ବଲାଙ୍ଗୀର,୨୮ା୯(ବୀରେନ୍ଦ୍ର କୁମାର ଝାଙ୍କର): ବଲାଙ୍ଗୀର ଭୀମ ଭୋଇ ମେଡିକାଲ କଲେଜ ହସ୍ପିଟାଲରେ ରୋଗୀ ଚିକିତ୍ସା ସେବା ଏବେ ପ୍ରହସନରେ ପରିଣତ ହୋଇଛି। ବିଶେଷକରି ହସ୍ପିଟାଲର ଡାଇଲିସିସ୍ ୱାର୍ଡରେ ରୋଗୀଙ୍କ ଜୀବନ ସହ ଖେଳ ଖେଳାଯାଉଛି ଓ ଚିକିତ୍ସା ନାମରେ ମାନସିକ ଏବଂ ଆର୍ଥିକ ଶୋଷଣ କରାଯାଉଥିବା ଅଭିଯୋଗ ହୋଇଛି। ଚିକିତ୍ସା ସେବାଜନିତ ଅସୁବିଧା ଓ ହସ୍ପିଟାଲ ଷ୍ଟାଫ୍ଙ୍କ ଦୁର୍ବ୍ୟବହାର ସମ୍ପର୍କରେ ଉପରିସ୍ଥ ଅଧିକାରୀଙ୍କୁ ଜଣାଇଲେ ସମାଧାନ ବ୍ୟବସ୍ଥା କରା ନ ଯାଇ ରୋଗୀଙ୍କ ଚିକିତ୍ସା ବନ୍ଦ କରିଦିଆଯିବ ବୋଲି ଧମକ ଦିଆଯାଉଥିବା ଅଭିଯୋଗ ହୋଇଛି। ଏଭଳି ଗୁରୁତର ଅଭିଯୋଗ ହେବା ପରେ ବୁଧବାର ବଲାଙ୍ଗୀର ଏମ୍ପି ସଙ୍ଗୀତା କୁମାରୀ ସିଂଦେଓ ଡାଇଲିସିସ୍ ୱାର୍ଡର କେତେଜଣ ରୋଗୀଙ୍କ ଉପସ୍ଥିତିରେ ଜିଲାପାଳ ଚଞ୍ଚଳ ରାଣାଙ୍କ ସହ ଜିଲାପାଳଙ୍କ ଅଫିସରେ ଆଲୋଚନା କରିଥିଲେ। ଏହି ଆଲୋଚନା ବେଳେ ହସ୍ପିଟାଲ ଅଧୀକ୍ଷକ ଡା ମାନସୀ ପଣ୍ଡା ଓ ଅନ୍ୟ ଅଧିକାରୀ ଉପସ୍ଥିତ ଥିଲେ।
ହସ୍ପିଟାଲ ଡାଇଲିସିସ୍ ୱାର୍ଡରେ କିଡନୀ ରୋଗୀଙ୍କୁ ଉପଯୁକ୍ତ ଚିକିତ୍ସା କରାଯାଉନଥିବା, ଠିକ୍ ଭାବେ ଡାଇଲିସିସ୍ କରାଯାଉ, ରୋଗୀଙ୍କୁ ରକ୍ତ ଚଢ଼ାଇବା ବେଳେ ହଇରାଣ କରାଯାଉଥିବା ଏବଂ କିଛି କହିଲେ ଦୁର୍ବ୍ୟବହାର ପ୍ରଦର୍ଶନ କରାଯାଉଥିବା ନେଇ ରୋଗୀମାନେ କିଛିଦିନ ପୂର୍ବରୁ ସିଂଦେଓଙ୍କଠାରେ ଅଭିଯୋଗ କରିଥିଲେ। ରୋଗୀମାନେ ସିଧାସଳଖ ହସ୍ପିଟାଲ ଅଧୀକ୍ଷକ ଡା ପଣ୍ଡାଙ୍କ ବିରୋଧରେ ଅଭିଯୋଗ ଆଣିଥିଲେ। ରୋଗୀମାନେ କୌଣସି ପ୍ରକାର ଅସୁବିଧାକୁ ନେଇ ଅଭିଯୋଗ କଲେ ସେ ରୋଗୀମାନଙ୍କୁ ଚିକିତ୍ସା ବନ୍ଦ କରିଦେବେ ବୋଲି ଧମକ ଦେଉଥିବା ଅଭିଯୋଗ କରିଥିଲେ। ହସ୍ପିଟାଲରେ ଡାଇଲିସିସ୍ ପରିଚାଳନା ଦାୟିତ୍ୱ ଦେଇଥିବା ରାହି କେୟାର ସଂସ୍ଥା ପକ୍ଷରୁ ଯେଭଳି ଅବହେଳା ଏବଂ ନିମ୍ନମାନର ