ନୂଆଦିଲ୍ଲୀ,୧୧।୯: ପେନଶନଧାରୀଙ୍କ ପାଇଁ ଏକ ବଡ଼ ଖୁସି ଖବର ଆସିଛି। ବିହାର ମୁଖ୍ୟମନ୍ତ୍ରୀ ସମ୍ରାଟ ଚୌଧୁରୀ ରାଜ୍ୟର ପ୍ରାୟ ୧୦୫.୬୮ ଲକ୍ଷ (୧.୦୫ କୋଟିରୁ ଅଧିକ) ପେନଶନଭୋଗୀଙ୍କ ବ୍ୟାଙ୍କ ଖାତାକୁ ଅଗଷ୍ଟ ମାସର ପେନଶନ ରାଶି ସିଧାସଳଖ ଟ୍ରାନ୍ସଫର (DBT) କରିଛନ୍ତି। ମୁଙ୍ଗେରରେ ଆୟୋଜିତ ଏକ ସୱତନ୍ତ୍ର କାର୍ଯ୍ୟକ୍ରମରେ ରିମୋଟ ବଟନ ଦବାଇ ମୋଟ ୧୨୩୩.୮୭ କୋଟି ଟଙ୍କା ସିଧାସଳଖ ହିତାଧିକାରୀଙ୍କ ବ୍ୟାଙ୍କ ଖାତାକୁ ପଠାଯାଇଛି।
ଅଗଷ୍ଟ ମାସର ପେନଶନ ବାବଦକୁ ପ୍ରତ୍ୟେକ ଯୋଗ୍ୟ ହିତାଧିକାରୀଙ୍କ ଖାତାକୁ ୧୧୦୦ ଟଙ୍କା ଲେଖାଏଁ ପଠାଯାଇଛି। ଏହି ପେନ୍ସନ ରାଶି ନିମ୍ନଲିଖିତ ସାମାଜିକ ସୁରକ୍ଷା ଯୋଜନା ଅଧୀନରେ ପ୍ରଦାନ କରାଯାଇଛି:
* ମୁଖ୍ୟମନ୍ତ୍ରୀ ବୃଦ୍ଧଜନ ପେନଶନ ଯୋଜନା
* ଲକ୍ଷ୍ମୀବାଈ ସାମାଜିକ ସୁରକ୍ଷା ପେନଶନ ଯୋଜନା
* ବିହାର ନିଶକ୍ତତା ପେନଶନ ଯୋଜନା (ଦିବ୍ୟାଙ୍ଗ ପେନଶନ)
* ଇନ୍ଦିରା ଗାନ୍ଧୀ ଜାତୀୟ ବାର୍ଦ୍ଧକ୍ୟ ପେନଶନ ଯୋଜନା
* ଇନ୍ଦିରା ଗାନ୍ଧୀ ଜାତୀୟ ବିଧବା ପେନଶନ ଯୋଜନା
* ଇନ୍ଦିରା ଗାନ୍ଧୀ ଜାତୀୟ ନିଶକ୍ତତା ପେନଶନ ଯୋଜନା
ଆପଣଙ୍କ ଖାତାକୁ ଟଙ୍କା ଆସିଛି କି ନାହିଁ, ଏହିପରି ଯାଞ୍ଚ କରନ୍ତୁ
ଯଦି ଆପଣ ମଧ୍ୟ ସାମାଜିକ ସୁରକ୍ଷା ପେନ୍ସନର ଲାଭ ଉଠାଉଛନ୍ତି, ତେବେ ନିଜ ବ୍ୟାଙ୍କ ବାଲାନ୍ସ ଯାଞ୍ଚ କରିବା ପାଇଁ ଏହି ସହଜ ଉପାୟଗୁଡ଼ିକୁ ଆପଣାଇ ପାରିବେ:
ଯଦି ଆପଣଙ୍କ ମୋବାଇଲ ନମ୍ୱର ବ୍ୟାଙ୍କ ଖାତା ସହିତ ଲିଙ୍କ ଥାଏ, ତେବେ ପେନ୍ସନ ଟଙ୍କା ଜମା ହେବା ମାତ୍ରେ ଆପଣଙ୍କ ଫୋନକୁ ମେସେଜ ଆସିଯାଇଥିବ।
ଯଦି ମୋବାଇଲକୁ ମେସେଜ ଆସିନାହିଁ କିମ୍ୱା ଫୋନ ବନ୍ଦ ଥିଲା, ତେବେ ନିକଟସ୍ଥ ବ୍ୟାଙ୍କ ଶାଖାକୁ ଯାଇ ପାସବୁକ ଅପଡେଟ କରାନ୍ତୁ।
ନିକଟସ୍ଥ ଏଟିଏମକୁ ଯାଇ ଆପଣ ମିନି ଷ୍ଟେଟମେଣ୍ଟ ବାହାର କରିପାରିବେ କିମ୍ୱା ବାଲାନ୍ସ ଯାଞ୍ଚ କରିପାରିବେ।
ଯଦି ଆପଣ Google Pay, PhonePe, Paytm କିମ୍ୱା ନେଟ ବ୍ୟାଙ୍କିଙ୍ଗ ବ୍ୟବହାର କରୁଛନ୍ତି, ତେବେ ଆପ ଜରିଆରେ ସିଧାସଳଖ ବ୍ୟାଙ୍କ ବାଲାନ୍ସ ଚେକ କରିପାରିବେ।
