ମୋହନା,୧୯ା୭(ମନ୍ମଥ ମିଶ୍ର): ଗଜପତି ଜିଲା ଅଡବା ପୋଲିସକୁ ଏକ ବଡ଼ ସଫଳତା ମିଳିଛି । ଶନିବାର ବିଳମ୍ବିତ ରାତିରେ ପୋଲିସ ପାଟ୍ରୋଲିଂ କରିବା ସମୟରେ ୪୦ କିଲୋ ଗଞ୍ଜେଇ ସହ କେରଳ ରାଜ୍ୟର ଜଣେ ମାଫିଆକୁ ଗିରଫ କରିଛି । ଜବତ ଗଞ୍ଜେଇକୁ ଯାତ୍ରୀବାହୀ ବସ୍ ଯୋଗେ ଚୋରା ଚାଲାଣ କରାଯିବାକୁ ଯୋଜନା ଥିବା ନେଇ ଜଣାପଡ଼ିଥିଲା । ବିରିକୋଟ ଶିବ ମନ୍ଦିର ନିକଟରେ ପୋଲିସ ପେଟ୍ରୋଲିଂ କରୁଥିବା ବେଳେ ଜଣେ ସନ୍ଦିଗ୍ଧ ବ୍ୟକ୍ତିଙ୍କୁ ଅଟକ ରଖି ତଦନ୍ତ କରିଥିଲା। ଏକଜୁଟିଭ ମାଜିଷ୍ଟ୍ରେଟ ଓ ସାକ୍ଷୀଙ୍କ ଉପସ୍ଥିତିରେ ତଲାସି ବେଳେ ଦୁଇଟି ପ୍ଲାଷ୍ଟିକ୍ ଜରି ବ୍ୟାଗରୁ ୪୦ କିଲୋଗ୍ରାମ ଗଞ୍ଜେଇ ବାହାରିଥିଲା ।
ଗିରଫ ମାଫିଆ ଜଣକ ହେଲେ କେରଳର କୋଟ୍ଟାୟମ ଜିଲାର ୪୭ ବର୍ଷୀୟ ସାଜନ ଥୋମାସ। ତାଙ୍କ ନିକଟରୁ ଏକ ମୋବାଇଲ ଫୋନ୍, ୩୫୦ ଟଙ୍କା ନଗଦ ଏବଂ ଗୋଟିଏ ଇଲେକ୍ଟ୍ରୋନିକ୍ ଓଜନ ମେସିନ୍ ମଧ୍ୟ ଜବତ କରାଯାଇଛି । ଅଭିଯୁକ୍ତଙ୍କ ବିରୋଧରେ ଏନ୍ଡିପିଏସ୍ ଆଇନର ଧାରାରେ ମାମଲା ରୁଜୁ କରାଯାଇ କୋର୍ଟ ଚାଲାଣ କରାଯାଇଛି। ଏହି ଗଞ୍ଜେଇ କେଉଁଠାରୁ ଆସିଥିଲା, କାହା ପାଖକୁ ଯିବାର ଯୋଜନା ଥିଲା ଏବଂ ଏହି ଚୋରା ଚାଲାଣ ସମ୍ପର୍କ ରେ ଆଉ କିଏ କିଏ ସଂପୃକ୍ତ ଅଛନ୍ତି ତଦନ୍ତ ଜାରି ରହିଥିବା ଅଡବା ଥାନା ଅଧିକାରୀ ସନ୍ତୋଷ ବିଶୋୟୀ କହିଛନ୍ତି ।
