ନୂଆଦିଲ୍ଲୀ, ୨୯।୭: ମଧ୍ୟପ୍ରଦେଶର ରାଜଧାନୀ ଭୋପାଳରେ ବୁଧବାରକୃଷକମାନଙ୍କର ପ୍ରଦର୍ଶନ ଜାରି ରହିଛି। ‘କିଷାନ କ୍ରାନ୍ତି ପଦଯାତ୍ରା’ ଭୋପାଳରେ ପହଞ୍ଚିସାରିଛି ଏବଂ ବର୍ତ୍ତମାନ ଆନ୍ଦୋଳନରତ କୃଷକମାନେ ଭୋପାଳରେ ମୁଖ୍ୟମନ୍ତ୍ରୀ ବାସଭବନ ଆଡ଼କୁ ପଦଯାତ୍ରା କରିବାକୁ ଯାଉଛନ୍ତି। ସରକାର ଶତ ପ୍ରତିଶତ ମୁଗ କ୍ରୟ ଏବଂ ସାର ବଣ୍ଟନ ବ୍ୟବସ୍ଥାକୁ ଠିକ କରନ୍ତୁ ଏହା ହେଉଛି କୃଷକମାନଙ୍କର ମୁଖ୍ୟ ଦାବି।
ସୂଚନା ଅନୁଯାୟୀ, ଗତକାଲି (ମଙ୍ଗଳବାର, ଜୁଲାଇ ୨୭) ବିଳମ୍ବିତ ରାତିରେ କୃଷି ମନ୍ତ୍ରୀ ଏଦଲ ସିଂହ କଂସାନା କୃଷକମାନଙ୍କ ସହିତ ଆଲୋଚନା କରି ସେମାନଙ୍କୁ ବୁଝାଇବାକୁ ଚେଷ୍ଟା କରିଥିଲେ, କିନ୍ତୁ ଏହି ବୈଠକ କୌଣସି ନିଷ୍କର୍ସରେ ପହଞ୍ଚି ପାରି ନଥିଲା। ଏହା ପରେ ବର୍ତ୍ତମାନ କୃଷକମାନେ ମୁଖ୍ୟମନ୍ତ୍ରୀଙ୍କ ବାସଭବନ ଘେରାଉ କରିବାକୁ ଯାଉଛନ୍ତି। ରାତିସାରା ଧାରଣାରେ ବସିଥିବା କୃଷକମାନଙ୍କର କହିବା କଥା ଯେ, ଯେପର୍ଯ୍ୟନ୍ତ ସେମାନଙ୍କର ସମସ୍ତ ଦାବି ପୂରଣ ନ ହୋଇଛି, ସେପର୍ଯ୍ୟନ୍ତ ସେମାନେ ଧାରଣାରେ ହିଁ ବସି ରହିବେ ଏବଂ ଆନ୍ଦୋଳନର ରୂପ ଅଧିକ ବ୍ୟାପକ ହେବ। ଆଜି ସେମାନେ ମୁଖ୍ୟମନ୍ତ୍ରୀଙ୍କ ବାସଭବନକୁ ଯିବେ। କୃଷକମାନଙ୍କ ଦାବି ରହିଛି ଯେ ସେମାନେ କେନ୍ଦ୍ରୀୟ ମନ୍ତ୍ରୀ ଶିବରାଜ ସିଂହ ଚୌହାନଙ୍କ କ୍ଷେତ୍ରରୁ ଆସିଛନ୍ତି, କିନ୍ତୁ ସେମାନେ ତାଙ୍କ ଉପରେ ମଧ୍ୟ ଅସନ୍ତୁଷ୍ଟ ଅଛନ୍ତି; କାରଣ କେନ୍ଦ୍ର ଓ ରାଜ୍ୟ ସରକାରଙ୍କ ପରସ୍ପର ଉପରେ ଦୋଷ ଲଦିବାର ଖେଳ ଯୋଗୁଁ କୃଷକମାନେ ସଙ୍କଟରେ। କୃଷକମାନଙ୍କ ଅଭିଯୋଗ ରହିଛି ଯେ ସରକାର