କଟକ ଅଫିସ,୩୧।୩: ଏସ୍ସିବି ମେଡିକାଲ କଲେଜରେ ବୁଧବାର ଜି.ଉଦୟଗିରି ପୂର୍ବତନ ବିଧାୟକ ଜାକବ ପ୍ରଧାନଙ୍କ ଶରୀରରେ ୧୦୦ତମ ଅସ୍ଥିମଜ୍ଜା ପ୍ରତିରୋପଣ କରାଯାଇଛି। ସେ ରକ୍ତକର୍କଟ ରୋଗ ସହ ଏକାଧିକ ରୋଗରେ ଆକ୍ରାନ୍ତ ଥିବାରୁ ଗତ ୧୫ ତାରିଖରେ ସେ ଏସ୍ସିବି ମେଡିକାଲରେ ଭର୍ତ୍ତି ହୋଇଥିଲେ। ୨୦୨୧ ମେ ୨୧ରେ ଏକ ଘରୋଇ ହସ୍ପିଟାଲରେ ତାଙ୍କର ଅସ୍ତ୍ରୋପଚାର କରାଯାଇଥିଲା। ଗତ ଫେବୃୟାରୀରେ ସେ ୯ଥର କେମୋ ନେବା ପରେ ତାଙ୍କୁ ଏସ୍ସିବିକୁ ଅସ୍ଥିମଜ୍ଜା ପ୍ରତିରୋପଣ ପାଇଁ ପଠାଯାଇଥିଲା । ଅସ୍ଥିମଜ୍ଜା ପ୍ରତିରୋପଣର ସମସ୍ତ ପ୍ରକ୍ରିୟା ୨୫ ତାରିଖଠୁ ଆରମ୍ଭ ହେବା ସହ ୨୯ ତାରିଖରେ ହାଇ ଡୋଜ୍ କେମୋ ଦିଆଯାଇଥିଲା। ବୁଧବାର ଷ୍ଟେମ୍ ସେଲ୍ ସଂଗ୍ରହ କରାଯାଇ ପ୍ରତିରୋପଣ କରାଯାଇଛି। ଆସନ୍ତା ୨ ସପ୍ତାହ ପର୍ଯ୍ୟନ୍ତ ସେ ଚିକିତ୍ସା ଭିତରେ ରହିବେ ବୋଲି ହେମାଟୋଲୋଜି ବିଭାଗ ପକ୍ଷରୁ କୁହାଯାଇଛି। ଭାରତରେ କୌଣସି ସରକାରୀ ମେଡିକାଲ୍ କଲେଜରେ ଏହା ପ୍ରଥମ ଘଟଣା ଓ ପୂର୍ବ ଭାରତରେ ଟାଟା ମେଡିକାଲ୍ ସେଣ୍ଟର ପରେ ଏହା ଦ୍ୱିତୀୟ ସର୍ବାଧିକ ପ୍ରତିରୋପଣ କେନ୍ଦ୍ର ଭାବେ ପରିଚୟ ପାଇଛି। ରାଜ୍ୟ ସରକାରଙ୍କ ପକ୍ଷରୁ ଏହି ପ୍ରତିରୋପଣ ସମ୍ପର୍ଣ୍ଣ ଭାବେ ମାଗଣାରେ କରାଯାଉଥିବା ବିଭାଗ ପକ୍ଷରୁ ସୂଚନା ଦିଆଯାଇଛି ା ହେମାଟୋଲୋଜି ବିଭାଗର ମୁଖ୍ୟ ପ୍ରଫେସର ଡାକ୍ତର ରବୀନ୍ଦ୍ର କୁମାର ଜେନାଙ୍କ ନେତୃତରେ ହୋଇଥିବା ଏହି ପ୍ରତିରୋପଣରେ ଡାକ୍ତର ଏସ୍. ସେଠୀ, ଆର୍. କେ. ନାୟକ, ଏମ୍. ଏମ୍. ବିଶ୍ୱାଳ, ଡି. ଜେ. ପୃଷ୍ଟିଙ୍କ ସମେତ ପ୍ରଫେସର ଡାକ୍ତର ସ୍ମିତା ମହାପାତ୍ର, ଏମ୍. ଆର. ପଟ୍ଟନାୟକ, ସତ୍ୟ ରାଉତରାୟ, ଶରତ କୁମାର ପରିଡ଼ା ପ୍ରମୁଖ ସାମିଲ ହୋଇଥିଲେ।
