ନୂଆଦିଲ୍ଲୀ, ୨୨ା୧୨ (ପି.ଟି.)-କରୋନା ଭାଇରସ୍ ବ୍ରେକ୍ ପରେ ପ୍ରଥମଥର ଭାରତର ଟପ୍ ବ୍ୟାଡ୍ମିଣ୍ଟନ ଖେଳାଳି ପି.ଭି. ସିନ୍ଧୁ ଓ ସାଇନା ନେହ୍ବାଲଙ୍କ ଖେଳ ଦେଖିବାକୁ ମିଳିବ। ସମ୍ମାନଜନକ ବିଡବ୍ଲ୍ୟୁଏଫ୍ ଓ୍ବାଲ୍ଡ ଟୁର ଫାଇନାଲ୍ସ ସମେତ ବ୍ୟାଙ୍କକ୍ରେ ଖେଳାଯିବାକୁଥିବା ୩ଟିି ଟୁର୍ନାମେଣ୍ଟରେ ସେମାନେ ଅଂଶଗ୍ରହଣ କରିବେ। ଅଲିମ୍ପିକ ଯୋଗ୍ୟତାକୁ ନଜରରେ ରଖି ବ୍ୟାଡମିଣ୍ଟନ ଆସୋସିଏଶନ ଅପ୍ ଇଣ୍ଡିଆ (ବାଇ) ଜାନୁୟାରୀରେ ହେବାକୁଥିବା ଏହି ୩ଟି ଟୁର୍ନାମେଣ୍ଟ ଲାଗି ୮ଜଣିଆ ଶକ୍ତିଶାଳୀ ଦଳ ଘୋଷଣା କରିଛି। ଟିମ୍ରେ ସିନ୍ଧୁ, ସାଇନାଙ୍କ ବ୍ୟତୀତ ବି. ସାଇ ପ୍ରଣୀଥ, କିଡାମ୍ବି ଶ୍ରୀକାନ୍ତ, ସାତ୍ତ୍ୱିକ ସାଇରାଜ ରାଙ୍କିରେଡ୍ଡୀ, ଚିରାଗ ଶେଟ୍ଟି, ଅଶ୍ୱିନ ପୋନାପ୍ପା ଏବଂ ଏନ୍ ସିକ୍କି ରେଡ୍ଡୀ। ଜାନୁୟାରୀ ୧୨ରୁ ୧୭ ପର୍ଯ୍ୟନ୍ତ ହେବାକୁଥିବା ୟୋନେକ୍ସ ଥାଇଲାଣ୍ଡ ଓପନ୍ରେ ସେମାନେ ସେମାନଙ୍କ ଅଭିଯାନ ଆରମ୍ଭ କରିବେ। ଏହାପରେ ଟୟୋଟା ଥାଇଲାଣ୍ଡ ଓପନ୍ (ଜାନୁୟାରୀ ୧୯ରୁ ୨୪) ଏବଂ ଜାନୁୟାରୀ ୨୭ରୁ ୩୧ ସମ୍ମାନଜନକ ଏଚ୍ଏସ୍ବିସି ବିଡ୍ବଲ୍ୟୁଏଫ୍ ଓ୍ବାଲର୍ଡ ଟୁର୍ ଫାଇନାଲ୍ସ ଅନୁଷ୍ଠିତ ହେବ। ମାର୍ଚ୍ଚରେ କରୋନା ଭାଇରସ ଦେଖାଦେବାପରଠାରୁ ସମଗ୍ର ବିଶ୍ୱରେ କେତେକ କ୍ରୀଡ଼ା ଇଭେଣ୍ଟକୁ ବାତିଲ ଅବା ସ୍ଥଗିତ ରଖିବାକୁ ପଡ଼ିଥିଲା। ଶ୍ରୀକାନ୍ତଙ୍କୁ ଛାଡ଼ିଦେଲେ କୌଣସି ଅନ୍ତର୍ଜାତୀୟ ଟୁର୍ନାମେଣ୍ଟରେ ଭାରତର ଟପ୍ ଖେଳାଳିମାନେ ପ୍ରଥମଥର ଭାଗନେବାକୁ ଯାଉଛନ୍ତି। ପୂର୍ବତନ ବିଶ୍ୱର ନମ୍ବର ଓ୍ବାନ ଖେଳାଳି ଶ୍ରୀକାନ୍ତ ଅକ୍ଟୋବରରେ ଡେନ୍ମାର୍କ ଓପନ୍ ଖେଳିଥିଲେ।
