ଗଞ୍ଜାମ, ୨୧ା୧୨: (ବିଦ୍ୟାଧର ସାହୁ ): ଗତ କିଛି ମାସ ତଳେ ରମ୍ଭା ଓ ଗଞ୍ଜାମ ଅଞ୍ଚଳ ଶିବ ମନ୍ଦିର ଗୁଡିକରୁ ଲୁଟ ଘଟଣାରେ ରମ୍ଭା ପୋଲିସକୁ ମିଳିଛି ବଡ଼ ସଫଳତା। ସିରିଜ ଲୁଟ ଘଟଣାର ପରଦା ହଟାଇଛି ପୋଲିସ। ଉକ୍ତ ଚୋରୀ ଘଟଣାରେ ମାଷ୍ଟର ମାଇଣ୍ଡ ସମେତ ଦୁଇଜଣ ଲୁଟେରାକୁ ଶନିବାର ଗିରଫ କରି କୋର୍ଟ ଚାଲାଣ କରାଯାଇଥିବା ରମ୍ଭା ଥାନା ଆଇଆଇସି ସତ୍ୟବ୍ରତ ଭୁତ୍ତିଆ ସୂଚନା ଦେଇଛନ୍ତି।
ଅଭିଯୁକ୍ତମାନେ ହେଲେ ରମ୍ଭା ଥାନା ଲାଉପୁଟ ଭାସ୍କର ପ୍ରଧାନ (ରାଜୁ ),ବ୍ରହ୍ମପୁର ସଦର ଥାନା କୁକୁଡାଖଣ୍ଡି ଅଞ୍ଚଳର ଏସ ବାବୁଲା ଏବଂ ମଲାଡ଼ ଗୋଡ଼ିବନ୍ଧ ଏ ରାମଚନ୍ଦ୍ର। ଲୁଟରେ ବ୍ୟବହୃତ ଲୁହା ରଡ଼, ହାମର ଓ ୧୨୫୦ ଟଙ୍କା ଜବତ କରାଯାଇଥିବା ରମ୍ଭା ଥାନା ପୋଲିସ ପକ୍ଷରୁ କୁହାଯାଇଛି।
ଅଭିଯୁକ୍ତମାନେ ସାବୁଲିଆ ଶିବ ମନ୍ଦିର, ସନ୍ତୋଷ ପୁର ସତ୍ୟସାଇ ମନ୍ଦିର, ଶତ୍ରୁଷୋଲ ମୁକ୍ତେଶ୍ଵର ମନ୍ଦିର, କଣ୍ଟିଆ ଗଡ଼ ବଟେଶ୍ୱର ମନ୍ଦିର, ସlତୁଳୀ ମକରେଶ୍ୱର ମନ୍ଦିର, ବୋରିଗାଁ ଝାଡ଼େଶ୍ୱର ମନ୍ଦିର, ଦାମୋଦର ପୁର ଆଖଣ୍ଡଳମଣି ମନ୍ଦିର, ଏବଂ ମଲାଡ଼ର ଏକ ଗ୍ରୋସରୀ ଦୋକାନରୁ ଚୋରୀ କରିଥିବା ପୋଲିସ ସୂଚନା ଦେଇଛି।
ପ୍ରକାଶ ଯୋଗ୍ୟ ଗତ ଚାରି ପାଞ୍ଚ ଦିନ ପୂର୍ବରୁ ଲୁଟେରା ଗ୍ୟାଙ୍ଗର ମାଷ୍ଟର ମାଇଣ୍ଡ ପୋଲିସ ହାତରେ ଧରା ପଡିଥିଲେ ସୁଦ୍ଧା ତଦନ୍ତରେ କାଳେ ବାଧା ଉପୁଜିବ ବୋଲି ମୁଁହ ଖୋଲୁନଥିଲା ରମ୍ଭା ଥାନା କିମ୍ଵା ହୁମା ଫାଣ୍ଡି ପୋଲିସ। ଏଥିପାଇଁ ଛତ୍ରପୁର ଏସଡିପିଓ ଗୌରହରୀ ସାହୁଙ୍କ ନେତୃତ୍ୱରେ ରମ୍ଭା ଗଞ୍ଜାମ ଥାନା ପୋଲିସ ମାଷ୍ଟର ମାଇଣ୍ଡକୁ ଘନ ଘନ ଜେରା କରୁଥିଲା। ଅନ୍ୟପଟେ ବିଳମ୍ବିତ ରାତିରେ ଗୋଟିଏ ଜଣେ ବ୍ୟକ୍ତି ଚାଦର ଘୋଡେଇ ହୋଇ ମନ୍ଦିରରୁ ବାହାରୁଥିବା ସିସିଟିଭି ଫୁଟେଜ ଜାଣିବାକୁ ପାଇଛି। ତାକୁ ଆଧାର କରି ପୋଲିସର ତଦନ୍ତ ଜାରି ରଖିଥିଲା।