ହିଁ ମୁଗ ଉତ୍ପାଦନ ବୃଦ୍ଧି କରାଇଥିଲେ ଏବଂ ବର୍ତ୍ତମାନ କିଣିବାରୁ ପଛଘୁଞ୍ଚା ଦେଉଛନ୍ତି। କୃଷକମାନଙ୍କୁ ପ୍ରତି ଏକର ପିଛା ୧୦-୧୨ ହଜାର ଟଙ୍କାର କ୍ଷତି ସହିବାକୁ ପଡ଼ୁଛି ଏବଂ ଏହି କାରଣରୁ ସେମାନେ ଆନ୍ଦୋଳନ କରିବାକୁ ବାଧ୍ୟ ହୋଇଛନ୍ତି।
କୃଷକମାନଙ୍କ କହିବା ଅନୁଯାୟୀ, ଏଥର ଏହି ଆନ୍ଦୋଳନରେ କୌଣସି ପଗଡ଼ି ପିନ୍ଧିଥିବା ବୟସ୍କ କୃଷକ ଦେଖିବାକୁ ମିଳୁନାହାନ୍ତି; ବରଂ ଏହି ମୋର୍ଚ୍ଚାକୁ ଯୁବ ଏବଂ ଜେନ-ଜି (Gen-Z) କୃଷକମାନେ ସମ୍ଭାଳିଛନ୍ତି। ସେମାନଙ୍କ ଦାବି ରହିଛି ଯେ ଯୁବକମାନଙ୍କ ଶକ୍ତି ସରକାର ଦିଲ୍ଲୀରେ ଦେଖିସାରିଛନ୍ତି ଏବଂ ଆବଶ୍ୟକ ପଡ଼ିଲେ ଭୋପାଳରେ ମଧ୍ୟ ଦେଖାଇଦେବେ।
ରାଜଧାନୀ ଭୋପାଳ ଆସିବା ପୂର୍ବରୁ ଏହି କୃଷକମାନେ ଗତ ୨୫ ଦିନ ଧରି ଜିଲା ମୁଖ୍ୟାଳୟମାନଙ୍କରେ ବସି ରହିଥିଲେ, କିନ୍ତୁ ସ୍ଥାନୀୟ ପ୍ରଶାସନ ଏବଂ ମନ୍ତ୍ରୀମାନେ ଏହି କଥାକୁ ଗମ୍ଭୀରତାର ସହ ନେଇ ନଥିଲେ। ବର୍ତ୍ତମାନ ରାଜଧାନୀରେ ବସିଥିବା ଅଧିକାଂଶ କୃଷକ ନର୍ମଦାପୁରମ ଏବଂ ଏହାର ଆଖପାଖ ୧୨ଟି ଜିଲାରୁ ଆସିଛନ୍ତି। ଏହି କୃଷକମାନେ ନର୍ମଦା ନଦୀ ଆଖପାଖ ଅଞ୍ଚଳର ଅଟନ୍ତି।
ସୂଚନା ଅନୁଯାୟୀ, କୃଷକମାନେ ଆଠଟି ଦାବିକୁ ନେଇ ଅଟଳ ଅଛନ୍ତି, କିନ୍ତୁ ସରକାରଙ୍କ ସହ ଆଲୋଚନା ପାଇଁ ଆସିଥିବା ୧୩ଟି ସଂଗଠନର ପ୍ରତିନିଧିମଣ୍ଡଳ ଜଣାଇଛନ୍ତି ଯେ ସେଠାରେ ଦୁଇଟି ମୁଖ୍ୟ ଦାବି ରହିଛି, ଯାହାକୁ ସରକାରଙ୍କୁ ମାନିବାକୁ ପଡ଼ିବ। ପ୍ରଥମଟି ମୁଗ ଫସଲର ଶତ ପ୍ରତିଶତ କ୍ରୟ କରାଯାଉ ଏବଂ ଦ୍ୱିତୀୟଟି ସାର ବଣ୍ଟନରେ ଟୋକନ ବ୍ୟବସ୍ଥାକୁ ସମ୍ପୂର୍ଣ୍ଣ ବନ୍ଦ କରାଯାଉ।
