ଭଣ୍ଡାରିପୋଖରୀ,୧୧।୨(ଡି.ଏନ.ଏ.): ପଞ୍ଚାୟତ ନିର୍ବାଚନ ଯେତେ ପାଖେଇ ଆସୁଛି, ପ୍ରାର୍ଥୀମାନେ ଭୋଟ୍ ପାଇଁ ଦୁଆର ଦୁଆର ବୁଲି ପ୍ରଚାରକୁ ସେତେ ସରଗରମ କରୁଛନ୍ତି। ଭଦ୍ରକ ଜିଲା ଭଣ୍ଡାରିପୋଖରୀ ବ୍ଲକର ଷୋଳମପୁର ପଞ୍ଚାୟତରେ ସରପଞ୍ଚ ଓ ସମିତିସଭ୍ୟ ପାଇଁ ତ୍ରିମୁଖୀ ପ୍ରତିଦ୍ୱନ୍ଦ୍ୱିତା ହେଉଛି। ବିଜେଡିର ଅସନ୍ତୁଷ୍ଟ ତଥା ପୂର୍ବତନ ଯୁବ ସଭାପତି ସୁରଥ ଦାସ ସ୍ବାଧୀନ ପ୍ରାର୍ଥୀ ଭାବେ ମଇଦାନକୁ ଓହ୍ଲାଇଥିବା ବେଳେ ତାଙ୍କ ସହ ପ୍ରତିଦ୍ୱନ୍ଦ୍ୱିତା କରୁଛନ୍ତି ବିଜେଡି ସମର୍ଥିତ ପ୍ରାର୍ଥୀ ପରମାନନ୍ଦ ନାୟକ ଓ ଭାଜପା ସମର୍ଥିତ ପ୍ରାର୍ଥୀ ଅବିନାଶ ନାୟକ। ପଞ୍ଚାୟତରେ ବିଜେଡି ସଙ୍ଗଠନକୁ ଦୀର୍ଘଦିନ ଧରି ସମ୍ଭାଳି ରଖିଥିବା ପଞ୍ଚାୟତସ୍ତରୀୟ ନେତାଙ୍କୁ ଦଳ ପ୍ରତ୍ୟାଖ୍ୟାନ କରି ପରମାନନ୍ଦଙ୍କୁ ମନୋନୀତ କରିବାରୁ ସୁରଥ କଂଗ୍ରେସ ସହ ବୁଝାମଣା କରି ସରପଞ୍ଚ ପ୍ରାର୍ଥୀ ହୋଇଛନ୍ତି। ସେହିପରି ଅଣସଂରକ୍ଷିତ ମହିଳାଙ୍କ ପାଇଁ ଉଦ୍ଦିଷ୍ଟ ସମିତିସଭ୍ୟ ପଦ ଲାଗି କଂଗ୍ରେସ ସମର୍ଥିତ ପ୍ରାର୍ଥୀ ଭାବେ ମାମିଲତା ଜେନା, ବିଜେଡି ସମର୍ଥିତ ପ୍ରାର୍ଥୀ ରଶ୍ମିତା ଜେନା ଓ ଭାଜପା ସମର୍ଥିତ ପ୍ରାର୍ଥୀ ଭାବେ ସୁଚିସ୍ମିତା ପଣ୍ଡା ଛିଡ଼ା ହୋଇଛନ୍ତି। ପ୍ରାର୍ଥୀମାନେ ପ୍ରଚାରକୁ ଜୋରଦାର କରି ଭୋଟରଙ୍କ ପାଖକୁ ଯାଇ ନିଜ ସପକ୍ଷରେ ମନାଇବାରେ ଲାଗିପଡ଼ିଛନ୍ତି।
