ସୋନପୁର,୧୭।୯(ମୃତ୍ୟୁଞ୍ଜୟ ଶତପଥୀ): ଧରିତ୍ରୀର ପୂର୍ବାନୁମାନ ସତ ସାବ୍ୟସ୍ତ ହୋଇଛି। ସୁବର୍ଣ୍ଣପୁର ଜିଲା ତରଭା ବ୍ଲକର ବିଭିନ୍ନ ପଞ୍ଚାୟତରୁ ୨୦ରୁ ଉର୍ଦ୍ଧ ବିଜେଡି ସମର୍ଥିତ ସରପଞ୍ଚ, ସମିତି ସଭ୍ୟ ଓ ୩ଜଣ ପ୍ରାଥମିକ କୃଷି ସମବାୟ ସମିତି(ପାକ୍ସ)ର ସଭାପତି ଭାଜପାରେ ସାମିଲ ହୋଇଛନ୍ତି। ସେହିପରି ବିଜେଡିର ପ୍ରାକ୍ତନ ଜିଲା ପରିଷଦ ସଦସ୍ୟ, ପ୍ରାକ୍ତନ ସରପଞ୍ଚ, ସମିତି ସଭ୍ୟ ଓ ଛାମୁଆ ନେତାମାନେ ମଧ୍ୟ ଭାଜପାରେ ମିଶିଛନ୍ତି। ସୋମବାର ସନ୍ଧ୍ୟାରେ ବଲାଙ୍ଗୀର ଏମ୍ପି ସଙ୍ଗୀତା କୁମାରୀ ସିଂଦେଓଙ୍କ ପାଟଣାଗଡ ସ୍ଥିତ ବାସଭବନରେ ଏକ ମିଶ୍ରଣ ପର୍ବ ଅନୁଷ୍ଠିତ ହୋଇଥିଲା। ଏଥିରେ ପଞ୍ଚାୟତସ୍ତରୀୟ ଲୋକ ପ୍ରତିନିଧି ଓ ଛାମୁଆ ନେତାମାନେ ଭାଜପାରେ ସାମିଲ ହୋଇଥିଲେ। ଦଳରେ ନୂତନ ଭାବେ ଯୋଗ ଦେଇଥିବା ନେତୃବୃନ୍ଦଙ୍କୁ ଏମ୍ପି ସିଂଦେଓ ଦଳୀୟ ଉତ୍ତରୀୟ ଦେଇ ସ୍ବାଗତ କରିଥିଲେ। ନିର୍ବାଚନମଣ୍ଡଳୀର ଲୋକ ପ୍ରତିନିଧି ଓ ଛାମୁଆ ନେତା ଭାଜପାରେ ସାମିଲ ହେବା ସୋନପୁର ବିଧାୟକ ତଥା ପ୍ରାକ୍ତନ ମନ୍ତ୍ରୀ ନିରଞ୍ଜନ ପୂଜାରୀଙ୍କ ପାଇଁ ଶକ୍ତ ଧକ୍କା ସଦୃଶ ହୋଇଛି।
ବିଜେଡିରୁ ସାମୂହିକ ଇସ୍ତଫା ଦେବେ ନେତୃବୃନ୍ଦ, ତରଭାରେ ବଦଳୁଛି ରାଜନୈତିକ ସମୀକରଣ ଶୀର୍ଷକ ଖବର କେବଳ ଧରିତ୍ରୀରେ ଗତ ୧୩ତାରିଖରେ ପ୍ରକାଶ ପାଇଥିଲା। ସୋନପୁର ବିଧାୟକ ପୂଜାରୀଙ୍କ ନିର୍ବାଚନ ମଣ୍ଡଳୀ ଅଧିନ ତଥା ବିଜେଡି ଜିଲା ସଭାପତି ସରୋଜ କମ୍ପ ନିଜେ ତରଭା ପଞ୍ଚାୟତ ସମିତି ଅଧ୍ୟକ୍ଷ ଥିବା ବେଳେ ଲୋକ ପ୍ରତିନିଧିଙ୍କ ଦଳରୁ ଇସ୍ତଫା ଦେବା ଖବରକୁ ଲୋକେ ବିଶ୍ୱାସ କରି ପାରି ନଥିଲେ। ତେବେ ମଙ୍ଗଳବାର ଏମ୍ପି ସିଂହଦେଓ ଏ ସମ୍ପର୍କରେ ପଟୋ ସହିତ ନିଜ ଫେସବୁକ୍ ଆକାଉଣ୍ଟରେ ପୋଷ୍ଟ କରିଥିଲେ। