ମାମାଲ୍ଲାପୁରମ, ୧୦ା୮(ପି.ଟି.): ଚେନ୍ନାଇର ମାମାଲ୍ଲାପୁରମଠାରେ ଚେସ୍ ଅଲିମ୍ପିଆଡ୍ର ୪୪ତମ ସଂସ୍କରଣ ମଙ୍ଗଳବାର ଶେଷ ହୋଇଛି। ଏଥିରେ ଭାରତର ମୋଟ ୬ଟି ଦଳ ଅଂଶଗ୍ରହଣ କରିଥିବାବେଳେ ମହିଳା ‘ଏ’ ଏବଂ ପୁରୁଷ ‘ବି’ ଦଳ ବ୍ରୋଞ୍ଜ ପଦକ ହାସଲ କରିଛି। ଭାରତରେ ପ୍ରଥମଥରପାଇଁ ଚେସ୍ ଅଲିମ୍ପିଆଡ୍ ଅନୁଷ୍ଠିତ ହୋଇଥିଲା।
ଭାରତୀୟ ‘ବି’ ଦଳ ଏହାର ଅନ୍ତିମ ରାଉଣ୍ଡ ମ୍ୟାଚରେ ଜର୍ମାନୀକୁ ୩-୧ରେ ପରାସ୍ତ କରି ତୃତୀୟ ସ୍ଥାନ ସ୍ପଷ୍ଟ କରିଥିଲା। ସମସ୍ତଙ୍କୁ ବିସ୍ମିତ କରି ଉଜ୍ବେକିସ୍ତାନ ପୁରୁଷ ବିଭାଗରେ ସ୍ବର୍ଣ୍ଣ ପଦକ ଲାଭ କରିଛି। ଶେଷ ରାଉଣ୍ଡରେ ଏହି ଦଳ ନେଦରଲାଣ୍ଡ୍ସକୁ ୨-୧ରେ ହରାଇ ଶୀର୍ଷସ୍ଥାନ ଅଧିକାର କରିଛି। ଆର୍ମେନିଆ ଦଳକୁ ରୌପ୍ୟ ପଦକ ମିଳିଛି। ଉଜ୍ବେକିସ୍ତାନ ଓ ଆର୍ମେନିଆ ୧୧ ରାଉଣ୍ଡରୁ ୧୯ ପଏଣ୍ଟ ଲେଖାଏ ପାଇ ପ୍ରତିଯୋଗିତା ଶେଷ କରିଥିଲେ। ମାତ୍ର ଉନ୍ନତ ଟାଇବ୍ରେକର ପଏଣ୍ଟରେ ଉଜ୍ବେକିସ୍ତାନ ଆଗରେ ରହିଛି। ପୂରା ଟୁର୍ନାମେଣ୍ଟରେ ଏହି ଦଳ ଅପରାଜେୟ ରହିଥିଲା। ଭାରତ ‘ବି’ ୧୧ ରାଉଣ୍ଡରୁ ୧୮ ପଏଣ୍ଟ ପାଇଛି। ଆର୍ମେନିଆ ଏହାର ଶେଷ ମ୍ୟାଚରେ ସ୍ପେନ୍କୁ ୨.୫-୧.୫ରେ ହରାଇ ଦେଇଥିଲା। ଭାରତ ‘ଏ’ ଦଳ ୧୧ ରାଉଣ୍ଡରୁ ୧୭ ପଏଣ୍ଟ ପାଇ ୪ର୍ଥ ଏବଂ ‘ସି’ ଦଳ ୧୪ ପଏଣ୍ଟରେ ରହି ୩୧ତମ ସ୍ଥାନ ପାଇଛି।
୧୦ମ ରାଉଣ୍ଡ ଶେଷସୁଦ୍ଧା ସ୍ବର୍ଣ୍ଣ ପଦକ ଦୌଡ଼ରେ ଥିବା ଟପ୍ ସିଡ୍ ଭାରତ ‘ଏ’ ଦଳ ୧୧ତମ ରାଉଣ୍ଡରେ ଆମେରିକାଠାରୁ ୧-୩ରେ ହାରିଯିବାରୁ ବ୍ରୋଞ୍ଜ ପଦକରେ ସନ୍ତୁଷ୍ଟ ହୋଇଥିଲା। ଯୁଦ୍ଧ ପ୍ରଭାବିତ ୟୁକ୍ରେନ ଭାବପ୍ରବଣ ସ୍ବର୍ଣ୍ଣ ପଦକ ପାଇଥିବାବେଳେ ଜର୍ଜିଆ ଦ୍ୱିତୀୟ ସ୍ଥାନରେ ରହି ରୌପ୍ୟ ପଦକ ହାସଲ କରିଛି। ୟୁକ୍ରେନ ଓ ଜର୍ଜିଆ ୧୧ ରାଉଣ୍ଡରୁ ୧୮ ପଏଣ୍ଟ ଲେଖାଏ ପାଇଥିଲେ। ମାତ୍ର ଟାଇବ୍ରେକର ପଏଣ୍ଟରେ ବାଜି ମାରିଥିଲା ୟୁକ୍ରେନ। ଭାରତ ‘ଏ’ ୧୧ ରାଉଣ୍ଡରୁ ୧୭ ପଏଣ୍ଟ ପାଇଥିଲା। ଭାରତ ‘ବି’ ଦଳ ୧୧ ରାଉଣ୍ଡରୁ ୧୬ ଏବଂ ‘ସି’ ଦଳ ୧୫ ପଏଣ୍ଟ ପାଇ ଯଥାକ୍ରମେ ୮ମ ଏବଂ ୧୭ତମ ସ୍ଥାନରେ ରହିଥିଲା।
