ନୂଆଦିଲ୍ଲୀ,୧୨।୯: BRICSରେ ସାମିଲ ହେବା ପାଇଁ ଦୀର୍ଘଦିନ ଧରି ପାକିସ୍ତାନ ଉଦ୍ୟମ କରିଆସୁଛି। ୨୦୨୩ରେ ଇସଲାମାବାଦ ଏହି ଗୋଷ୍ଠୀର ସଦସ୍ୟତା ପାଇଁ ଔପଚାରିକ ଭାବେ ଆବେଦନ କରିଥିଲା। ତେବେ ଏପର୍ଯ୍ୟନ୍ତ ପାକିସ୍ତାନକୁ BRICSରେ ସାମିଲ ହେବାର ସୁଯୋଗ ମିଳିନାହିଁ। ପାକିସ୍ତାନର ସଦସ୍ୟତା ରାସ୍ତାରେ ସବୁଠାରୁ ବଡ଼ ରାଜନୈତିକ ଭାବେ ଭାରତର ସହମତିକୁ ଦେଖାଯାଉଛି।
BRICSରେ ନୂଆ ସଦସ୍ୟଙ୍କୁ ସାମିଲ କରିବା ନିଷ୍ପତ୍ତି ସଦସ୍ୟ ଦେଶମାନଙ୍କ ସହମତି ଆଧାରରେ ହୋଇଥାଏ। ତେଣୁ କୌଣସି ଗୋଟିଏ ସଦସ୍ୟ ଦେଶର ଅସହମତି ନୂଆ ଦେଶର ପ୍ରବେଶକୁ ଜଟିଳ କରିପାରେ। ଭାରତ-ପାକିସ୍ତାନ ମଧ୍ୟରେ ଦୀର୍ଘଦିନର ରାଜନୈତିକ ମତଭେଦ ଥିବାରୁ ଏହି ପ୍ରସଙ୍ଗ ଅଧିକ ଗୁରୁତ୍ୱ ପାଇଛି।
ପାକିସ୍ତାନର BRICSରେ ଯୋଗଦେବା ଆଗ୍ରହ କେବଳ ରାଜନୈତିକ ନୁହେଁ, ଏହା ପଛରେ ଆର୍ଥିକ କାରଣ ମଧ୍ୟ ରହିଛି। ଦୀର୍ଘ ସମୟ ଧରି ଆର୍ଥିକ ସଙ୍କଟ, ବିଦେଶୀ ମୁଦ୍ରା ଅଭାବ ଓ ଋଣ ଚାପରେ ଥିବା ପାକିସ୍ତାନ ନୂଆ ଅନ୍ତର୍ଜାତୀୟ ବାଣିଜ୍ୟ ଓ ଆର୍ଥିକ ସହଯୋଗର ରାସ୍ତା ଖୋଜୁଛି।
ପାକିସ୍ତାନର ଆର୍ଥିକ ସର୍ଭେ ଅନୁସାରେ ଦେଶର GDP ବୃଦ୍ଧି ୩.୭୦ ପ୍ରତିଶତ ରହିଛି। BRICSରେ ସାମିଲ ହେଲେ ଉଦୀୟମାନ ଅର୍ଥନୀତିଗୁଡ଼ିକ ସହ ବାଣିଜ୍ୟ ଓ ଆର୍ଥିକ ସମ୍ପର୍କ ବଢ଼ାଇବାର ସୁଯୋଗ ମିଳିପାରେ ବୋଲି ଇସଲାମାବାଦ ଆଶା କରୁଛି।