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ବିକଶିତ ଭାରତ ଓ ଜନକଲ୍ୟାଣକାରୀ ଯୋଜନାକୁ ସମର୍ଥନ କରି ତରଭା ବ୍ଳକ ବିଜେଡିର ପ୍ରଞ୍ଚାୟତସ୍ତରୀୟ ଲୋକ ପ୍ରତିନିଧି ଭାଜପାରେ ସାମିଲ ହୋଇଥିବା ସେ ଉଲ୍ଲେଖ କରିଥିଲେ। ନିମିଷକ ମଧ୍ୟରେ ତାହା ସୋସିଆଲ ମିଡିଆରେ ଭାଇରାଲ ହୋଇଥିଲା। ଅନ୍ୟପକ୍ଷେ ରାଜ୍ୟ ନେତୃତ୍ୱଙ୍କ ଉପସ୍ଥିତିରେ ତରଭାରେ ଏକ ବଡ ଧରଣର ମିଶ୍ରଣ ପର୍ବ ଆୟୋଜନ ହେବ ବୋଲି ଭାଜପା ପକ୍ଷରୁ ସୂଚନା ମିଳିଛି।
୨୦୨୪ ସାଧାରଣ ନିର୍ବାଚନରେ ରାଜ୍ୟରେ ସରକାର ପରିବର୍ତ୍ତନ ହେବା ପରେ ବିଜେଡି ଗଡ ସୁବର୍ଣ୍ଣପୁର ଜିଲାରେ ରାଜନୈତିକ ସମୀକରଣ ବଦଳିବାରେ ଲାଗିଛି। ଜିଲାର ବୀରମହାରାଜପୁର ବିଧାନସଭା ନିର୍ବାଚନ ମଣ୍ଡଳୀରେ ଭାଜପା ପ୍ରଥମ ଥର ଖାତା ଖୋଲିବାକୁ ସକ୍ଷମ ହୋଇଥିଲା। ଦଳର ଯୁବ ନେତା ଇଂ ରଘୁନାଥ ଜଗଦଲା ବିପୁଳ ଭୋଟ ବ୍ୟବଧାନରେ ବିଜୟୀ ହୋଇଥିଲେ। ସୋନପୁର ବିଧାନସଭା ଆସନକୁ ଭାଜପା ହାତେଇ ପାରି ନଥିଲେ ମଧ୍ୟ ରାଜ୍ୟରେ ଅଭୂତପୂର୍ବ ବିଜୟ ପରେ ଏବେ ତୃଣମୂଳସ୍ତରରେ ସଂଗଠନକୁ ଦଳ ଟାର୍ଗେଟ୍ କରିଛି। ପ୍ରଥମ ପଦକ୍ଷେପ ସ୍ବରୂପ ତରଭା ବ୍ଲକରେ ବିଜେଡି ଗଡ ଭୁଶୁଡାଇବାରେ ସଫଳ ହୋଇଛି ଦଳ। ବିଜେଡିରୁ ଇସ୍ତଫା ଦେଇ ଭାଜପାରେ ସାମିଲ ହୋଇଥିବା ପଞ୍ଚାୟତ ପ୍ରତିନିଧିମାନେ ହେଲେ ମେଣ୍ଡା ସରପଞ୍ଚ ଲିଜାରାଣୀ ଦଣ୍ଡସେନା, ସମିତି ସଭ୍ୟ ବିଷ୍ଣୁପ୍ରିୟା ମିଶ୍ର, ଜରାଜାରିଙ୍ଗ ସରପଞ୍ଚ ସଦା ପାତ୍ର, ଶିବତୁଲା ସରପଞ୍ଚ ମୁକ୍ତା ନାଗ, ଝାରତରଭା ସରପଞ୍ଚ ସୌଦାମିନୀ ସା, ମରାଡୁଗୋଛା ସରପଞ୍ଚ ମନମୋହନ ସାହୁ, ବ୍ରାହ୍ମଣୀ ସରପଞ୍ଚ କୁଶଲେଶ୍ୱର ପାଣ୍ଡେ, ଦୁବୁଲା ସରପଞ୍ଚ ଆର୍ତ୍ତତ୍ରାଣ ବଗର୍ତ୍ତି, ତୁଲୁଣ୍ଡା ସରପଞ୍ଚ ଉମା ସାହୁ, ସିଂହାରୀ ସରପଞ୍ଚ ଭୂମତୀ ଘିବିଲା, ସମିତି ସଭ୍ୟ ରଶ୍ମିତା କୁଅଁର, କୁମ୍ଭାରମୁଣ୍ଡା ସରପଞ୍ଚ ସବିତା ପାତ୍ର, ସମିତି ସଭ୍ୟ ସୀତା ସେଠୀ ଓ ଚାରଭଟା ସରପଞ୍ଚ ସସ୍ମିତା ହରିପାଲ। ସେହିପରି ପାଇକବାହାଲ ପାକ୍ସ ସଭାପତି ରାଜେନ୍ଦ୍ର ପଣ୍ଡା, ଶିବତୁଲା ପାକ୍ସ ସଭାପତି ତପନ କୁମାର ଅଗ୍ରଓ୍ବାଲ, ଦୁବୁଲା ପାକ୍ସ ସଭାପତି ବିଶେଶ୍ୱର ସାହୁ, ପ୍ରାକ୍ତନ ଜିଲା ପରିଷଦ ସଦସ୍ୟ ତଥା ଚାରଭଟାର ପ୍ରାକ୍ତନ ସରପଞ୍ଚ ପ୍ରଭାତ ପାତ୍ର, ସରଗଜ ପଞ୍ଚାୟତର ପ୍ରାକ୍ତନ ସମିତି ସଭ୍ୟ ତଥା ଚାଷୀ ନେତା ମିତ୍ରବ୍ରତ ମିଶ୍ର ଓ ପାଇକବାହାଲର ପ୍ରାକ୍ତନ ସରପଞ୍ଚ ଗଣନାଥ ସାହୁ ପ୍ରମୁଖ ବିଜେଡିରୁ ଇସ୍ତଫା ଦେଇ ଭାଜପାରେ ଯୋଗ ଦେଇଛନ୍ତି। ଏମ୍ପିଙ୍କ ପ୍ରତିନିଧି ସାନନ୍ଦ ମେହେର, ବରିଷ୍ଠ ନେତା ରାଜକିଶୋର ମେଣ୍ଡିଲି ପ୍ରମୁଖ ଏହି ଅବସରରେ ଉପସ୍ଥିତ ଥିଲେ। ୨୧ଟି ପଞ୍ଚାୟତକୁ ନେଇ ଗଠିତ ତରଭା ବ୍ଳକରେ ସଂଖ୍ୟାଧିକ ସରପଞ୍ଚ ଓ ସମିତି ସଭ୍ୟ ବିଜେଡି ଦଳ ସମର୍ଥିତ। ବିଧାୟକ, ଜିଲା ପରିଷଦ ସଦସ୍ୟ ଓ ପଞ୍ଚାୟତ ସମିତି ଅଧ୍ୟକ୍ଷ ବିଜେଡିର। ଏଭଳି ସ୍ଥିତିରେ ପଞ୍ଚାୟତସ୍ତରୀୟ ଲୋକ ପ୍ରତିନିଧି ଓ ବରିଷ୍ଠ ନେତା ଦଳ ପରିତ୍ୟାଗ କରିବା ପରେ ଭାଜପା ଓ ବିଜେଡି ମଧ୍ୟରେ ପତିଆରାର ଲଢେଇ ଆରମ୍ଭ ହୋଇଛି। ଉଭୟ ଦଳର ନେତୃବୃନ୍ଦ ରାଜନୈତିକ ଗୋଟିଚାଳନାରେ ବ୍ୟସ୍ତ ଅଛନ୍ତି।
