ଅମରପାଲି,୧୫ା୧(ଡି.ଏନ.ଏ.): ସୁବର୍ଣ୍ଣପୁର ଜିଲା ବୀରମହାରାଜପୁର ବସଷ୍ଟାଣ୍ଡରେ ଜଣେ ଯୁବକ ପ୍ରେମିକାଙ୍କୁ ଛାଡି ଫେରାର ହୋଇଯିବା ଘଟଣା ଚର୍ଚ୍ଚାର ବିଷୟ ହୋଇଛି। ଯୁବତୀ ଜଣକ ଗର୍ଭବତୀ ଥିବା ବେଳେ ନ୍ୟାୟ ପାଇଁ ନିବେଦନ କରିଛନ୍ତି।
ସୁବର୍ଣ୍ଣପୁର ଜିଲା ସୁବଳୟା ଥାନା ଅନ୍ତର୍ଗତ ବଡଖମାର ଗାଁର ଜଣେ ଯୁବକ ଆନ୍ଧ୍ରପ୍ରଦେଶର ଏକ ଚିଙ୍ଗୁଡି ଫ୍ୟାକ୍ଟ୍ରିରେ କାମ କରୁଥିଲେ । ସେଠାରେ ଝାରସୁଗୁଡା ଜିଲାର ଜଣେ ୨୬ ବର୍ଷୀୟ ଯୁବତୀଙ୍କ ସହ ତାଙ୍କର ପ୍ରେମ ସମ୍ପର୍କ ଗଢି ଉଠିଥିଲା । ଉଭୟେ ବିବାହ କରି ନ ଥିଲେ ମଧ୍ୟ ସ୍ବାମୀ ସ୍ତ୍ରୀ ଭଳି ଏକାଠି ରହୁଥିଲେ ।
ପରେ ପ୍ରେମିକ ଜଣକ ନିଜ ପ୍ରେମିକାଙ୍କୁ ଧରି ବଡଖମାରସ୍ଥିତ ନିଜ ଘରକୁ ଆସିଥିଲେ। ହେଲେ କିଛି ଦିନ ହେଲା ଉଭୟଙ୍କ ମଧ୍ୟରେ କୌଣସି କାରଣକୁ ଝଗଡା ଲାଗୁଥିଲା । ଏପରିକି ପ୍ରେମିକାଙ୍କୁ ଜୀବନରେ ମାରି ଦେବାକୁ ସମ୍ପୃକ୍ତ ଯୁବକ ଜଣକ ଧମକ ଦେଇ ଆସୁଥିଲେ।
ହେଲେ ଶୁକ୍ରବାର ଯୁବକ ଜଣକ ବୁଲିଯିବାକୁ କହି ଯୁବତୀଙ୍କୁ ଘରୁ ଡାକି ନେଇ ବୀରମହାରାଜପୁର ବସଷ୍ଟାଣ୍ଡରେ ପହଞ୍ଚିଥିଲେ। ଏହାର କିଛି ସମୟ ପରେ ଯୁବକ ଜଣକ ପ୍ରେମିକାଙ୍କୁ ଛାଡି କେଉଁଆଡେ ଫେରାର ହୋଇଯାଇଥିଲେ। ଖବର ପାଇ ସୁବଳୟା ପୋଲିସ ଘଟଣା ସ୍ଥଳରେ ପହଞ୍ଚି ଯୁବତୀଙ୍କୁ ଉଦ୍ଧାର କରି ଥାନାରେ ରଖିଛି। ଏପରିକି ପୋଲିସ ଉଭୟ ପକ୍ଷଙ୍କୁ ଡାକି ଆପୋଷ ବୁଝାମଣା ପାଇଁ ପୋଲିସ ଉଦ୍ୟମ ଚଳାଇଛି।
