କେନ୍ଦୁଝର,୩ା୧୨(ସ୍ବ.ପ୍ର.): କେନ୍ଦୁଝର ସହର ଶିରିପୁର ସାହି ନିକଟରେ ଥିବା ପ୍ରାଥମିକ ବିଦ୍ୟାଳୟ ତଦାରଖ ଅଭାବରୁ ଅସୁରକ୍ଷିତ ହୋଇପଡ଼ିଛି। ପରିସରରେ ଭଙ୍ଗା ଦଦରା ଘର ରହିଥିବା ବେଳେ ତାହା ଭଙ୍ଗାଯାଉନାହିଁ। ଫଳରେ ଛୋଟ ପିଲାମାନେ ଅସୁରକ୍ଷିତ ପରିବେଶରେ ଖେଳକୁଦ କରୁଛନ୍ତି। ଏଥିସହ ସଫେଇ ହେଉ ନ ଥିବାରୁ ଜଙ୍ଗଲରେ ପରିପୂର୍ଣ୍ଣ ହୋଇ ସରୀସୃପଙ୍କ ବାସସ୍ଥଳୀ ପାଲଟିଛି। ସ୍କୁଲ ପ୍ରତି ଶିକ୍ଷା ବିଭାଗର ଦୃଷ୍ଟି ପଡୁ ନ ଥିବାରୁ ପିଲାଙ୍କ ସୁରକ୍ଷାକୁ ନେଇ ଅଭିଭାବକ ଚିନ୍ତା ପ୍ରକଟ କରିଛନ୍ତି।
ପରିସରରେ ଥିବା ଏକ ପୁରୁଣା ଟାଇଲ ଶ୍ରେଣୀ କକ୍ଷ ଓ ରୋଷେଇ ଘର ଦୀର୍ଘ ବର୍ଷ ହେଲା ଅସୁରକ୍ଷିତ ଅବସ୍ଥାରେ ରହିଛି। ଶିକ୍ଷା ବିଭାଗର ଅଧିକାରୀମାନେ ଗସ୍ତ ବେଳେ ଆସି ଦେଖିଯାଉଥିଲେ ହେଁ ଭାଙ୍ଗିବା ପାଇଁ କାୈଣସି ପଦକ୍ଷେପ ନେଉନାହାନ୍ତି। କେତେବେଳେ ଘରଟି ଭୁଶୁଡ଼ି ପଡ଼ିବ କହି ହେବ ନାହିଁ। ସେହିପରି ଭଙ୍ଗାଦଦରା ଘର ହୋଇଥିବାରୁ ସାପ, ବିଛା ଆଦି ସରୀସୃପଙ୍କ ଆଶ୍ରୟ ସ୍ଥଳୀ ପାଲଟିଛି। ପରିସର ମଧ୍ୟରେ ମୁଖ୍ୟମନ୍ତ୍ରୀ କର୍ମତପତ୍ର ଯୋଜନାରେ ନିର୍ମାଣ ହୋଇଥିବା ଦୁଇଟି ଜଳସଂରକ୍ଷଣ ପ୍ରକଳ୍ପ ପରିତ୍ୟକ୍ତ ଅବସ୍ଥାରେ ରହି ପିଲାଙ୍କ ପାଇଁ ବିପଦ ସୃଷ୍ଟି କରୁଛି। ଏଥିସହ ଉକ୍ତ ବିଦ୍ୟାଳୟଟି ବ୍ୟସ୍ତବହୁଳ ରାସ୍ତାକଡ଼ରେ ରହିଥିବାରୁ ସବୁବେଳେ ଦୁର୍ଘଟଣା ଆଶଙ୍କା ରହୁଛି। ଏଣୁ ବିଭାଗ ପକ୍ଷରୁ ତୁରନ୍ତ ପଦକ୍ଷେପ ନେବାକୁ ଅଭିଭାବକ ତଥା ସ୍ଥାନୀୟ ଅଧିବାସୀ ଦାବି କରିଛନ୍ତି। ଜିଲା ଶିକ୍ଷାଧିକାରୀ ପୂର୍ଣ୍ଣଚନ୍ଦ୍ର ସେଠୀ କହିଛନ୍ତି, ଅସୁରକ୍ଷିତ ଘରଗୁଡ଼ିକୁ ଭାଙ୍ଗିଦେବାକୁ ନିର୍ମାଣ ସଂସ୍ଥାକୁ ଜଣାଇ ଦିଆଯାଇଛି। ଏ ସମ୍ପର୍କରେ ବ୍ଲକ୍ ଶିକ୍ଷାଧିକାରୀଙ୍କୁ ସୂଚନା ମଧ୍ୟ ଦିଆଯାଇଛି। ଆଗାମୀ ଦିନରେ ପଦକ୍ଷେପ ନିଆଯିବ ବୋଲି ସେ କହିଥିଲେ।
