ବାଲେଶ୍ୱର, ୧୫।୧୧(ବାଞ୍ଛାନିଧି ଦେ):ବାଲେଶ୍ୱର ସାଇବର ଥାନା ପୋଲିସ ହାତରେ ବଣ୍ଟି-ବବ୍ଲି ଯୋଡ଼ି ଓ ସେମାନଙ୍କ ଗ୍ୟାଙ୍ଗ ଧରାପଡ଼ିଛନ୍ତି। ଏହି ଗ୍ୟାଙ୍ଗ ସେଲିବ୍ରିଟିଙ୍କ ଫେକ୍ ଆଇଡି ଦ୍ୱାରା ପ୍ରଥମେ ପ୍ରେମ ସମ୍ପର୍କ ଗଢୁଥିଲେ। ପରେ ବିଭିନ୍ନ ବାହାନା କରି ଲୁଟୁ ଥିଲେ ଟଙ୍କା। ଏପରି କି ଧରାପଡ଼ିଲେ ଜୀବନରୁ ମାରିଦେବାକୁ ଧମକ୍ ଦେଉଥିଲେ। ଏହିପରି ଏକ ଘଟଣା ଦେଖିବାକୁ ମିଳିଛି ବାଲେଶ୍ୱର ଜିଲାରେ। ଚାନ୍ଦିପୁର ଥାନା ଅଞ୍ଚଳର ଜଣେ ଯୁବତୀ ଏହି ସାଇବର ଠକଙ୍କ ଶିକାର ହୋଇ ସାଇବର ଥାନାରେ ଲିଖିତ ଅଭିଯୋଗ କରିଥିଲେ। ବୁଧବାର ସାଇବର ଥାନା ପୋଲିସ ଏକ ମାମଲା (ନଂ. ୪୮/୨୪) ରୁଜୁ କରି ତଦନ୍ତ ଆରମ୍ଭ କରିଥିଲା।
ଘଟଣାରୁ ପ୍ରକାଶ, ରିଲ୍ସ ଅଭିନେତା ଚିକୁ ଦାଶଙ୍କ ଫଟୋ ଲଗାଇ ଫେସବୁକ୍ରେ ଫେକ୍ ଆକାଉଣ୍ଟ ଖୋଲିଥିଲେ ବାଲେଶ୍ୱର ସହର ନୂଆବଜାର ଅଞ୍ଚଳର ଶପଥ ଦେ। ପରେ ଅଭିଯୋଗକାରିଣୀ ଯୁବତୀଙ୍କ ସହ ଫେସବୁକ୍ ମାଧ୍ୟମରେ ସମ୍ପର୍କ ବଢ଼ାଇବା ସହ ବିଶ୍ୱାସ ଜନ୍ମାଇଥିଲେ। ଏହାପରେ କେତେବେଳେ ନିଜ ବାଇକ୍ ଖରାପ କହି ଟଙ୍କା ମାଗିଲେ, ତ କେତେବେଳେ ବାପାଙ୍କୁ କ୍ୟାନ୍ସର ହୋଇଥିବା କହି ଟଙ୍କା ମାଗିଥିଲେ। ଏହିଭଳି ମୋଟ୍ ୨ଲକ୍ଷ ୫୭ହଜାର ୮୯୯ ଟଙ୍କା ଲୁଟିଥିବା ଏତଲାରେ ଦର୍ଶାଯାଇଛି। ଯୁବତୀଜଣକ ଟଙ୍କା ଫେରସ୍ତ ମାଗିବାରୁ ତାଙ୍କୁ ହତ୍ୟା ଧମକ ଦିଆଯାଇଥିଲା। ଶପଥ ଦେ, ଭାଇ ରଜତ ଦେ ଓ ରଜତଙ୍କ ଶଳା ମନୋଜ ମହାନ୍ତିଙ୍କ ଆକାଉଣ୍ଟକୁ ଉକ୍ତ ଟଙ୍କା ଟ୍ରାନ୍ସଫର ହୋଇଥିବା ଜାଣିବା ପରେ ସେ ସେମାନଙ୍କୁ ଫୋନ୍ କରି ଟଙ୍କା ଫେରସ୍ତ ମାଗିଥିଲେ। ସମସ୍ତେ ମିଶି ଯୁବତୀଙ୍କୁ ହତ୍ୟା ଧମକ ଦେବା ସହ ବ୍ଲାକମେଲ୍ କରିଥିଲେ। ମୋବାଇଲ ଟ୍ରାକିଂ କରାଯାଇ ଏସ୍ପିଙ୍କ ନିର୍ଦ୍ଦେଶକ୍ରମେ ଗୁରୁବାର ତିନୋଟି ଟିମ୍ ସହରର ଏକ ହୋଟେଲରେ ଚଢ଼ାଉ କରି ଶପଥ ଓ ତାଙ୍କ ବାନ୍ଧବୀ, ଭାଇ ରଜତ ଓ ତାଙ୍କ ଶଳାଙ୍କୁ ହେପାଜତକୁ ଆଣିଥିଲେ। ସେମାନଙ୍କୁ ଅଟକ ରଖାଯାଇ ଏକ ଗୁପ୍ତ ସ୍ଥାନରେ ପୋଲିସ ପକ୍ଷରୁ ପଚରାଉଚରା ଜାରି ରହିଛି।
ତେବେ ଶପଥ ଫେସବୁକ୍ ମାଧ୍ୟମରେ ରାଜ୍ୟର ବିଭିନ୍ନ ଅଞ୍ଚଳର ଝିଅମାନଙ୍କ ସହ ପ୍ରେମ ସମ୍ପର୍କ ବଢ଼ାଇ ଲକ୍ଷ ଲକ୍ଷ ଟଙ୍କା ଲୁଟ୍ ହୋଇଥିବା ଅଭିଯୋଗ ହୋଇଛି। ତାଙ୍କ ବାନ୍ଧବୀ ମଧ୍ୟ ସମାନ ଭାବେ ପୁଅମାନଙ୍କୁ ପ୍ରେମ ଜାଲରେ ଫସାଇ ଟଙ୍କା ଲୁଟ୍ କରୁଥିଲେ। ଏହାର ଶିକାର ହୋଇଥିବା ଅନେକ ଯୁବତୀଯୁବକ ଭୁବନେଶ୍ୱର ସମେତ ବିଭିନ୍ନ ଥାନାରେ ଏତଲା ଦେଇଥିବା ଜଣାପଡ଼ିଛି।