BRICS ସହ ଜଡ଼ିତ ନ୍ୟୁ ଡେଭଲପମେଣ୍ଟ ବ୍ୟାଙ୍କ ଭଳି ଅନୁଷ୍ଠାନ ମଧ୍ୟ ପାକିସ୍ତାନ ପାଇଁ ଗୁରୁତ୍ୱପୂର୍ଣ୍ଣ। ଏକ ରିପୋର୍ଟ ଅନୁସାରେ, ପାକିସ୍ତାନ BRICSର ନ୍ୟୁ ଡେଭଲପମେଣ୍ଟ ବ୍ୟାଙ୍କରେ ପ୍ରାୟ ୫୮୦ ନିୟୁତ ଡଲାର ନିବେଶ କରିଛି। ଏହା ମାଧ୍ୟମରେ ନିଜର ଆର୍ଥିକ ବିକଳ୍ପ ବଢ଼ାଇବା ସହ ବିଶ୍ୱ ବ୍ୟାଙ୍କ ଓ ଆଇଏମଏଫ ଭଳି ସଂସ୍ଥା ଉପରେ ନିର୍ଭରଶୀଳତା କମାଇବାକୁ ପାକିସ୍ତାନ ଚାହୁଁଛି।
BRICSର ସମ୍ପ୍ରସାରଣ ପରେ ଏହି ଗୋଷ୍ଠୀର ବିଶ୍ୱସ୍ତରୀୟ ପ୍ରଭାବ ମଧ୍ୟ ବଢ଼ିଛି। ବର୍ଦ୍ଧିତ BRICSରେ ବିଶ୍ୱର ପ୍ରାୟ ଅଧା ଜନସଂଖ୍ୟା ବସବାସ କରୁଛନ୍ତି। କ୍ରୟ ଶକ୍ତି ସମତା (PPP) ଆଧାରରେ ବିଶ୍ୱ GDPରେ ଏହି ଗୋଷ୍ଠୀର ଅଂଶ ପ୍ରାୟ ୪୦ ପ୍ରତିଶତ ବୋଲି କୁହାଯାଉଛି।
ଭାରତ ପାଇଁ ମଧ୍ୟ BRICS ଏକ ଗୁରୁତ୍ୱପୂର୍ଣ୍ଣ ବାଣିଜ୍ୟିକ ମଞ୍ଚରେ ପରିଣତ ହୋଇଛି। ଉପଲବ୍ଧ ତଥ୍ୟ ଅନୁସାରେ BRICS ଦେଶଗୁଡ଼ିକୁ ଭାରତର ରପ୍ତାନି ୪୮.୮ ପ୍ରତିଶତ ବଢ଼ି ୬୪.୩ ବିଲିୟନ ଡଲାରରୁ ୯୫.୭ ବିଲିୟନ ଡଲାରରେ ପହଞ୍ଚିଛି । ୨୦୨୩ ନଭେମ୍ବରରେ ପାକିସ୍ତାନର ବିଦେଶ କାର୍ଯ୍ୟାଳୟ BRICSରେ ସାମିଲ ହେବା ପାଇଁ ଇଚ୍ଛା ପ୍ରକାଶ କରିଥିଲା। ତତ୍କାଳୀନ ବିଦେଶ କାର୍ଯ୍ୟାଳୟ ମୁଖପାତ୍ର ମୁମତାଜ ଜହରା ବଲୋଚ BRICSକୁ ବିକାଶଶୀଳ ଦେଶଗୁଡ଼ିକର ଏକ ଗୁରୁତ୍ୱପୂର୍ଣ୍ଣ ଗୋଷ୍ଠୀ ବୋଲି କହିଥିଲେ।
ତାଙ୍କ କହିବା ଅନୁସାରେ, ପାକିସ୍ତାନ BRICSରେ ସାମିଲ ହୋଇ ଅନ୍ତର୍ଜାତୀୟ ସହଯୋଗ ଓ ସମାବେଶୀ ବହୁପକ୍ଷୀୟ ବ୍ୟବସ୍ଥାକୁ ମଜବୁତ କରିବାରେ ଅବଦାନ ଦେବାକୁ ଚାହୁଁଛି। BRICSର ଅଧିକାଂଶ ସଦସ୍ୟ ଦେଶ ସହ ପାକିସ୍ତାନର ଭଲ ସମ୍ପର୍କ ରହିଛି ବୋଲି ଇସ୍ଲାମାବାଦ ଦାବି କରିଆସିଛି। ଏହି ଆଧାରରେ ନିଜ ସଦସ୍ୟତା ଆବେଦନକୁ ସକାରାତ୍ମକ ଭାବେ ବିଚାର କରାଯିବ ବୋଲି ପାକିସ୍ତାନ ଆଶା ରଖିଛି।
