ଓ୍ବାଶିଂଟନ/ବେଜିଂ, ୨୬।୫ : ଚାଇନା ପ୍ରଶାନ୍ତ ମହାସାଗରୀୟ ଅଞ୍ଚଳର ୧୦ଟି ଛୋଟ ଦେଶ ସହିତ ବୁଝାମଣା କରିବା ଯୋଜନା କରିଛି। ଏସବୁ ଦେଶର ସୁରକ୍ଷା ଠାରୁ ଆରମ୍ଭ କରି ମତ୍ସ୍ୟ ପାଳନ ପର୍ଯ୍ୟନ୍ତ ଏକ ବ୍ୟାପକ ଚୁକ୍ତିନାମାକୁ ଚାଇନା ସମର୍ଥନ କରିବାକୁ ଚାହୁଁଛି। ତେବେ ଚାଇନା ଏଭଳି କରି ଏହି ଅଞ୍ଚଳ ଦଖଲ କରିବା ଲାଗି ଏକ ବଡ ଏବଂ ଗୁରୁତ୍ୱପୂର୍ଣ୍ଣ ଷଡ଼ଯନ୍ତ୍ର କରୁଥିବା ଆମେରିକା ଚେତାବନୀ ଦେଇଛି। ଆମେରିକା ରାଷ୍ଟ୍ରପତି ଜୋ ବାଇଡେନ୍ ଚାଇନା ପ୍ରତିପକ୍ଷ ଶି ଜିନ୍ ପିଙ୍ଗ୍ଙ୍କ ଏଭଳି ପଦକ୍ଷେପ ନେଇ ଚିନ୍ତା ପ୍ରକଟ କରିଛନ୍ତି।
ଚୁକ୍ତିନାମା ଯୋଜନାରୁ ଜଣାପଡିଛି ଯେ ଚାଇନା ପ୍ରଶାନ୍ତମହାସାଗରୀୟ ଅଞ୍ଚଳରେ ଥିବା ଦେଶର ପୋଲିସ କର୍ମଚାରୀଙ୍କୁ ତାଲିମ ଦେବାକୁ, ସେମାନଙ୍କ ସହ ପାରମ୍ପାରିକ ତଥା ଅଣ ପରମ୍ପାରିକ ସୁରକ୍ଷା ସହ ଜଡିତ ହେବାକୁ ଏବଂ ଆଇନ ପ୍ରଣୟନରେ ସହଯୋଗ ବୃଦ୍ଧି କରିବାକୁ ଚାହୁଁଛି। ଚାଇନା ପ୍ରଶାନ୍ତ ମହାସାଗରୀୟ ଅଞ୍ଚଳରେ ଲୋକପ୍ରିୟ ଟୁନା ମାଛ ଧରିବା ସହିତ ମତ୍ସ୍ୟଚାଷ ପାଇଁ ଏକ ସାମୁଦ୍ରିକ ଯୋଜନା ପ୍ରସ୍ତୁତ କରିବାକୁ ଚାହୁଁଛି। ସେହିପରି ଏହି ଅଞ୍ଚଳରେ ଇଣ୍ଟରନେଟ ନେଟୱାର୍କ ଚଳାଇବାରେ ସହଯୋଗ ବୃଦ୍ଧି କରିବାକୁ ଏବଂ ସାଂସ୍କୃତିକ କନଫୁସିଆନ ପ୍ରତିଷ୍ଠାନ ଏବଂ ଶ୍ରେଣୀଗୃହ ପ୍ରତିଷ୍ଠା କରିବାକୁ ଚାହୁଁଛି।
ଏକ ମୁକ୍ତ ବାଣିଜ୍ୟ କ୍ଷେତ୍ର ଏବଂ ପ୍ରଶାନ୍ତ ମହାସାଗରୀୟ ଦେଶ ସୃଷ୍ଟି କରିବାର ସମ୍ଭାବନାକୁ ଚାଇନା ମଧ୍ୟ ଉଲ୍ଲେଖ କରିଛି। ଚାଇନାର ଏହି ପଦକ୍ଷେପ ଅନ୍ତର୍ଗତ ବୈଦେଶିକ ମନ୍ତ୍ରୀ ୱାଙ୍ଗ ୟି ଏବଂ ୨୦ ଜଣିଆ ନେତାଙ୍କ ଏକ ପ୍ରତିନିଧି ଦଳ ଚଳିତ ସପ୍ତାହରେ ଏହି ଅଞ୍ଚଳ ଗସ୍ତ ଆରମ୍ଭ କରିଛନ୍ତି। ଆମେରିକାର ବୈଦେଶିକ ବିଭାଗର ମୁଖପାତ୍ର ନେଡ ପ୍ରାଇସ ଚାଇନାର ଉଦ୍ଦେଶ୍ୟକୁ ନେଇ ବୁଧବାର ଉଦ୍ବେଗ ପ୍ରକାଶ କରି କହିଛନ୍ତି ଯେ ଦ୍ୱୀପପୁଞ୍ଜର ଲାଭ ଉଠାଇବା ଏବଂ ଏହି ଅଞ୍ଚଳକୁ ଅସ୍ଥିର କରିବା ପାଇଁ ବେଜିଂ ପ୍ରସ୍ତାବିତ ଚୁକ୍ତିନାମାକୁ ବ୍ୟବହାର କରିବାର ଆଶଙ୍କା ରହିଛି।
ପ୍ରାଇସ୍ କହିଛନ୍ତି ଯେ, ଚାଇନା ପ୍ରତିନିଧି ଦଳ ପ୍ରଶାନ୍ତ ମହାସାଗରୀୟ ଅଞ୍ଚଳରେ ଥିବା ୱାଙ୍ଗ ସୋଲୋମନ ଦ୍ୱୀପପୁଞ୍ଜ, କିରିବାତି, ସାମୋଆ, ଫିଜି, ଟୋଙ୍ଗା, ବନାତୁ ଏବଂ ପାପୁଆ ନ୍ୟୁ ଗିନିକୁ ଯାତ୍ରା କରିଛନ୍ତି । ଏହି ଦେଶଗୁଡ଼ିକ ଚାଇନା ସହିତ ଦ୍ୱିପାକ୍ଷିକ ସହଯୋଗ ବୃଦ୍ଧି ପାଇଁ ରାଜି ହେବାର ସମ୍ଭାବନା ଅଧିକ ରହିଛି।
