ମୁମ୍ବାଇ,୧।୪: ୨୧୦ ରନ୍ର ବିଶାଳ ଟାର୍ଗେଟ ଛିଡ଼ା କରିବା ପରେ ମଧ୍ୟ ଡିଫେଣ୍ଡିଂ ଚାମ୍ପିୟନ ଚେନ୍ନାଇ ସୁପର କିଙ୍ଗ୍ସ (ସିଏସ୍କେ)କୁ ଲକ୍ଷୌ ସୁପର ଜ୍ୟାଣ୍ଟସଠାରୁ ପରାସ୍ତ ହେବାକୁ ପଡ଼ିଛି। ଆଇପିଏଲ ଇତିହାସରେ ପ୍ରଥମ ଥର ପାଇଁ ପ୍ରାରମ୍ଭିକ ଦୁଇଟି ମ୍ୟାଚ୍ରେ ପରାସ୍ତ ହୋଇଛି ସିଏସ୍କେ। ତେବେ ପରାଜୟ ପାଇଁ ଦଳୀୟ ଫିଲ୍ଡିଂ ଏବଂ କାକରକୁ ଦାୟୀ କରିଛନ୍ତି ଚେନ୍ନାଇ ଅଧିନାୟକ ରବୀନ୍ଦ୍ର ଜାଡେଜା।
୨୧୧ ରନ୍ର ପିଛା କରୁଥିବା ଲକ୍ଷ୍ନୌ ପାଓ୍ବରପ୍ଲେରେ ଧୂଆଁଦାର ବ୍ୟାଟିଂ କରିଥିଲେ। ଅନ୍ୟପକ୍ଷରେ ପ୍ରଥମ ୧୦ ଓଭର ମଧ୍ୟରେ ଚେନ୍ନାଇର ଫିଲ୍ଡରମାନେ ଦୁଇଟି କ୍ୟାଚ୍ ହାତଛଡ଼ା କରିଥିଲେ। ମିଡ୍ଲ ଓଭରରେ ଡ୍ବେନ ବ୍ରାଭୋ ଏବଂ ଡ୍ବେନ ପ୍ରିଟୋରିଅସଙ୍କ ଭଲ ବୋଲିଂ ଯୋଗୁ ମ୍ୟାଚ୍କୁ ପ୍ରତ୍ୟାବର୍ତ୍ତନ କରିଥିଲା ସିଏସ୍କେ। କିନ୍ତୁ ଦଳ ପାଇଁ ଡେଥ୍ ଓଭରରେ ଅଲରାଉଣ୍ଡର ଶିବମ ଦୁବେ ଏବଂ ମୁକେଶ ଚୌଧୁରିଙ୍କ ବୋଲିଂ ପୂରା ଫେଲ ମାରିଥିଲେ।
ପରାଜୟ ପରେ ଜାଡେଜା ଦଳୀୟ ଫିଲ୍ଡିଂ ଏବଂ ପ୍ରବଳ କାକରକୁ ଦୀୟୀ କରିଛନ୍ତି। ମ୍ୟାଚ୍ ଜିତିବା ଲାଗି କ୍ୟାଚ୍ ଧରିବାକୁ ପଡ଼ିବ। ଅତ୍ୟଧିକ କାକର ଯୋଗୁ ବଲ ହାତରେ ରହୁ ନାହିଁ। ପରବର୍ତ୍ତୀ ଥର ଆମକୁ ଓଦା ବଲରେ ପ୍ରାକ୍ଟିସ କରିବାକୁ ହେବ ବୋଲି ସେ କହିଛନ୍ତି।
