ମୁମ୍ବାଇ,୨୦ା୯: ଗଣେଶ ଚତୁର୍ଥୀ ଅବସରରେ ସ୍ୱାମୀ ବିକି କୌଶଲଙ୍କ ସହ ନଜର ଆସିଥିଲେ ଅଭିନେତ୍ରୀ କ୍ୟାଟ୍ରିନା କୈଫ । ଏହା ପରେ ସୋସିଆଲ ମିଡିଆର କିଛି ପେଜ୍ ଓ ପାପାରାଜିଙ୍କ ପକ୍ଷରୁ ତାଙ୍କ ଲୁକ୍ ଓ ଓଜନକୁ ନେଇ ଟ୍ରୋଲିଂ ଆରମ୍ଭ ହୋଇଥିବା ଦାବି କରାଯାଇଛି । କିଛି ଲୋକ ତାଙ୍କ କ୍ୟାରିୟରକୁ ନେଇ ମଧ୍ୟ ମନ୍ତବ୍ୟ କରିଥିଲେ। ଏହାକୁ ନେଇ କ୍ୟାଟ୍ରିନାଙ୍କ ସହ କାମ କରିଥିବା ଅଭିନେତା ଅଲି ଜାଫରଙ୍କ ସମେତ ଇଣ୍ଡଷ୍ଟ୍ରିର ଅନେକ ବ୍ୟକ୍ତି ତାଙ୍କ ସମର୍ଥନରେ ଆସିଥିବା ରିପୋର୍ଟ ରହିଛି ।
ଏହି ବିବାଦ ମଧ୍ୟରେ ସଲମାନ ଖାନ୍ ‘ୱିକେଣ୍ଡ କା ୱାର୍’ରେ ବଡି-ଶେମିଂକୁ ନେଇ ମନ୍ତବ୍ୟ ଦେଇଥିବା ଜଣାପଡ଼ିଛି । ସେ କହିଥିଲେ, ଜଣେ ଅଭିନେତା କିମ୍ବା ଅଭିନେତ୍ରୀ ଯାହା କିଛି କଲେ ମଧ୍ୟ ସୋସିଆଲ ମିଡିଆରେ ଟ୍ରୋଲିଂ ହୋଇଥାଏ । ଓଜନ, ଲୁକ୍, ପରିବାର ଏବଂ ମା’ ହେବା ଭଳି ବ୍ୟକ୍ତିଗତ ବିଷୟକୁ ନେଇ କାହାକୁ ଟାର୍ଗେଟ୍ କରିବା ଉପରେ ସେ ଆପତ୍ତି ଜଣାଇଥିଲେ। ସଲମାନଙ୍କ ଏହି ମନ୍ତବ୍ୟକୁ କ୍ୟାଟ୍ରିନାଙ୍କ ସମର୍ଥନ ଭାବେ ଦେଖାଯାଉଛି। କ୍ୟାଟ୍ରିନା ଓ ସଲମାନ ଅତୀତରେ ଏକାଧିକ ଫିଲ୍ମରେ ଏକାଠି କାମ କରିଛନ୍ତି ।
ଅନ୍ୟପକ୍ଷରେ, ଏହି ପ୍ରସଙ୍ଗରେ ବିକି କୌଶଲଙ୍କ ପକ୍ଷରୁ କୌଣସି ସାର୍ବଜନୀନ ପ୍ରତିକ୍ରିୟା ଆସିନଥିବା ରିପୋର୍ଟ ରହିଛି । ଏହାକୁ ନେଇ ସୋସିଆଲ ମିଡିଆର କିଛି ୟୁଜର ବିକିଙ୍କୁ ଟ୍ରୋଲ୍ କରିବା ସହ କ୍ୟାଟ୍ରିନାଙ୍କ ସମର୍ଥନରେ ସେ କିଛି କହିବା ଉଚିତ୍ ଥିଲା ବୋଲି ମନ୍ତବ୍ୟ ଦେଇଛନ୍ତି।
ତେବେ ଏପର୍ଯ୍ୟନ୍ତ କ୍ୟାଟ୍ରିନା କୈଫ କିମ୍ବା ବିକି କୌଶଲ ଏହି ବିବାଦ ନେଇ କୌଣସି ଅଧିକାରିକ ପ୍ରତିକ୍ରିୟା ଦେଇନାହାନ୍ତି । ଗଣେଶ ଚତୁର୍ଥୀ ଅବସରରେ କ୍ୟାଟ୍ରିନାଙ୍କ ପବ୍ଲିକ୍ ଅପିୟରାନ୍ସ ପରେ ଏହି ଚର୍ଚ୍ଚା ଆରମ୍ଭ ହୋଇଥିବାବେଳେ ଏବେ ସଲମାନଙ୍କ ମନ୍ତବ୍ୟ ଓ ବିକିଙ୍କ ନିରବତାକୁ ନେଇ ସୋସିଆଲ ମିଡିଆରେ ଚର୍ଚ୍ଚା ଜାରି ରହିଛି ।
