ବିଜୟଓ୍ବାଡା,୧୯।୭: ଆନ୍ଧ୍ରପ୍ରଦେଶର ବିଜୟୱାଡାରୁ ଏକ ଲୋମଟାଙ୍କୁରା ଖବର ଆସିଛି, ଯେଉଁଠାରେ ଜଣେ ପୁରୁଷ ତାଙ୍କ ଲିଭ-ଇନ ପାର୍ଟନରଙ୍କୁ ହତ୍ୟା କରିଛନ୍ତି। କୁହାଯାଉଛି ଯେ ମହିଳା ପାର୍ଟନର ସେକ୍ସ ଓ୍ବାର୍କର ହେବାକୁ ମନା କରିବାରୁ ତାଙ୍କ ପୁରୁଷ ବନ୍ଧୁ ତାଙ୍କୁ ହତ୍ୟା କରିଛନ୍ତି।
ଗୁରୁବାର (୧୭ ଜୁଲାଇ, ୨୦୨୫) ପୋଲିସ କହିଛି ଯେ ଜଣେ ୨୪ ବର୍ଷୀୟ ମହିଳା ସେକ୍ସ ଓ୍ବାର୍କର ହେବାକୁ ମନା କରିବାରୁ ତାଙ୍କ ଲିଭ-ଇନ ପାର୍ଟନର ତାଙ୍କୁ ହତ୍ୟା କରିଛନ୍ତି। ଏହି ଘଟଣା ଜୁଲାଇ ୧୬ ରାତି ପ୍ରାୟ ୧୦ଟା ୩୦ ସମୟରେ ଏକ ଘରୋଇ ବିବାଦ ପରେ ଘଟିଥିଲା।
ସୂଚନା ଦେଇ ପୋଲିସ ଉପ-ଅଧିକ୍ଷକ ଏସ ମୁରଲିମୋହନ କହିଛନ୍ତି ଯେ ମହିଳା ତାଙ୍କ ସନ୍ତାନ ଜନ୍ମ ପରେ ତାଙ୍କ ସ୍ବାମୀଙ୍କଠାରୁ ଅଲଗା ହୋଇଯାଇଥିଲେ ଏବଂ ବିଜୟୱାଡାର ଜଣେ ମେକାନିକ ସହିତ ଲିଭ-ଇନରେ ରହୁଥିଲେ। ସେ କହିଛନ୍ତି ଯେ ଅଭିଯୁକ୍ତ ଜଣେ ମଦ୍ୟପ ଏବଂ ପ୍ରାୟତଃ ମହିଳାଙ୍କୁ ବିଶ୍ୱାସଘାତକତାର ଅଭିଯୋଗରେ ମାରଧର କରୁଥିଲେ। ଘଟଣା ଦିନ, ମହିଳା ତାଙ୍କ ମା’ଙ୍କ ଘରକୁ ଫେରି ଆସିଥିଲେ ଯେଉଁଠାରେ ତାଙ୍କ ଭାଇ ଏବଂ ଅଭିଯୁକ୍ତ ମଧ୍ୟ ଉପସ୍ଥିତ ଥିଲେ।
ମହିଳା ଏବଂ ଅଭିଯୁକ୍ତଙ୍କ ମଧ୍ୟରେ ବିବାଦ ଆହୁରି ବଢ଼ି ଯାଇଥିଲା ଯେତେବେଳେ ପୁରୁଷ ତାଙ୍କୁ ସେକ୍ସ ଓ୍ବାର୍କର ହେବାକୁ ଚାପ ପକାଇଥିଲେ। କ୍ରୋଧରେ ସେ ମହିଳାଙ୍କ ମା’ ଏବଂ ଭାଇଙ୍କୁ ମଧ୍ୟ ଆକ୍ରମଣ କରିଥିଲେ, ଯାହା ଫଳରେ ସେମାନେ ସାମାନ୍ୟ ଆହତ ହୋଇଥିଲେ। ଯେତେବେଳେ ମହିଳା ଜଣକ ହସ୍ତକ୍ଷେପ କଲେ, ସେ ତାଙ୍କ ଛାତି ଏବଂ ଜଙ୍ଘରେ ବାରମ୍ବାର ଛୁରୀ ମାରିବାରୁ ତାଙ୍କର ମୃତ୍ୟୁ ହୋଇଥିବା ପୋଲିସ କହିଛି।
ପୋଲିସ ଅଭିଯୁକ୍ତଙ୍କ ବିରୁଦ୍ଧରେ ଭାରତୀୟ ଦଣ୍ଡ ସଂହିତା (BNS) ଧାରା ୧୦୩ (ହତ୍ୟା) ଏବଂ ୧୦୯ (ହତ୍ୟା ଉଦ୍ୟମ) ଅନୁଯାୟୀ ଏକ ମାମଲା ରୁଜୁ କରିଛି। ଅଭିଯୁକ୍ତ ବର୍ତ୍ତମାନ ଫେରାର ଅଛି, ଏବଂ ପୋଳିସ ତାଙ୍କୁ ଖୋଜୁଛି।
