ଚଣ୍ଡିଗଡ,୧୦।୫: ଭାଜପା ଯୁବ ନେତା ତେଜିନ୍ଦର ପାଲ୍ ସିଂ ବଗ୍ଗାଙ୍କୁ ଏକ ବଡ଼ ଆଶ୍ୱସ୍ତି ମିଳିଛି। ଗିରଫ ୱାରେଣ୍ଟ ମାମଲାରେ ପଞ୍ଜାବ-ହରିୟାଣା ହାଇକୋର୍ଟ ମଙ୍ଗଳବାର ଶୁଣାଣି କରି ତାଙ୍କ ଗିରଫଦାରୀକୁ ଜୁଲାଇ ୫ ପର୍ଯ୍ୟନ୍ତ ସ୍ଥଗିତ ରଖିଛନ୍ତି। ଦିଲ୍ଲୀର ଭାଜପା ନେତା ତେଜିନ୍ଦର ଦିନେ ପୂର୍ବରୁ ମୋହାଲି କୋର୍ଟ ଦେଇଥିବା ଗିରଫ ୱାରେଣ୍ଟରେ ରୋକ ଲଗାଇବାକୁ ହାଇକୋର୍ଟରେ ଆବେଦନ କରିଥିଲେ। ଏହାପୂର୍ବରୁ ପଞ୍ଜାବ ଏବଂ ହରିୟାଣା ହାଇକୋର୍ଟ ଗତ ଶନିବାର ତେଜିନ୍ଦରଙ୍କ ବିରୋଧରେ କୌଣସି ବାଧ୍ୟତାମୂଳକ ପଦକ୍ଷେପ ଗ୍ରହଣ ନ କରିବାକୁ ନିର୍ଦ୍ଦେଶ ଦେଇଥିଲେ।
ଭାରତୀୟ ଦଣ୍ଡବିଧି ଆଇନର ଧାରା ୧୫୩-ଏ, ୫୦୫ ଏବଂ ୫୦୬ ଅନୁଯାୟୀ ବଗ୍ଗାଙ୍କ ବିରୋଧରେ ଏକ ମାମଲା ରୁଜୁ ହୋଇଥିଲା। ବଗ୍ଗାଙ୍କୁ ଶୁକ୍ରବାର ତାଙ୍କ ଦିଲ୍ଲୀ ବାସଭବନରୁ ପଞ୍ଜାବ ପୋଲିସ ଗିରଫ କରିଥିଲା। ତେବେ ବଗ୍ଗାକୁ ପଞ୍ଜାବକୁ ନେଉଥିବା ପୋଲିସ କର୍ମଚାରୀଙ୍କୁ ହରିୟାଣାରେ ଅଟକାଇ ଦିଆଯିବା ପରେ ଦିଲ୍ଲୀ ପୋଲିସ ସେମାନଙ୍କୁ ଦିଲ୍ଲୀକୁ ଫେରାଇ ଆଣିଥିଲା।
