ଅମରପାଲି,୩ା୧୦(ପୀତାମ୍ବର ସାହୁ): ସୁବର୍ଣ୍ଣପୁର ଜିଲା ବୀରମହାରାଜପୁର ବ୍ଲକ ଅନ୍ତର୍ଗତ ଜଟେସିଂହା ହାଇସ୍କୁଲରେ ଓଡ଼ିଶା ମାଧ୍ୟମିକ ସ୍କୁଲ ଶିକ୍ଷକ ସଂଘ(ଓଷ୍ଟା)ର ସାମ୍ବିଧାନିକ ସମ୍ମିଳନୀ ଓ ନୂତନ କର୍ମକର୍ତ୍ତା ଚୟନ ହୋଇଯାଇଛି। ଓଷ୍ଟାର ବ୍ଲକ ସଭାପତି ନାରାୟଣ ରଥଙ୍କ ସଭାପତିତ୍ୱରେ ଅନୁଷ୍ଠିତ କାର୍ଯ୍ୟକ୍ରମରେ ରାଜ୍ୟ ପୁରସ୍କାରପ୍ରାପ୍ତ ଶିକ୍ଷକ ଭୂଷଣ କୁମାର ପାତ୍ର ମୁଖ୍ୟ ଅତିଥି ଏବଂ ରାଜ୍ୟ କାର୍ଯ୍ୟକାରିଣୀ ସଭ୍ୟ ଅମୀୟ କୁମାର ମହାନ୍ତି ମୁଖ୍ୟବକ୍ତା ଭାବେ ଯୋଗଦେଇ ଥିଲେ। ଅନ୍ୟମାନଙ୍କ ମଧ୍ୟରେ
ସଂଘର ଜିଲା ସଭାପତି ଆଖୋଜ କୁମାର ପ୍ରଧାନ ଓ ସମ୍ପାଦକ ସୁଶୀଲ ବିଶି ସମ୍ମାନିତ ଅତିଥି ଭାବେ ଯୋଗଦେଇଥିଲେ। ଏହି ଅବସରରେ ବ୍ଲକର ଅବସରପ୍ରାପ୍ତ ଶିକ୍ଷକମାନଙ୍କୁ ସମ୍ବର୍ଦ୍ଧିତ କରାଯାଇଥିଲା। ଏହି ଅବସରରେ ନୂତନ ଭାବେ ସଙ୍ଗଠନର କର୍ମକର୍ତ୍ତା ଚୟନ କରାଯାଇଥିଲା।
ନୂତନ ସଂଗଠନର ଚନ୍ଦ୍ରମଣି ବାଘଙ୍କୁ ସଭାପତି, ସଚ୍ଚିଦାନନ୍ଦ ବରିହା ଓ ପ୍ରତିଭା ବେଦବାକଙ୍କୁ ଉପସଭାପତି, ବ୍ରଜମୋହନ ବାରିକଙ୍କୁ ସମ୍ପାଦକ, ଶାନ୍ତନୁ ମହାକୁର ଓ ମଞ୍ଜୁଲତା ଜଗଦଲାଙ୍କୁ ସହସମ୍ପାଦକ, ସନ୍ତୋଷ କୁମାର ରଥ ଓ ବୈକୁଣ୍ଠ ନାୟକଙ୍କୁ ଜିଲାପରିଷଦ ସଭ୍ୟ, ରଞ୍ଜନ କୁମାର ରାୟଙ୍କୁ ରାଜ୍ୟ ପରିଷଦ ସଭ୍ୟ ଭାବେ ମନୋନୀତ କରାଯାଇଥିଲା। ସଂଘର ପୂର୍ବ ବ୍ଲକ ସମ୍ପାଦକ ତ୍ରିପୁରାରୀ ରଥ ଅତିଥି ପରିଚୟ ପ୍ରଦାନ କରିଥିବା ବେଳେ ଶିକ୍ଷକ ଚନ୍ଦ୍ର ଶେଖର ମହାପାତ୍ର ଧନ୍ୟବାଦ ଅର୍ପଣ କରିଥିଲେ। ଏହି ଅବସରରେ ସଂଘର ସମସ୍ତ ଶିକ୍ଷକ ଯୋଗଦେଇଥିଲେ।
