ଅଲୱର,୨୨।୯: ରାଜସ୍ଥାନର ଅଲୱର ନଗର ନିଗମରେ ଭାଜପାର ବିଜୟ ପରେ ଭାବବିହ୍ବଳ ହୋଇପଡ଼ିଛନ୍ତି ରାଜ୍ୟ କ୍ୟାବିନେଟ ମନ୍ତ୍ରୀ ସଞ୍ଜୟ ଶର୍ମା। ଅଲୱର ନଗର ନିଗମର ଦାୟିତ୍ୱ ତାଙ୍କୁ ଦିଆଯାଇଥିଲା। ଫଳାଫଳ ଘୋଷଣା ପରେ ଗଣମାଧ୍ୟମ ସହ କଥା ହେବା ସମୟରେ ତାଙ୍କ ଆଖିରୁ ଲୁହ ଝରିଥିଲା। ସଞ୍ଜୟ ଶର୍ମା ପୂର୍ବ ଘଟଣାକୁ ମନେ ପକାଇ କହିଥିଲେ ଯେ, ଯେଉଁ ନଗର ପରିଷଦ ପରିସରରେ ପୂର୍ବରୁ ତାଙ୍କ ସହ ‘ଛଳନା’ ହୋଇଥିଲା, ଆଜି ସେହି ସ୍ଥାନରେ ଭାଜପାର ସୁମନଲତା ଅଗ୍ରୱାଲ ଜିତିଛନ୍ତି। ଆଜି ଅଲୱର ସହରର ଲୋକେ ଏବଂ ଭାଜପା କର୍ମୀମାନେ ତାହାର ଜବାବ ଦେଇଛନ୍ତି।
ଭାବବିହ୍ବଳ ହେବାର କାରଣ ବିଷୟରେ ସଞ୍ଜୟ ଶର୍ମା କହିଥିଲେ, ପୂର୍ବରୁ ଏହି ପରିସରରେ ମୋ ସହ ଛଳନା କରାଯାଇଥିଲା ଏବଂ ମୋତେ ଘେରି ମାଡ଼ ମରାଯାଇଥିଲା। କିନ୍ତୁ ଆଜି ସେହି ପରିସରରେ ସୁମନଜୀ ବିଜୟର ମାଳା ପିନ୍ଧୁଛନ୍ତି। ଏହା ମୋ ପାଇଁ ଅତ୍ୟନ୍ତ ଭାବବିହ୍ବଳ ମୁହୂର୍ତ୍ତ।
ଏହି ଅବସରରେ ସଞ୍ଜୟ ଶର୍ମା କଂଗ୍ରେସ ନେତା ଟିକାରାମ ଜୁଲିଙ୍କୁ ମଧ୍ୟ ଟାର୍ଗେଟ କରିଥିଲେ। ତାଙ୍କ ଅଭିଯୋଗ ଅନୁସାରେ, ପୂର୍ବଥର ବିଜେପିର ବୋର୍ଡ ଗଠନ ହେବାର ସ୍ଥିତି ଥିଲେ ମଧ୍ୟ ମିଛ, ଛଳନା ଏବଂ ଗୁଣ୍ଡାଗିରି ମାଧ୍ୟମରେ ବୋର୍ଡ ଗଠନ କରାଯାଇଥିଲା। ଏଥର ଅଲୱରର ପାର୍ଷଦମାନେ କଂଗ୍ରେସ ଏବଂ ବିଶେଷ କରି ଟିକାରାମ ଜୁଲିଙ୍କୁ ଜବାବ ଦେଇଛନ୍ତି ବୋଲି ସେ କହିଥିଲେ।
ଅଲୱର ନଗର ନିଗମରେ ମୋଟ ୬୫ଟି ୱାର୍ଡ ମଧ୍ୟରୁ ଭାଜପା ୨୮ଟି ୱାର୍ଡରେ ବିଜୟୀ ହୋଇଥିବା ବେଳେ କଂଗ୍ରେସ ୨୩ଟି ୱାର୍ଡରେ ବିଜୟ ହାସଲ କରିଥିଲା। ମହାପୌର ନିର୍ବାଚନରେ ଭାଜପାର ସୁମନଲତା ଅଗ୍ରୱାଲଙ୍କୁ ୪୨ଟି ଭୋଟ ମିଳିଥିବା ବେଳେ କଂଗ୍ରେସ ପ୍ରାର୍ଥୀ ୨୩ଟି ଭୋଟ ପାଇଥିଲେ। ସ୍ବାଧୀନ ପ୍ରାର୍ଥୀ ଭାବେ ବିଜୟୀ ହୋଇଥିବା ୧୩ ଜଣ କାଉନସିଲର ସୁମନଲତାଙ୍କ ସପକ୍ଷରେ ଭୋଟ ଦେବାରୁ ଭାଜପା ମେୟର ପଦ ହାସଲ କରିଥିଲା।
ଉଲ୍ଲେଖଯୋଗ୍ୟ, ୨୦୧୯ରେ ଅଲୱରରେ ଭାଜପା ସର୍ବାଧିକ ସିଟ ଜିତିଥିଲେ ମଧ୍ୟ କ୍ରସ ଭୋଟିଂ ଏବଂ ସ୍ବାଧୀନ କାଉନସିଲରଙ୍କ କଂଗ୍ରେସ ସପକ୍ଷରେ ଯିବା କାରଣରୁ ମେୟର ନିର୍ବାଚନରେ ଦଳକୁ ପରାଜୟର ସାମ୍ନା କରିବାକୁ ପଡ଼ିଥିଲା।
Dharitri – Odisha’s No.1 Odia Daily
