ପ୍ରତ୍ୟେକ ଦିନ କିଛି ନା କିଛି ଅଜବ ଖବର ପଢ଼ିବାକୁ ଏବଂ ଶୁଣିବାକୁ ମିଳିଥାଏ। ବର୍ତ୍ତମାନ ଏପରି ଖବର ସାମ୍ନାକୁ ଆସିଛି, ଯାହା ବିଷୟରେ ଜାଣି ଆଶ୍ଚର୍ଯ୍ୟ ହେବେ। ଜଣେ ବ୍ୟକ୍ତି ସ୍ତ୍ରୀଙ୍କ ସହ ବୁଲି ଯାଉଥିବା ବେଳେ ଅଧା ରାସ୍ତାରେ ସ୍ତ୍ରୀଙ୍କୁ ଛାଡ଼ି ଭୁଲି ଚାଲିଯାଇଥିଲେ। ଏହି କାରଣରୁ ତାଙ୍କ ସ୍ତ୍ରୀଙ୍କୁ ପ୍ରାୟ ୨୦ କିଲୋମିଟର ଚାଲିବାକୁ ପଡ଼ିଥିଲା।
ଏପରି ଅଜବ ମାମଲା ଥାଇଲାଣ୍ଡରେ। ୫୫ ବର୍ଷୀୟ ବୁଣ୍ଟମ ଚାଇମୁନ ତାଙ୍କ ୪୭ ବର୍ଷୀୟା ସ୍ତ୍ରୀ ଇମୁନା ଚାଇମୁନ୍ଙ୍କ ସହ ଛୁଟିରେ ଯାଇଥିଲେ। ରବିବାର ସେ ନିଜ ସହରକୁ ଯାଇଥିଲେ। ଦୁହେଁ ଏକାଠି ଭଲ ସମୟ କଟାଇବା ପରେ ଫେରୁଥିଲେ, କିନ୍ତୁ ବୁଣ୍ଟମଙ୍କୁ ରାସ୍ତାରେ ଟଏଲେଟ୍ ଲାଗିଲା।
ଏଥିପାଇଁ ସେ କାର୍କୁ ରାସ୍ତା କଡ଼ରେ ରଖିଥିଲେ। ଚାରିପାଖରେ କୌଣସି ସର୍ବସାଧାରଣ ଶୌଚାଳୟ ନ ଥିଲା। ତେଣୁ ସେ ଟିକେ ଆଗକୁ ଯାଇଥିଲେ। ଏହି କାରଣରୁ ଇମୁନା କାର୍ରୁ ଓହ୍ଲାଇ ଜଙ୍ଗଲ ଆଡ଼କୁ ବୁଲି ପଳାଇଥିଲେ। ଯାହାକି ତାଙ୍କ ସ୍ବାମୀ ଦେଖି ପାରି ନ ଥିଲେ। ସେ ଭାବିଥିଲେ ଇମୁନା ସିଟ୍ରେ ବସିଛନ୍ତି। ତେଣୁ ସେ ଟଏଲେଟ୍ ଆସିବା ପରେ କାର୍ ଚଳାଇ ଆଗକୁ ଚାଲିଯାଇଥିଲେ।
ଯେତେବେଳେ ଇମୁନା ଫେରିଲେ ସେ ତାଙ୍କ ସ୍ବାମୀ କିମ୍ବା କାର୍ କାହାକୁ ଦେଖିବାକୁ ପାଇ ନ ଥିଲେ। ସବୁଠାରୁ ଆଶ୍ଚର୍ଯ୍ୟଜନକ କଥା ହେଲା ଇମୁନାଙ୍କ ପାଖରେ ମୋବାଇଲ କିମ୍ବା ପର୍ସ ନ ଥିଲା। ଅନ୍ଧାର ହୋଇଯାଇଥିଲା ଯେଉଁଥିପାଇଁ ମହିଳା ଡରି ଯାଇଥିଲେ। ଏହି କାରଣରୁ ସେ ସାହାଯ୍ୟ ମାଗିବାକୁ ସ୍ଥିର କଲେ ଏବଂ ଚାଲିଚାଲି ଆଗକୁ ବଢ଼ିଲେ।
ଏମିତି ସେ ପ୍ରାୟ ୨୦ କିଲୋମିଟର ଚାଲିଥିଲେ। ତା’ ପରଦିନ ସକାଳ ୫ଟାରେ କାବିନବୁରୀ ଜିଲାର ସ୍ଥାନୀୟ ପୋଲିସ ଷ୍ଟେଶନରେ ପହଞ୍ଚି ଏ ସମ୍ପର୍କରେ ସୂଚନା ଦେଇଥିଲେ। ଏପରିକି ସେ ତାଙ୍କ ସ୍ବାମୀଙ୍କ ମୋବାଇଲ ନମ୍ବରକୁ ମଧ୍ୟ ମନେ ରଖି ନ ଥିଲେ। କାର୍ରେ ମୋବାଇଲ ରହିଯାଇଥିଲା। ଏହା ପରେ ମହିଳା ଇମୁନା ନିଜ ଫୋନ ନମ୍ବରରେ ଅନେକ ଥର ପୋଲିସକୁ ଫୋନ୍ କରିଥିଲେ ମଧ୍ୟ ସ୍ବାମୀଙ୍କୁ କଲ୍ କରି ପାରି ନ ଥିଲେ। ତେବେ ପୋଲିସର ସାହାଯ୍ୟରେ ସେ ସକାଳ ୮ଟାରେ ତାଙ୍କ ସ୍ବାମୀଙ୍କ ସହ ଯୋଗାଯୋଗ କରିବାରେ ସକ୍ଷମ ହୋଇଥିଲେ।
ଏକ ରିପୋର୍ଟ ଅନୁଯାୟୀ, ଏହା ପରେ ବୁଣ୍ଟମ ଅନୁଭବ କଲେ ଯେ, ସେ ତାଙ୍କ ସ୍ତ୍ରୀଙ୍କୁ ଛାଡ଼ି ବହୁତ ଦୂରକୁ ଚାଲିଆସିଛନ୍ତି। ପରେ ସେ ସ୍ତ୍ରୀଙ୍କୁ ଫେରାଇ ଆଣିବାକୁ ଆସିଥିଲେ। ବୁଣ୍ଟମ ତାଙ୍କ କାର୍ଯ୍ୟରେ ଅନୁତାପ କରି ତାଙ୍କ ସ୍ତ୍ରୀଙ୍କୁ କ୍ଷମାପ୍ରାର୍ଥନା କରିଥିଲେ।
