ଗଜପତି ଜିଲାର ସୀମାନ୍ତ ଗାଁରେ ଓଡ଼ିଶା ଓ ଆନ୍ଧ୍ରପ୍ରଦେଶ ପକ୍ଷରୁ ଜନଗଣନାକୁ ନେଇ ବିବାଦ ସୃଷ୍ଟି ହୋଇଛି। ରାୟଗଡ଼ ବ୍ଲକ ଗଙ୍ଗାବାଡ଼ ପଞ୍ଚାୟତର ମାଣିକପାଟଣା ଗ୍ରାମରେ ଓଡ଼ିଶା ସରକାରଙ୍କ ପକ୍ଷରୁ ଜନଗଣନା କାର୍ଯ୍ୟ କରାଯାଇ ଘର ନମ୍ବର ଲେଖାଯାଇଥିଲା। ତାହାକୁ ଆନ୍ଧ୍ରପ୍ରଦେଶର ଅଧିକାରୀମାନେ ଲିଭାଇ ସେମାନଙ୍କ ନମ୍ବର ଲେଖୁଛନ୍ତି। ଏହାର ଜବାବରେ ଓଡ଼ିଶାର ଜନଗଣନା ଅଧିକାରୀମାନେ ମଧ୍ୟ ସମାନ ପଦକ୍ଷେପ ନେଉଛନ୍ତି। କେତେକ ଘରେ ଦୁଇ ରାଜ୍ୟର ନମ୍ବର ଲେଖାଯାଇଥିବା ଦେଖିବାକୁ ମିଳିଛି। ଉଭୟ ରାଜ୍ୟର ଅଧିକାରୀମାନଙ୍କ ଏଭଳି କାର୍ଯ୍ୟ ଜନଗଣନାକୁ ତ୍ରୁଟିପୂର୍ଣ୍ଣ କରିଦେବ। ମାଣିକପାଟଣା ଏକ ଉଦାହରଣ ହୋଇଥିବାବେଳେ ଦେଶର ବିଭିନ୍ନ ରାଜ୍ୟର ସୀମାନ୍ତ ଅଞ୍ଚଳରେ ଏଭଳି ବିବାଦୀୟ ଜନଗଣନା ସ୍ଥିତି ରହିଥିବା ସ୍ପଷ୍ଟ ହୋଇଯାଉଛି। ଏଥିରୁ ଦେଶର ଜନଗଣନା ତ୍ରୁଟିଶୂନ୍ୟ ହେବା ଆଶା କରାଯାଇ ନ ପାରେ। ଅନ୍ୟପକ୍ଷରେ ଜନଗଣନା ସମୟରେ କେତେଜଣ ଅଧିକାରୀଙ୍କ ଆଚରଣ ଲୋକଙ୍କୁ କ୍ଷୁବ୍ଧ କରିଦେଉଥିବାରୁ ମାରପିଟ୍ ଭଳି ଘଟଣା ଘଟୁଛି। ଏପ୍ରିଲ ୨୨ରେ ଢେଙ୍କାନାଳ ଜିଲାର କାମାକ୍ଷାନଗର ଅଞ୍ଚଳରେ ଘଟିଥିବା ଘଟଣା ଏହାର ଉଦାହରଣ।
ପାରଳାଖେମୁଣ୍ଡି,୧୦ ।୫ (ଗିରିଧାରୀ ପରିଚ୍ଛା): ଗଜପତି ଜିଲାର ଗଙ୍ଗାବାଡ ପଞ୍ଚାୟତ ଆନ୍ଧ୍ର ସୀମାନ୍ତକୁ ଲାଗି ରହିଛି। ସବୁବେଳେ ଏହି ପଞ୍ଚାୟତରେ ଆନ୍ଧ୍ର କିଛି ନା କିଛି ବିଶୃଙ୍ଖଳା ସୃଷ୍ଟି କରି ଆସୁଛି। ଏବେ ଜିଲାରେ ଜନଗଣନା କାର୍ଯ୍ୟ ଚାଲିଥିବା ବେଳେ ଗତ ୪ ଦିନ ମଧ୍ୟରେ ଆନ୍ଧ୍ର ୨ ଥର ଉକ୍ତ ପଞ୍ଚାୟତରେ ପଶି ଜନଗଣନା