ଅଲିମ୍ପିଆଡ୍ରେ ଭାରତର ଏହାଥିଲା ଦ୍ୱିତୀୟ ବ୍ରୋଞ୍ଜ ପଦକ। ୨୦୧୪ରେ ମଧ୍ୟ ଭାରତକୁ ଏହି ସଫଳତା ମିଳିଥିଲା। ୨୦୧୪ ଅଲିମ୍ପିଆଡ୍ରେ ପଦକ ପାଇଥିବା ଦଳରେ ବି. ଅଧିବନ ସାମିଲ ଥିଲେ। ମାତ୍ର ପ୍ରତିଯୋଗିତାରେ ଚମତ୍କାର ଫର୍ମ ଦେଖାଇଥିବା ଯୁବ ଖେଳାଳି ଡି. ଗୁକେଶ, ଆର. ପ୍ରଜ୍ଞାନନ୍ଦ, ନିହାଲ ସରିନ ଓ ରୌନକ ସାଧ୍ୱାନୀଙ୍କ ପାଇଁ ଏହା ପ୍ରଥମ ଅଭିଜ୍ଞତା ଥିଲା। ଆମେରିକା ବିପକ୍ଷ ଅନ୍ତିମ ରାଉଣ୍ଡରେ ଭାରତ ‘ଏ’ର ଅର୍ଜୁନ ଇରିଗାସି ବିଜୟୀ ହୋଇଥିଲେ ଏବଂ ପେଣ୍ଟାଲା ହରିକ୍ରିଷ୍ଣା ଓ ଭିଦିତ ସନ୍ତୋଷ ଗୁଜରାଠୀ ମ୍ୟାଚ ଡ୍ର ରଖିଥିଲେ। ତେବେ ଏସ.ଏଲ. ନାରାୟଣନ ହାରି ଯାଇଥିଲେ। ଜର୍ମାନୀ ବିପକ୍ଷରେ ଭାରତ ‘ବି’ର ନିହାଲ ସରିନ ଓ ରୌନକ ସାଧ୍ୱାନୀ ବିଜୟୀ ହୋଇଥିଲେ ଏବଂ ଡି. ଗୁକେଶ ଓ ଆର. ପ୍ରଜ୍ଞାନନ୍ଦ ମ୍ୟାଚ ଡ୍ର ରଖିଥିଲେ। କାଜାଖସ୍ତାନ ବିପକ୍ଷରେ ଭାରତ ‘ସି’ର ମୁରଲୀ କାର୍ତ୍ତିକେୟନ ବିଜୟୀ ହୋଇଥିଲେ ଏବଂ ଏସ.ପି. ସେଥିରମଣ ଓ ପୁରାଣିକ ଅଭିମନ୍ୟୁ ମ୍ୟାଚ ଡ୍ର ରଖିଥିଲେ। ସୂର୍ଯ୍ୟ ଶେଖର ଗାଙ୍ଗୁଲି ମ୍ୟାଚ ହାରି ଯାଇଥିଲେ।
ଆମେରିକା ବିପକ୍ଷ ଅନ୍ତିମ ରାଉଣ୍ଡରେ ଭାରତ ‘ଏ’ ମହିଳା ଦଳର କୋନେରୁ ହମ୍ପି ଏବଂ ଆର. ବୈଶାଳୀ ଡ୍ର ରଖିଥିବାବେଳେ ତାନିଆ ସଚଦେବ ଓ ଭକ୍ତି କୁଲକର୍ନୀଙ୍କ ପରାଜୟ ଭାରତୀୟ ‘ଏ’ ଦଳର ସ୍ବର୍ଣ୍ଣ ପଦକ ଆଶାକୁ ଧକ୍କା ପହଞ୍ଚାଇଥିଲା। ଭାରତ ‘ବି’ ଦଳ ଏହାର ଶେଷ ରାଉଣ୍ଡ ମ୍ୟାଚକୁ ସ୍ଲୋଭାକିଆ ବିପକ୍ଷରେ ୨-୨ରେ ଡ୍ର ରଖିଥିଲା। ଦିବ୍ୟା ଦେଶମୁଖ ବିଜୟୀ ହୋଇଥିବାବେଳେ ଭାନ୍ତିକା ଅଗ୍ରଓ୍ବାଲଓ ମାରିଆନ ଗୋମ୍ସ ମ୍ୟାଚ ଡ୍ର ରଖିଥିଲେ ଏବଂ ପଦ୍ମିନୀ ରାଉତ ହାରି ଯାଇଥିଲେ। ଭାରତ ‘ସି’ କାଜାଖସ୍ତାନଠାରୁ ୧.୫-୨.୫ରେ ପରାଜିତ ହୋଇଥିଲା। ପ୍ରତ୍ୟୁଷା ବୋଡ଼ା ବିଜୟୀ ହୋଇଥିବାବେଳେ ସହିଥି ବର୍ଷିନୀ ମ୍ୟାଚ ଡ୍ର ରଖିଥିଲେ। ତେବେ ଇଷା କାର୍ଭାଡେ ଓ ପି.ଭି. ନନ୍ଦିଥା ମ୍ୟାଚ ହାରି ଯାଇଥିଲେ।
