ହାଟଡିହୀ/କେନ୍ଦୁଝର,୨୮।୬(ଶୁଭକାନ୍ତ ନାୟକ/ନରେଶ ଚନ୍ଦ୍ର ପଟ୍ଟନାୟକ): ବ୍ରାଉନସୁଗାର ଜବତ ଘଟଣାରେ ଗିରଫ ହୋଇ କୋର୍ଟ ଚାଲାଣ ହୋଇଥିବା ୪ ଜଣ ଅଭିଯୁକ୍ତଙ୍କ ମଧ୍ୟରୁ ୩ ଜଣ ଜେଲ ହାଜତକୁ ଯାଇଛନ୍ତି । କିନ୍ତୁ ଜଣେ ମହିଳା ଅଭିଯୁକ୍ତ ଜେଲ ହାଜତ ଦଣ୍ଡରୁ ବାଦ ପଡିଛନ୍ତି । କାହିଁକି ଏବଂ କେଉଁ ପରିସ୍ଥିତିରେ ଏପରି ଘଟଣା ଘଟିଛି ତାହା ଅଦ୍ୟାବଧି ସ୍ପଷ୍ଟ ହୋଇ ପାରିନି । ଅପରପକ୍ଷେ ରାତିରେ ମହିଳାଙ୍କୁ ଅଟକ ରଖାଯାଇ ପାରିବନି ବୋଲି ନିୟମ ଆଧାର ମହିଳା ଜଣଙ୍କୁ ଛାଡି ଦିଆଯାଇଥିବା କୁହାଯାଉଛି । ଯାହାକି ଏବେ ମୁଖ୍ୟ ଆଲୋଚନାର ବିଷୟ ସାଜିଛି ।
ସୂଚନା ଯୋଗ୍ୟ, କେନ୍ଦୁଝର ଜିଲା ନନ୍ଦିପଦା ଥାନା ଅଞ୍ଚଳରୁ ପୋଲିସ ଗତ ଶନିବାର ୧୨ ଗ୍ରାମ ବ୍ରାଉନସୁଗାର ଜବତ କରି ଏଥିରେ ସମ୍ପୃକ୍ତ ୪ ଜଣଙ୍କୁ ଗତ ଶନିବାର ଗିରଫ କରିଥିଲା । ସେହି ଶନିବାର ଦିନ ଅଭିଯୁକ୍ତମାନଙ୍କୁ କେନ୍ଦୁଝର ଏଡିଜେ କୋର୍ଟକୁ ଚାଲାଣ କରାଯାଇଥିଲା ।
ଗିରଫ ମଧ୍ୟରେ ଜଣେ ମହିଳା ଥିଲେ । ଗିରଫ ବ୍ୟକ୍ତିମାନେ ନନ୍ଦିପଦା ଥାନା ହାଟଡିହୀ ଗ୍ରାମର ଭାଗିରଥି ପଣ୍ଡା (୩୦ ବର୍ଷ), ଜଳକଳଙ୍ଗ ଗ୍ରାମର ଜଗନ୍ନାଥ ମଲ୍ଲିକ (୨୭ ବର୍ଷ), ଆନନ୍ଦପୁର ଥାନା ଫକୀରପୁର ଗ୍ରାମର ଦୀପ୍ତି ରଞ୍ଜନ ଜେନା (୨୭ ବର୍ଷ) ଏବଂ ବାଲେଶ୍ୱର ଜିଲା ଖଇରା ଥାନା କୁପାରୀ ଗ୍ରାମର ନିନିଲତା ମୁଖି (୬୧ ବର୍ଷ) ଅଟନ୍ତି । ପୋଲିସ ମାମଲା ନଂ ୨୭୪/୨୦୨୬ ପଞ୍ଜିକରଣ କରିଥିଲା। ଆନନ୍ଦପୁର ଉପଖଣ୍ଡରେ ଧଳା ଜହର କାୟା ବିସ୍ତାର କରୁଥିବା ବେଳେ ମହିଳା ଜଣକ ଜେଲ ହାଜତ ଦଣ୍ଡରୁ ବାଦ ପଡିବା ଘଟଣା ଏବେ ଗୁରୁତ୍ୱପୂର୍ଣ ପ୍ରସଙ୍ଗ ସାଜିଛି ।