କାର୍ଯ୍ୟରେ ହସ୍ତକ୍ଷେପ କରିଛି। ଉକ୍ତ ପଞ୍ଚାୟତର ମାଣିକପାଟଣା ଗ୍ରାମରେ ଥିବା ୮୨ଟି ଘରେ ୬ ତାରିଖରେ ଓଡ଼ିଶା ପକ୍ଷରୁ ଜନଗଣନା କାର୍ଯ୍ୟକ୍ରମ କରୁଥିବା କର୍ମଚାରୀ ସର୍ଭେ କରି ପ୍ରତି ଘରେ ସର୍ଭେ ନମ୍ବର କାନ୍ଥରେ ଲେଖି ଆସିଥିଲେ। ପରେ ଆନ୍ଧ୍ରର ଅଧିକାରୀମାନେ ପହଞ୍ଚତ୍ ଏହି ଗ୍ରାମର ୨୨ଟି ଘରେ ଓଡିଶା ପକ୍ଷରୁ ଲେଖାଯାଇଥିବା ସର୍ଭେ ନମ୍ବର ପାର୍ଶ୍ୱରେ ଆନ୍ଧ୍ରର ସର୍ଭେ ନମ୍ବର ପକାଇ ସେଠାକାର ଲୋକଙ୍କୁ ଆନ୍ଧ୍ର ସରକାରଙ୍କ କାର୍ଯ୍ୟକ୍ରମରେ ସାମିଲ ହେବାକୁ ତାଗିଦ କରିଥିଲେ। ଏସମ୍ପର୍କରେ ଜାଣିବା ପରେ ୭ ତାରିଖରେ ଗଜପତି ଜିଲା ପ୍ରଶାସନପକ୍ଷରୁ ଉପଜିଲାପାଳ ଅନୁପ ପଣ୍ଡାଙ୍କ ଅଧ୍ୟକ୍ଷତାରେ ଏକ ଟିମ୍ ଘଟଣାସ୍ଥଳ ପରିଦର୍ଶନ କରିଥିଲା। ଏହି ଟିମ୍ରେ ରାୟଗଡ ତହସିଲଦାର, ଗାରବନ୍ଧା ପୋଲିସ ଓ ଅନ୍ୟ ପ୍ରଶାସନିକ ଅଧିକାରୀମାନେ ଘଟଣାର ତଦନ୍ତ କରିବା ସହ ପୁଣି ଥରେ ଆନ୍ଧ୍ରର ନମ୍ବର ଲିଭାଇ ନିଜ ସର୍ଭେ ନମ୍ବର ପକାଇ ଆସିଥିଲେ। ତେବେ ଆନ୍ଧ୍ରର ଅଧିକାରୀମାନେ ୮ ତାରିଖ ସନ୍ଧ୍ୟାରେ ଆସି ଜବରଦସ୍ତି ମାଣିକପାଟଣା ଗ୍ରାମର ୨୨ଟି ଘରେ ପୁଣି ଥରେ ଆନ୍ଧ୍ର ସର୍ଭେ ନମ୍ବର ଲେଖି ଗାଁ ଲୋକଙ୍କୁ ତାଗିଦ କରିଛନ୍ତି। ଏହି ଗ୍ରାମର କେତେଜଣ ଲୋକ ଆନ୍ଧ୍ର ସପକ୍ଷରେ ରହି ଜନଗଣନା କରୁଥିବା କର୍ମଚାରୀଙ୍କୁ ସେହି ତାଲିକାରେ ସେମାନଙ୍କୁ ସାମିଲ ନ କରିବା ପାଇଁ କହିବାରୁ କିଛି ସମୟ ଧରି କର୍ମଚାରୀଙ୍କ ସହ ଯୁକ୍ତିତର୍କ ହେଉଥିବା ଦେଖିବାକୁ ମିଳିଥିଲା।
