ବରଗଡ଼,୮।୫(ପ୍ରେମାନନ୍ଦ ଖମାରୀ):ବରଗଡ଼ ମୁଖ୍ୟ କେନାଲରେ ଆଉ ମାତ୍ର ୩ଦିନ କେନାଲ ପାଣି ଆସିବ। ଆସନ୍ତା ୧୧ତାରିଖରୁ ଏହି କେନାଲରେ ପାଣି ଯୋଗାଣ ବନ୍ଦ ରହିବ। ବରଗଡ଼ ଜଳସେଚନ ବିଭାଜନ ପକ୍ଷରୁ ଏହା ଘୋଷଣା କରାଯିବା ପରେ କେନାଲ ତଳମୁଣ୍ଡରେ ରହିଥିବା ଚାଷୀଙ୍କୁ ସେମାନଙ୍କ ଧାନ ଫସଲ ରକ୍ଷା ଚିନ୍ତା ଘାରିଛି। ଏହାସହିତ ଜିଲାରେ ସମ୍ପୃକ୍ତ ଅଞ୍ଚଳର ଚାଷୀଙ୍କ ମଧ୍ୟରେ ଅସନ୍ତୋଷ ବଢ଼ିବାରେ ଲାଗିଛି। ଏହାର ପ୍ରତିବାଦରେ ଗୁରୁବାର ସଂଯୁକ୍ତ କୃଷକ ସଙ୍ଗଠନ ନେତୃତ୍ୱରେ ଜିଲାର ଭେଡ଼େନ ବ୍ଲକ ଅଞ୍ଚଳର ଚାଷୀମାନେ ମୁଖ୍ୟ ଜିଲା କୃଷି ଅଧିକାରୀଙ୍କ କାର୍ଯ୍ୟାଳୟ ଆଗରେ ଧାରଣା ଦେଇଥିବାବେଳେ ଜଳସେଚନ ବିଭାଜନ ଅଧୀକ୍ଷଣ ଯନ୍ତ୍ରୀ ମଦନ ମୋହନ ସେଠୀଙ୍କୁ ଭେଟିଥିଲେ। ସେହିପରି ବରପାଲି ବ୍ଲକ ଅଞ୍ଚଳର ଚାଷୀମାନେ ମଧ୍ୟ ଜଳସେଚନ ବିଭାଜନ ଅଧୀକ୍ଷଣ ଯନ୍ତ୍ରୀ ସେଠୀଙ୍କୁ ପୃଥକ୍ ଭାବେ ଭେଟି ଏକ ଦାବିପତ୍ର ପ୍ରଦାନ କରିଥିଲେ। ବର୍ତ୍ତମାନ ଧାନ ଫସଲ ଗର୍ଭଣୀ ଅବସ୍ଥାରେ ରହିଥିବାରୁ ବରଗଡ଼ ମୁଖ୍ୟ କେନାଲରେ ଆସନ୍ତା ୨୦ତାରିଖ ପର୍ଯ୍ୟନ୍ତ ପାଣି ଯୋଗାଣ ଅବ୍ୟାହତ ରଖିବାକୁ ଚାଷୀମାନେ ଦାବି କରିଛନ୍ତି।
ସୂଚନା ଅନୁଯାୟୀ, ହୀରାକୁଦ ଜଳଭଣ୍ଡାରରୁ ବରଗଡ଼ ମୁଖ୍ୟ କେନାଲରେ ପାଣି ଯୋଗାଣ ହୋଇଥାଏ। ଏହି କେନାଲ ପାଣିରେ ବରଗଡ଼ ସମେତ ପଡ଼ୋଶୀ ସୁବର୍ଣ୍ଣପୁର ଏବଂ ବଲାଙ୍ଗୀର ଜିଲାର ଆଂଶିକ ଅଞ୍ଚଳର ଚାଷୀମାନେ ଉପକୃତ ହୋଇଥାନ୍ତି। କେନାଲ ପାଣି ବ୍ୟବହାର କରି ସେମାନେ ଉଭୟ ଖରିଫ ଓ ରବି ଧାନ ଫସଲ କରିଥାନ୍ତି। ତେବେ ବରଗଡ଼ ଜିଲାର ବିଭିନ୍ନ ଅଞ୍ଚଳରେ ବର୍ତ୍ତମାନ ରବିଧାନ ଫସଲ ଅମଳ ଆରମ୍ଭ ହୋଇଥିଲେ ମଧ୍ୟ କେନାଲ ତଳମୁଣ୍ଡରେ ରହିଥିବା ଚାଷୀଙ୍କ ଧାନ ଏପର୍ଯ୍ୟନ୍ତ ଅମଳକ୍ଷମ ଅବସ୍ଥାକୁ ଆସିନାହିଁ। ବରଗଡ଼ ଜିଲାର ମୁଖ୍ୟତଃ ଭେଡ଼େନ ଓ ବରପାଲି ବ୍ଲକ ସମେତ ବିଭିନ୍ନ ଅଞ୍ଚଳର ଧାନ ଫସଲ ଗର୍ଭଣୀ ଅବସ୍ଥାରେ ରହିଛି। ଏହି ସମୟରେ ଫସଲକୁ ପର୍ଯ୍ୟାପ୍ତ ପାଣି ଆବଶ୍ୟକତା ରହିଛି। ବରଗଡ଼ ଜଳସେଚନ ବିଭାଜନ ପ୍ରଥମେ ଗତ ମାସ ୩୦ତାରିଖ ସନ୍ଧ୍ୟାରୁ ବରଗଡ଼ ମୁଖ୍ୟ କେନାଲରେ ପାଣି ଯୋଗାଣ ବନ୍ଦ ରଖିବାକୁ ନିଷ୍ପତ୍ତି ନେଇଥିଲା। ମାତ୍ର ବିଭିନ୍ନ ଚାଷୀ ସଙ୍ଗଠନର ଦାବି ପରେ କୃଷି ବିଭାଗର ରିପୋର୍ଟକୁ ଆଧାର କରି କେନାଲରେ ପାଣି ଛଡ଼ାଯିବା ଅବଧିକୁ ଆସନ୍ତା ୧୦ତାରିଖ ପର୍ଯ୍ୟନ୍ତ ବୃଦ୍ଧି କରାଯାଇଛି। କିନ୍ତୁ ଗତବର୍ଷ କେନାଲ ପାଣି ବିଳମ୍ବରେ ଛଡ଼ାଯିବା ସହିତ ଜଟିଳ ଧାନବିକ୍ରି ପଞ୍ଜୀକରଣ ନୀତି ଯୋଗୁ ଚାଷୀମାନଙ୍କ ରବି ଚାଷକାର୍ଯ୍ୟ ମଧ୍ୟ ବିଳମ୍ବିତ ହୋଇଥିଲା। ସେହିପରି କେନାଲ ତଳମୁଣ୍ଡକୁ ପାଣି ପହଞ୍ଚତ୍ବା ବିଳମ୍ବ ହେବା ସହିତ ପର୍ଯ୍ୟାପ୍ତ ପାଣି ପହଞ୍ଚି ପାରୁ ନ ଥିବା ଯୋଗୁ ସମ୍ପୃକ୍ତ ଅଞ୍ଚଳର ଚାଷକାର୍ଯ୍ୟ ଆରମ୍ଭ ଆହୁରି ବିଳମ୍ବ ହୋଇପଡ଼େ। ଏହି ଦୃଷ୍ଟିରୁ କେନାଲ ତଳମୁଣ୍ଡରେ ରହିଥିବା ଚାଷୀଙ୍କ ଧାନ ଏପର୍ଯ୍ୟନ୍ତ ଅମଳଭ ଅବସ୍ଥାକୁ ଆସିବା ତ ଦୂରର କଥା, ଅନେକ ସ୍ଥାନରେ ଫସଲ ଗର୍ଭଣୀ ଅବସ୍ଥାରେ ରହିଛି। ଫଳରେ ଆସନ୍ତା ୧୧ତାରିଖରୁ କେନାଲରେ ପାଣି ଯୋଗାଣ ବନ୍ଦ କରି ଦିଆଗଲେ ସେମାନଙ୍କ ଧାନ ଫସଲ ସମ୍ପୂର୍ଣ୍ଣ ଧୂଳିସାତ୍ ହୋଇଯିବ ବୋଲି ଚାଷୀମାନେ ଅଭିଯୋଗ କରିଛନ୍ତି। ଫଳରେ କେନାଲ ପାଣି ଯୋଗାଣ ଅବଧି ଆସନ୍ତା ୨୦ତାରିଖ ପର୍ଯ୍ୟନ୍ତ ବୃଦ୍ଧି ଦାବିରେ ସଂଯୁକ୍ତ କୃଷକ ସଙ୍ଗଠନ ନେତୃତ୍ୱରେ ଚାଷୀମାନେ ମୁଖ୍ୟ ଜିଲା କୃଷି ଅଧିକାରୀଙ୍କ କାର୍ଯ୍ୟାଳୟ ସମ୍ମୁଖରେ ଧାରଣା ଦେଇଥିଲେ।
ମୁଖ୍ୟ ଜିଲା କୃଷି ଅଧିକାରୀ ଲୋଚନ ଚନ୍ଦ୍ର ମାଝି ଚାଷୀଙ୍କ ସହିତ ଆଲୋଚନା କରି ଏ ଦିଗରେ ବିହିତ ପଦକ୍ଷେପ ନିଆଯିବ ବୋଲି କହିଥିଲେ। ସେହିପରି ଜଳସେଚନ ବିଭାଜନ ଯନ୍ତ୍ରୀ ମଧ୍ୟ ଜିଲା ପ୍ରଶାସନ ଏବଂ କୃଷି ବିଭାଗ ସହିତ ଆଲୋଚନା କରାଯିବ ଏବଂ ଚାଷୀଙ୍କ ଦାବି ବିଚାରକୁ ନେଇ ବିହିତ କାର୍ଯ୍ୟପନ୍ଥା ଗ୍ରହଣ କରାଯିବ ବୋଲି କହିଥିଲେ। ଧାରଣାରେ ସଂଯୁକ୍ତ କୃଷକ ସଙ୍ଗଠନର ଉପଦେଷ୍ଟା ରମେଶ ମହାପାତ୍ର, ଉପତ୍ନ୍ନ କୁମାର ଭୋଇ, ସୁଦାମ ପାତ୍ର, ସୁରେଶ ନିକାଣ୍ଟି, ପାଣ୍ଡବ କର୍ଣ୍ଣଙ୍କ ସମେତ ଅନେକ ଚାଷୀ ସାମିଲ ହୋଇଥିଲେ। ସେହିପରି ବରପାଲି ବ୍ଲକରୁ ମଧ୍ୟ ଅନେକ ଚାଷୀ ପ୍ରତିନିଧି ଜଳସେଚନ ବିଭାଜନ ଯନ୍ତ୍ରୀଙ୍କୁ ଫେରାଦ ହୋଇ କେନାଲ ପାଣି ଯୋଗାଣ ଅବଧିକୁ ଆସନ୍ତା ୨୦ତାରିଖ ପର୍ଯ୍ୟନ୍ତ ବୃଦ୍ଧି କରିବା ପାଇଁ ଦାବି ଉପସ୍ଥାପନ କରିଥିଲେ।
Dharitri – Odisha’s No.1 Odia Daily
