମାତ୍ରାରେ ଖଣି ଅଞ୍ଚଳରେ ପରିବହନ କରୁଥିଲେ ା ମାତ୍ର ରେଳ ର଼୍ୟାକ ଯୋଗେ ପରିବହନ ହେଉଥିବାରୁ ଟ୍ରକ୍ ଗୁଡିକ କାମଧନ୍ଦା ହରାଇଛନ୍ତି। ଏନେଇ କେନ୍ଦ୍ର ଓ ରାଜ୍ୟ ସରକାରଙ୍କୁ ସଂଘ ପକ୍ଷରୁ ଅବଗତ କରାଯିବ। ନ ଶୁଣିଲେ ବିକଳ୍ପ ପନ୍ଥା ଅବଲମ୍ବନ କରାଯିବ ବୋଲି ଚେତାବନୀ ଦିଆଯାଇଛି।
