ନୂଆଦିଲ୍ଲୀ, ୨୯।୯ : ସୁପ୍ରିମକୋର୍ଟରେ କେନ୍ଦ୍ର ସରକାର ହ୍ବାଟସ୍ଆପ ସମେତ ସମସ୍ତ ସୋସିଆଲ ମିଡିଆ କମ୍ପାନୀକୁ ତାଗିଦ କରିଛନ୍ତସି। କେନ୍ଦ୍ର ସରକାର ସ୍ପଷ୍ଟ ଭାବରେ କହିଛନ୍ତି ଯେ ଯଦି ଜଣେ ଭାରତରେ କାମ କରିବାକୁ ଚାହାଁନ୍ତି, ତେବେ ଦେଶର ଆଇନ ଅନୁଯାୟୀ କାମ କରିବାକୁ ହେବ ଏବଂ ଭାରତୀୟ ନାଗରିକଙ୍କ ପ୍ରତି ଭେଦଭାବକୁ ବରଦାସ୍ତ କରାଯାଇପାରିବ ନାହିଁ। ହ୍ବାଟସଆପ ଗୋପନୀୟତା ନୀତି ୨୦୨୧ ବିରୋଧରେ ଆବେଦନ ଉପରେ ସୁପ୍ରିମକୋର୍ଟର ଏକ ପାଞ୍ଚ ଜଣିଆ ସମ୍ବିଧାନ ବେଞ୍ଚରେ ଶୁଣାଣି ବେଳେ କେନ୍ଦ୍ର ଏଭଳି କହିଛି। ସରକାର କହିଛନ୍ତି ଏହା କେବଳ ହ୍ବାଟସଆପ ନୁହେଁ ସମସ୍ତଙ୍କ ପାଇଁ ପ୍ରଯୁଜ୍ୟ। ଦେଶର ଆଇନ ଉଲ୍ଲଂଘନ କରାଯାଉଥିବା ନେଇ କେନ୍ଦ୍ର ଉଦବେଗ ପ୍ରକାଶ କରିଛି।
କେନ୍ଦ୍ର ସରକାର କହିଛନ୍ତି ଯେ ଭାରତର ନାଗରିକମାନଙ୍କୁ ଅନ୍ୟ ଦେଶର ନାଗରିକଙ୍କ ଭଳି ଭେଦଭାବ କରାଯାଇପାରିବ ନାହିଁ। ଅନ୍ୟ ଦେଶ ଭଳି ସମାନ ଗୋପନୀୟତା ନୀତି ରହିବା ଉଚିତ। କେନ୍ଦ୍ର କହିଛି ଯେ ଏହି ପ୍ରସଙ୍ଗରେ ନ୍ୟାୟିକ ହସ୍ତକ୍ଷେପର ଆବଶ୍ୟକ ନାହିଁ କିନ୍ତୁ ବିଧେୟକର ହସ୍ତକ୍ଷେପ ଆବଶ୍ୟକ। ଏହି ପ୍ରସଙ୍ଗରେ ଆସନ୍ତା ସଂସଦ ଅଧିବେଶନରେ ଏକ ନୂତନ ବିଲ ଅଣାଯିବ। ସେ ପର୍ଯ୍ୟନ୍ତ ଅପେକ୍ଷା କରାଯିବା ଉଚିତ।
ଆସନ୍ତା ସଂସଦ ଅଧିବେଶନରେ ଡାଟା ସୁରକ୍ଷା ବିଲ ଅଣାଯିବ ବୋଲି କେନ୍ଦ୍ର କହିଛି। କେନ୍ଦ୍ର ସରକାରଙ୍କ ଏହି ଅନୁରୋଧକୁ ସୁପ୍ରିମକୋର୍ଟ ଗ୍ରହଣ କରିଛନ୍ତି। କୋର୍ଟ କହିଛନ୍ତି ଯେ ସରକାର ଡାଟା ସୁରକ୍ଷା ବିଲ ଆଣିବାକୁ ପ୍ରସ୍ତୁତ ହେଉଛନ୍ତି ତେଣୁ ପରବର୍ତ୍ତୀ ସମୟରେ ଏହାର ଶୁଣାଣି ହେବ। ସମ୍ବିଧାନ ବେଞ୍ଚ ବର୍ତ୍ତମାନ ୧୭ ଜାନୁଆରୀ ୨୦୨୩ରେ ହ୍ବାଟସ୍ଆପ ଗୋପନୀୟତା ନୀତିର ଶୁଣାଣି କରିବେ। ସୋଲିସିଟର ଜେନେରାଲ ତୁଷାର ମେହେଟ୍ଟା କହିଛନ୍ତି ଯେ ପୂର୍ବ ଆଦେଶରେ ଏହା ଏକ ଡ୍ରାଫ୍ଟ ବିଲ ଅଛି ବୋଲି ଉଲ୍ଲେଖ କରାଯାଇଥିଲା। ସେହି ବିଲ ପ୍ରତ୍ୟାହାର କରାଯାଇଛି ଏବଂ ସଂସଦର ପରବର୍ତ୍ତୀ ଅଧିବେଶନରେ ଏକ ନୂତନ ବିଲ ଆଗତ ହେବ।
