ବଞ୍ଚୋ/ହାଟଡିହୀ/ଛେନାପଦୀ,୨୭ା୬(ପ୍ରଦୋଷ ବିଶ୍ୱାଳ/ଶୁଭକାନ୍ତ ନାୟକ/ନିରାକାର ପରିଡ଼ା): କେନ୍ଦୁଝର ଜିଲା ନନ୍ଦିପଦା ପୋଲିସ ଏବଂ ଆନନ୍ଦପୁର ଏସ୍ଡିପିଓ ଚଢ଼ାଉ କରି ୧୨ ଗ୍ରାମ ବ୍ରାଉନସୁଗାର ଜବତ କରିବା ସହ ଏଥିରେ ସମ୍ପୃକ୍ତ ୪ ଜଣଙ୍କୁ ଶନିବାର ଗିରଫ କରିଛି। ଗିରଫ ମଧ୍ୟରେ ଜଣେ ମହିଳା ଅଛନ୍ତି। ଗିରଫ ବ୍ୟକ୍ତିମାନେ ନନ୍ଦିପଦା ଥାନା ହାଟଡିହୀ ଗ୍ରାମର ଭାଗିରଥୀ ପଣ୍ଡା (୩୦ ବର୍ଷ), ଜଳକଳଙ୍ଗ ଗ୍ରାମର ଜଗନ୍ନାଥ ମଲ୍ଲିକ (୨୭ ବର୍ଷ), ଆନନ୍ଦପୁର ଥାନା ଫକୀରପୁର ଗ୍ରାମର ଜ୍ୟୋତି ରଞ୍ଜନ ଜେନା ଓରଫ ଦୀପ୍ତି ରଞ୍ଜନ (୨୭ ବର୍ଷ) ଏବଂ ବାଲେଶ୍ୱର ଜିଲା ଖଇରା ଥାନା କୁପାରୀ ଗ୍ରାମର ମିନତୀଲତା ମୁଖୀ (୬୧ ବର୍ଷ) ଅଟନ୍ତି। ଅଭିଯୁକ୍ତମାନଙ୍କୁ ଗିରଫ କରାଯାଇ ଶନିବାର କୋର୍ଟ ଚାଲାଣ କରାଯାଇଥିବା ତଦନ୍ତକାରୀ ଅଧିକାରୀ ପ୍ରବୋଧ ଚନ୍ଦ୍ର ମହାନ୍ତି କହିଛନ୍ତି।
ସୂଚନାଯୋଗ୍ୟ, କୌଣସି ସୂତ୍ରରୁ ଖବର ପାଇ ପୋଲିସ ଚଢ଼ାଉ ଆରମ୍ଭ କରିଥିଲା। ଏହି ଘଟଣାରେ ପୋଲିସ କେସ୍ ନଂ ୨୭୪/୨୦୨୬ ପଞ୍ଜୀକରଣ କରିଛି। ବ୍ରାଉନସୁଗାର କେଉଁଠୁ ଏଠାକୁ ଆସୁଛି ଏବଂ ଆଉ କେଉଁ ମାନେ ଏଥିରେ ସମ୍ପୃକ୍ତ ଅଛନ୍ତି, ସେ ନେଇ ତଦନ୍ତ ଚାଲିଥିବା ଥାନାଧିକାରୀ ଧର୍ମେନ୍ଦ୍ର ଶାନ୍ତି ଏବଂ ଏସ୍ଡିପିଓ କମଳ କୁମାର ପଣ୍ଡା କହିଛନ୍ତି।
ସେମାନଙ୍କଠାରୁ ଗୋଟେ ବାଇକ୍, ଗୋଟେ ମୋବାଇଲ ଏବଂ ୧ ହଜାର ୧୫୦ ଟଙ୍କା ଜବତ କରାଯାଇଛି। ନିନିଲତାର ଜ୍ୱାଇଁ ଜଳକଳଙ୍ଗ ଗ୍ରାମର ରାଜୁ ମୁଖୀ ଏବଂ ତାଙ୍କ ସମର୍ଥକ ଅଭିଯୁକ୍ତଙ୍କୁ ଖସାଇବାକୁ ଚେଷ୍ଟା କରୁଥିବା ବେଳେ ପୋଲିସ ଅଭିଯୁକ୍ତମାନଙ୍କୁ ଧରିବାରେ ସକ୍ଷମ ହୋଇଥିବା କହିଛି।
