ପୁରୁଷୋତ୍ତମପୁର,୮।୨(ସବିତା ମିଶ୍ର): ଗଞ୍ଜାମ ଜିଲାର ଅଧିଷ୍ଠାତ୍ରୀ ଦେବୀ ମା’ ତାରାତାରିଣୀଙ୍କ ମନ୍ଦିର ହୁଣ୍ଡିରୁ ମିଳିଥିବା ଏକ ଚିଠି ଏବେ ଶ୍ରଦ୍ଧାଳୁଙ୍କ ମନକୁ ଆନ୍ଦୋଳିତ କରିଛି। ଜଣେ କୁନି ପୁଅ ନିଜ ପରିବାରର ଦୁଃଖ ଜଣାଇ ମା’ଙ୍କ ନିକଟକୁ ଲେଖିଥିବା ଏହି ଭାବପୂର୍ଣ୍ଣ ଚିଠିଟି ଏବେ ସବୁଠି ଚର୍ଚ୍ଚାର ବିଷୟ ପାଲଟିଛି।
ମନ୍ଦିର ପ୍ରଶାସନ ଓ ପୋଲିସ ଉପସ୍ଥିତିରେ ହୁଣ୍ଡି ଟଙ୍କା ଗଣତି ଚାଲିଥିବା ବେଳେ ଏହି ହାତଲେଖା ଚିଠିଟି ମିଳିଥିଲା। ଟଙ୍କା ଓ ସୁନା-ରୂପା ଅଳଙ୍କାର ଗହଣରେ ଧଳା କାଗଜରେ ନୀଳ କାଳିରେ ଲେଖାଯାଇଥିବା ଏହି ଚିଠିଟି ସମସ୍ତଙ୍କ ଦୃଷ୍ଟି ଆକର୍ଷଣ କରିଥିଲା।
ଶିଶୁଟି ନିଜ ପାଇଁ ବିଦ୍ୟା ଓ ବୁଦ୍ଧି ମାଗିବା ସହ ନିଜ ମା’, ଜେଜେବାପା, ଜେଜେମା’ ଏବଂ ବଡ଼ ଭାଇଙ୍କ ଶୁଭ ମନାସିଛି। ପରିବାରକୁ କେହି ଜଣେ ଶତ୍ରୁ ହଇରାଣ କରୁଥିବା କଥା ଉଲ୍ଲେଖ କରି ସେହି ବିପଦରୁ ରକ୍ଷା କରିବାକୁ ସେ ମା’ଙ୍କୁ ଗୁହାରି କରିଛି।
ନିଜକୁ ଛୋଟ ପିଲାଟିଏ ବୋଲି କହିବା ସହ ତାର ଅନେକ ସ୍ୱପ୍ନ ରହିଛି ଏବଂ ମା’ ତାରାତାରିଣୀ ନିଶ୍ଚୟ ତା’ର ମନସ୍କାମନା ପୂରଣ କରିବେ ବୋଲି ସେ ଦୃଢ଼ ବିଶ୍ୱାସ ପ୍ରକଟ କରିଛି।
ଏହି ଘଟଣାଟି ଭକ୍ତ ଓ ଭଗବାନଙ୍କ ମଧ୍ୟରେ ଥିବା ନିବିଡ଼ ସମ୍ପର୍କକୁ ପୁଣିଥରେ ପ୍ରମାଣିତ କରିଛି। ଶିଶୁଟିର ଏହି ସରଳ ଓ ନିଷ୍ପାପ ନିବେଦନ ସେଠାରେ ଉପସ୍ଥିତ ସମସ୍ତଙ୍କୁ ଭାବବିହ୍ୱଳ କରି ଦେଇଥିଲା।
