କଟକ ଅଫିସ,୨୮ା୯: ଖ୍ରୀଷ୍ଟ କଲେଜ ଛାତ୍ର ମୃତ୍ୟୁ ଘଟଣାର ପୋଲିସ ସୋମବାର ପର୍ଦ୍ଧାଫାଶ କରିଛି। ଛାତ୍ର ତୁଷାରକାନ୍ତ ସାହୁଙ୍କ ମୃତ୍ୟୁ ଘଟଣାରେ ଜଗତପୁର ପୋଲିସ ୨ ଜଣଙ୍କୁ ଗିରଫ କରି ସୋମବାର କୋର୍ଟ ଚାଲାଣ କରିଛି। ସେମାନେ ହେଲେ କଟକ ଦରଘାବଜାର ଅଞ୍ଚଳର ଦିବ୍ୟରଞ୍ଜନ ବେହେରା ଓରଫ ଜୁବୁ(୨୬) ଓ ପିଠାପୁର ରୋଡର କୌଶଲ ପ୍ରଧାନ (୨୦)।
ଏ ସମ୍ପର୍କରେ ଏସିପି ଅମରେନ୍ଦ୍ର ପଣ୍ଡା ଗଣମାଧ୍ୟମକୁ ସୂଚନା ଦେଇ କହିଛନ୍ତି, ତୁଷାର ଓ ତାଙ୍କ କଲେଜର ଜଣେ ଯୁବତୀଙ୍କ ମଧ୍ୟରେ ଘନିଷ୍ଠତା ରହିଥିଲା। ପରେ ଦୁହିଁଙ୍କ ମଧ୍ୟରେ ବିବାଦ ଦେଖାଦେଇଥିଲା। ସେହି କନେକ୍ସନରେ ଯୁବତୀ ଓ ତାଙ୍କ ବଡ଼ ଭଉଣୀଙ୍କ ବୟଫ୍ରେଣ୍ଡ ଓ ଜଣେ ଧରମ ଭାଇ ୨/୩ ମାସ ଧରି ଲଗାତର ଭାବେ ତୁଷାରଙ୍କୁ ମାନସିକ ନିର୍ଯାତନା ଦେଉଥିଲେ। ଏପରି କି ସେମାନେ ତୁଷାରଙ୍କ ଉପରେ ବିଭିନ୍ନ ଚାପ ପକାଇବା ସହ ତାଙ୍କ ବିରୋଧରେ ମିଛ ଏଫଆଇଆର୍ ଦେବା ପାଇଁ ଧମକ ଦେଉଥିଲେ। ଗତ ଅଗଷ୍ଟ ୩ ତାରିଖରେ ଇନଡୋର୍ ଷ୍ଟାଡିୟମରେ ତୁଷାରଙ୍କୁ ଦିବ୍ୟରଞ୍ଜନ ମାଡ ମାରିଥିଲେ। ପରେ ତୁଷାର ମାନସିକ ସ୍ତରରେ ଚାପଗ୍ରସ୍ତ ହୋଇଥିଲେ। ଆଉ ଏହି ୪ ଜଣଙ୍କ ଦ୍ୱାରା ଦିଆଯାଉଥିବା ମାନସିକ ନିର୍ଯାତନା ପାଇଁ ତୁଷାର ନଦୀକୁ ଡେଇଁ ଆତ୍ମହତ୍ୟା କରିଥିଲେ। ଏହି ୪ ଜଣ ତାଙ୍କୁ ଆତ୍ମହତ୍ୟା କରିବାକୁ ପ୍ରବର୍ତ୍ତାଇଥିଲେ। ଏନେଇ ପୋଲିସ ଏକ ମାମଲା (ନଂ. ୩୮୨/୨୧) ରୁଜୁ କରି ଦିବ୍ୟରଞ୍ଜନ ଓ କୌଶଲଙ୍କୁ ଗିରଫ କରିଛି। ଏହି ଘଟଣାରେ ସମ୍ପୃକ୍ତ ଥିବା ଅନ୍ୟମାନଙ୍କୁ ଆଗାମୀ ଦିନରେ ତଦନ୍ତ ପରିସରକୁ ନିଆଯିବ ବୋଲି ଏସିପି ପଣ୍ଡା କହିଛନ୍ତି।
ସୂଚନାଯୋଗ୍ୟ, ତୁଷାର ଗତ ଅଗଷ୍ଟ ୩ ତାରିଖ ରାତି ୮ଟାରେ ଏକ ସ୍କୁଟିରେ କଟକ ଚଣ୍ଡୀଛକସ୍ଥିତ ଘରୁ କେଉଁଆଡେ ଚାଲିଯାଇଥିଲେ। ଏନେଇ ତାଙ୍କ ବାପା ହୃଷୀକେଶ କ୍ୟାଣ୍ଟନମେଣ୍ଟ ଥାନାରେ ଅଭିଯୋଗ କରିଥିଲେ। ଅଗଷ୍ଟ ୫ ତାରିଖରେ ଜଗତ୍ପୁର ପୋଲିସ ଯୋବ୍ରା ଆନିକଟ ନିକଟରୁ ମୃତଦେହ ଜବତ କରିଥିଲା। ପରେ ତୁଷାରଙ୍କର ବାନ୍ଧବୀଙ୍କ ସମେତ ୫ଜଣ ସାଙ୍ଗଙ୍କ ବିରୋଧରେ ହୃଷୀକେଶ କ୍ୟାଣ୍ଟନମେଣ୍ଟ ଥାନାରେ ଅଭିଯୋଗ କରିଥିଲେ।