ଶନିବାର ପୁଣି ରାୟଗଡ ଅତିରିକ୍ତ ତହସିଲଦାର ଓ ରାଜ୍ୟ ଜନଗଣନା କାର୍ଯ୍ୟର ଗଜପତି ଜିଲା ନୋଡାଲ ଅଧିକାରୀ ସୁଜିତ ପ୍ରଧାନ ମାଣିକପାଟଣା ଗ୍ରାମରେ ପହଞ୍ଚତ୍ ସ୍ଥିତି ଅନୁଧ୍ୟାନ କରିବା ସହ ଲୋକଙ୍କୁ ବୁଝାଶୁଝା କରି ଫେରିିଛନ୍ତି। ଅନ୍ୟପକ୍ଷରେ ଆନ୍ଧ୍ର ସପକ୍ଷରେ ଥିବା ଲୋକମାନେ ଦୁଇଟି ରାଜ୍ୟର ସରକାରୀ ସୁବିଧାର ଲାଭ ଉଠାଉଛନ୍ତି। ଓଡ଼ିଶାର ସର୍ଭେରେ ସାମିଲ ହେବାକୁ ରାଜି ନ ହୋଇ ବିଶୃଙ୍ଖଳା ପରିସ୍ଥିତି ସୃଷ୍ଟି କରୁଛନ୍ତି ବୋଲି ପୂର୍ବତନ ସରପଞ୍ଚ ହରିବନ୍ଧୁ କାର୍ଜି ଏବଂ ଜନଗଣନାରେ ନିୟୋଜିତ କର୍ମଚାରୀ ନରସିଂହ ନାୟକ କହିଛନ୍ତି। ଏ ସମ୍ପର୍କରେ ଉପଜିଲାପାଳ ପଣ୍ଡା ପ୍ରଶାସନ ପକ୍ଷରୁ ଅସହଯୋଗ କରୁଥିବା ପରିବାର ଲୋକଙ୍କ ସମସ୍ତ ତଥ୍ୟ ସଂଗ୍ରହ କରିବାକୁ ଜନଗଣନା କର୍ମଚାରୀଙ୍କୁ ନିର୍ଦ୍ଦେଶ ଦେଇଛନ୍ତି। ଓଡ଼ିଶାରେ ରହି ଓଡିଶାର ସମସ୍ତ ସରକାରୀ ଯୋଜନାର ଲାଭ ଉଠାଇ ଏବଂ ଆନ୍ଧ୍ର ସରକାରଙ୍କ ପକ୍ଷରୁ ସୁବିଧା ପାଇ ଯେଉଁମାନେ ଆନ୍ଧ୍ରକୁ ସମର୍ଥନ କରି ଓଡିଶା ଜନଗଣନା କାର୍ଯ୍ୟରେ ବାଧା ସୃଷ୍ଟି କରୁଛନ୍ତି ସେମାନଙ୍କ ବିରୋଧରେ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ଉପଜିଲାପାଳ କହିଛନ୍ତି। ସୂଚନାଯୋଗ୍ୟ, ପୂର୍ବରୁ ଏହି ଅଞ୍ଚଳ ସୀମା ବିବାଦକୁ ନେଇ ଚର୍ଚ୍ଚାରେ ରହିଆସିଛି। ୭ଥର ମିଳିତ ଭାବେ ଆନ୍ଧ୍ର ଓଡ଼ିଶା ସର୍ଭେ ହୋଇଛି। ପୂର୍ବ ସର୍ଭେ ଅନୁସାରେ ଏହି ଅଞ୍ଚଳ ଓଡ଼ିଶାର ବୋଲି ନିର୍ଦ୍ଧାରିତ ହୋଇଥିବା ସତ୍ତ୍ୱେ ଆନ୍ଧ୍ରର ଏଭଳି କାର୍ଯ୍ୟ ସାଧାରଣରେ ଅସନ୍ତୋଷ ସୃଷ୍ଟି କରିଛି। ଆଗକୁ ପଞ୍ଚାୟତ ନିର୍ବାଚନ ରହିଥିବାରୁ ଏହି ସମସ୍ୟାର ସମାଧାନ ନ ହେଲେ ସେତେବେଳେ ପରିସ୍ଥିତି ଉଗ୍ରରୂପ ନେଇପାରେ ବୋଲି ଆଲୋଚନା ହେଉଛି।
