ନୂଆଦିଲ୍ଲୀ, ୪ା୪: ମହିଳା ସଶକ୍ତୀକରଣ ଲାଗି ‘ବେଟି ବଚାଓ-ବେଟି ପଢ଼ାଓ’ ଏବଂ ଅନ୍ୟାନ୍ୟ ଯୋଜନା ସତ୍ତ୍ୱେ ବାଲ୍ୟ ବିବାହ ଓଡ଼ିଶା ସମେତ ଦେଶର ବିଭିନ୍ନ ଭାଗରେ ଏବେ ବି ସାମାଜିକ ବ୍ୟାଧି ଭାବେ ରହିଆସିଛି। ଗତ ୫ ବର୍ଷ ମଧ୍ୟରେ ଦେଶରେ ବାଲ୍ୟବିବାହର ବର୍ଦ୍ଧିତ ଧାରା ଜାରି ରହିଥିବା ସରକାରୀ ତଥ୍ୟରୁ ଜଣାପଡ଼ିଛି। କେନ୍ଦ୍ର ମହିଳା ଓ ଶିଶୁ ବିକାଶ ମନ୍ତ୍ରଣାଳୟ ଲୋକ ସଭାରେ ଉପସ୍ଥାପନ କରିଥିବା ତଥ୍ୟ ଅନୁଯାୟୀ, ଓଡ଼ିଶାରେ ୨୦୧୭ରେ ୧୭ଟି ବାଲ୍ୟବିବାହ ହୋଇଥିବାବେଳେ ୨୦୨୧ରେ ତାହା ୬୪କୁ ବୃଦ୍ଧି ପାଇଛି। ଅର୍ଥାତ୍ ୫ ବର୍ଷରେ ବାଲ୍ୟ ବିବାହ ୩ ଗୁଣରୁ ଅଧିକ ବଢ଼ିଛି। ଜାତୀୟ ସ୍ତରରେ ୨୦୧୭ରେ ବାଲ୍ୟ ବିବାହ ସଂଖ୍ୟା ୩୯୫ ଥିବାବେଳେ ୨୦୨୧ରେ ତାହା ୧,୦୫୦ରେ ପହଞ୍ଚତ୍ଛି। ଲୋକଙ୍କ ମଧ୍ୟରେ ସଚେତନତା ବୃଦ୍ଧି ପାଇଥିବାରୁ ବାଲ୍ୟବିବାହ ସମ୍ପର୍କରେ ଅଧିକ ରିପୋର୍ଟ ହୋଇଥାଇପାରେ ବୋଲି ମନ୍ତ୍ରଣାଳୟ କହିଛି। ଏହା ବ୍ୟତୀତ ସରକାରଙ୍କ ବିଭିନ୍ନ ପ୍ରୋତ୍ସାହନ ଏବଂ ରାଜ୍ୟରେ ଆଇନର ଉତ୍ତମ କାର୍ଯ୍ୟକାରିତା ଯୋଗୁ ବାଲ୍ୟବିବାହ ସମ୍ପର୍କରେ ଅଧିକ ଅଭିଯୋଗ ମିଳିପାରୁଛି। ବାଲ୍ୟବିବାହ ନିରାକରଣ ଆଇନ, ୨୦୦୬ କାର୍ଯ୍ୟକାରୀ ହେବା ପରେ ଏହା କିଛି ପରିମାଣରେ ହ୍ରାସ ପାଇଥିଲା। ୨୦୦୬ରେ ବାଲ୍ୟବିବାହ ପ୍ରସାର ୪୭ ପ୍ରତିଶତରୁ ୨୦୧୯-୨୧ ବେଳକୁ ୨୩.୩ ପ୍ରତିଶତକୁ ହ୍ରାସ ପାଇଥିଲା। ତେବେ ଆନ୍ଧ୍ରପ୍ରଦେଶ, ତେଲଙ୍ଗାନା, ଆସାମ, ବିହାର, ଝାଡ଼ଖଣ୍ଡ, ରାଜସ୍ଥାନ, ତ୍ରିପୁରା ଏବଂ ପଶ୍ଚିମବଙ୍ଗରେ ଏହି ହାର ଜାତୀୟ ହାରଠାରୁ ଅଧିକ ରହିଛି। ପୁଅଙ୍କ ସହ ଝିଅମାନଙ୍କ ବିବାହ ବୟସ ୨୧କୁ ବୃଦ୍ଧି କରିବା ପାଇଁ କେନ୍ଦ୍ର ସରକାର ୨୦୨୧ରେ ବିଲ୍ ଆଣିଥିଲେ। ଏହା ବିଭାଗୀୟ ସଂସଦୀୟ କମିଟିର ବିଚାରାଧୀନ ରହିଛି। ବିଜେଡି ଏମ୍ପି ଚନ୍ଦ୍ରାଣୀ ମୁର୍ମୁଙ୍କ ଏକ ପ୍ରଶ୍ନର ଉତ୍ତରରେ ମନ୍ତ୍ରଣାଳୟ ଜାତୀୟ ଅପରାଧ ରେକର୍ଡ ବ୍ୟୁରୋ ଉକ୍ତ ତଥ୍ୟ ଉପସ୍ଥାପନ କରିଛି।
