ମୁଜଫରପୁର,୮।୧୨: ବିହାର ମୁଖ୍ୟମନ୍ତ୍ରୀ ନୀତିଶ କୁମାର ଚଳିତ ବର୍ଷ ଅଗଷ୍ଟ ଭାଜପା ସହ ମେଣ୍ଟ ଭାଙ୍ଗିବା ପରେ କୁଢ଼ନି ଉପନିର୍ବାଚନର ଫଳାଫଳ ଭାଜପା ପାଇଁ ଏକ ବଡ଼ ବିଜୟ ବୋଲି କୁହାଯାଉଛି। ଅନ୍ୟପଟେ ଉପନିର୍ବାଚନର ଫଳାଫଳ ମୁଖ୍ୟମନ୍ତ୍ରୀ ନୀତିଶ କୁମାରଙ୍କୁ ଏକ ଝଟ୍କା ଲାଗିଛି। ଏହି ଉପନିର୍ବାଚନରେ ଲୋକମାନେ ଜନତା ଦଳ ୟୁନାଇଟେଡ(ଜେଡିୟୁ)କୁ ପ୍ରତ୍ୟାଖ୍ୟାନ କରି ଭାଜପାକୁ ସମର୍ଥନ ଜଣାଇଛନ୍ତି। ଏହି ଆସନର ପ୍ରାର୍ଥୀଙ୍କ ପାଇଁ ଖୋଦ୍ ମୁଖ୍ୟମନ୍ତ୍ରୀ ଜୋରଦାର ପ୍ରଚାର କରିଥିଲେ। କୁଢ଼ନିରେ ଭାଜପା ୩୬୩୨ ଭୋଟ ବ୍ୟବଧାନରେ ଜେଡିୟୁକୁ ହରାଇଛି। ଭାଜପା ପ୍ରାର୍ଥୀ କେଦାର ପ୍ରସାଦ ଗୁପ୍ତା ୭୬୬୪୮ ଭୋଟ ହାତେଇଥିବା ବେଳେ ଜେଡିୟୁ ପ୍ରାର୍ଥୀ ମନୋଜ କୁଶଓ୍ବା ୭୩୦୧୬ ଭୋଟ ପାଇଛନ୍ତି। ସବୁଠାରୁ ବଡ଼ କଥା ହେଉଛି ନୀତିଶ କୁମାର ଏନ୍ଡିଏମେଣ୍ଟରୁ ବାହାରିବା ପରେ ବିହାରରେ ଏହା ପ୍ରଥମ ନିର୍ବାଚନ ରହିଥିଲା। ଯେଉଁଠାରେ ଜେଡିୟୁର ସିଧାସଳଖ ପ୍ରତିଦ୍ୱନ୍ଦିତା ଭାଜପା ସହ ହୋଇଥିଲା।
