ତେଲକୋଇ,୧।୩(ଡି.ଏନ.ଏ): କେନ୍ଦୁଝର ଜିଲା ତେଲକୋଇ ବଜାର ଅଞ୍ଚଳରେ ମଙ୍ଗଳବାର ଏକ ଗୋଠଛଡ଼ା ଦନ୍ତା ବୁଲୁଥିବା ଦେଖିବାକୁ ମିଳିଥିଲା। ବଜାର ପାର୍ଶ୍ୱରେ ଥିବା କ୍ଷେତରେ ପଶି ଫସଲ ନଷ୍ଟ କରିବା ସହ ଘର ଭାଙ୍ଗିଛି। ଫଳରେ ଅଞ୍ଚଳରେ ଭୟର ବାତାବରଣ ଖେଳିଯାଇଛି। ଗୋଠଛଡ଼ା ଦନ୍ତା ସକାଳେ ତଳସାହିରେ ପଶି ୨୦ ଏକର ଜମିରେ ହୋଇଥିବା ତରଭୁଜ ଖାଇବା ସହ ନଷ୍ଟ କରିଦେଇଥିଲା। ଗ୍ରାମର ଜଣଙ୍କ ଘର କାନ୍ଥ ଭାଙ୍ଗିବା ସହ ଆମ୍ବ ଗଛ ଉପାଡ଼ି ଦେଇଥିଲା। ହାତୀ ଖୁଣ୍ଟାପଡ଼ା, କନ୍ତଲେଇ, ଦୁଲଭପୁର, କୁଲାଡେରା ଓ ଦୋବଲାପାଳ ଗ୍ରାମରେ ଚାଷୀଙ୍କ ବ୍ୟାପକ ଫସଲ କ୍ଷତି କରିଛି। ଏନେଇ କ୍ଷତିଗ୍ରସ୍ତ ଜିତେନ୍ଦ୍ର ପ୍ରଧାନ, ସତ୍ୟ ନାରାୟଣ ସାହୁ, ବିନୋଦ ପ୍ରଧାନ, ଶିବ ଶଙ୍କର ପ୍ରଧାନ, ଋଷିକେଶ ସାହୁ, କାଳିଆ ସାହୁ ପ୍ରମୁଖ ଚାଷୀମାନେ ବନ ବିଭାଗ ଅଧିକାରୀଙ୍କ ନିକଟରେ ଅଭିଯୋଗ କରିଛନ୍ତି। ଏସଂକ୍ରାନ୍ତରେ ବନାଞ୍ଚଳ ଅଧିକାରୀ ଏସ୍ଏମ ରାଓ କହିଛନ୍ତି, ଖବର ପାଇ ତୁରନ୍ତ ଏକ ସ୍କ୍ବାଡ୍କୁ ନିୟୋଜିତ କରାଯାଇଛି। ହାତୀ ଏବେ ଦୋବଲାପାଳ ଗ୍ରାମରେ ରହିଛି। କ୍ଷୟକ୍ଷତି ଆକଳନ ପରେ ଚାଷୀଙ୍କୁ ସହାୟତା ପ୍ରଦାନ କରାଯିବ ବୋଲି କହିଥିଲେ।