ଯଦି ବିହାର ସାମାଜିକ ସୁରକ୍ଷା ପେନ୍ସନ (ଯଥା ବୃଦ୍ଧ, ଦିବ୍ୟାଙ୍ଗ କିମ୍ୱା ବିଧବା ପେନ୍ସନ) ଟଙ୍କା ଆପଣଙ୍କ ବ୍ୟାଙ୍କ ଖାତାକୁ ଆସିନାହିଁ, ତେବେ ବ୍ୟସ୍ତ ହୁଅନ୍ତୁ ନାହିଁ। ବହୁ ସମୟରେ ବୈଷୟିକ ତ୍ରୁଟି କିମ୍ୱା କାଗଜପତ୍ର ଜନିତ ସମସ୍ୟା ଯୋଗୁଁ ରାଶି ଅଟକି ରହିଥାଏ। ଆପଣ ଘରେ ବସି କିମ୍ୱା ବ୍ଲକ କାର୍ଯ୍ୟାଳୟକୁ ଯାଇ ଏହାର ସମାଧାନ କରିପାରିବେ।
ପ୍ରଥମେ ଆପଣଙ୍କ ପେନ୍ସନ କେଉଁ କାରଣରୁ ବନ୍ଦ ରହିଛି ତାହା ଜାଣନ୍ତୁ। ବିହାର ସରକାରଙ୍କ ଅଫିସିଆଲ ୱେବସାଇଟ ଋ଼sspmis.bihar.gov.inଋ଼ କୁ ଯାଇ “Search Beneficiary Status” ବିକଳ୍ପ ଉପରେ କ୍ଲିକ କରନ୍ତୁ। ନିଜ ଜିଲ୍ଲା, ବ୍ଲକ ଏବଂ ବ୍ୟାଙ୍କ ଆକାଉଣ୍ଟ ନମ୍ୱର କିମ୍ୱା ଆଧାର ସଂଖ୍ୟା ଦେଇ ଷ୍ଟାଟସ ଯାଞ୍ଚ କରନ୍ତୁ। ଏଠାରେ ଟଙ୍କା ପ୍ରୋସେସ ହୋଇଛି ନା କୌଣସି ତ୍ରୁଟି ଯୋଗୁଁ ରିଜେକ୍ଟ ହୋଇଛି ତାହା ସ୍ପଷ୍ଟ ଜଣାପଡ଼ିବ।
ବର୍ତ୍ତମାନ ସମସ୍ତ ସରକାରୀ ପେନ୍ସନ ରାଶି DBT ଜରିଆରେ ପଠାଯାଉଛି। ଯଦି ଆପଣଙ୍କ ବ୍ୟାଙ୍କ ଖାତା ଆଧାର ତଥା ବ୍ୟାଙ୍କର NPCI ସର୍ଭର ସହିତ ସଂଯୁକ୍ତ ନାହିଁ, ତେବେ ଟଙ୍କା ଟ୍ରାନ୍ସଫର ହେବ ନାହିଁ। ବ୍ୟାଙ୍କ ଶାଖାକୁ ଯାଇ Aadhaar Seeding / NPCI Link ଫର୍ମ ପୂରଣ କରି ଜମା କରନ୍ତୁ।
ସାମାଜିକ ସୁରକ୍ଷା ପେନ୍ସନଭୋଗୀମାନଙ୍କ ପାଇଁ ପ୍ରତିବର୍ଷ ଜୀବନ ପ୍ରମାଣପତ୍ର (e-KYC) ଦେବା ବାଧ୍ୟତାମୂଳକ। ଯଦି ଆପଣଙ୍କ ବାୟୋମେଟ୍ରିକ କିମ୍ୱା ପ୍ରତ୍ୟକ୍ଷ ଯାଞ୍ଚ ବାକି ରହିଛି, ତେବେ ପେନ୍ସନ ବନ୍ଦ ହୋଇପାରେ। ତେଣୁ ନିକଟସ୍ଥ CSC କେନ୍ଦ୍ର କିମ୍ୱା ବ୍ଲକ କାର୍ଯ୍ୟାଳୟକୁ ଯାଇ ତୁରନ୍ତ e-KYC ସମ୍ପୂର୍ଣ୍ଣ କରନ୍ତୁ।
ଯଦି ଆପଣ ଦୀର୍ଘ ଦିନ ଧରି ବ୍ୟାଙ୍କ ଖାତାରେ କୌଣସି କାରବାର କରିନାହାନ୍ତି, ତେବେ ଖାତାଟି ନିଷ୍କ୍ରିୟ ହୋଇଯାଏ। ବ୍ୟାଙ୍କକୁ ଯାଇ କିଛି ଟଙ୍କାର କାରବାର କରନ୍ତୁ କିମ୍ୱା KYC ଅପଡେଟ କରି ଖାତାଟିକୁ ପୁନର୍ୱାର ସକ୍ରିୟ କରନ୍ତୁ।
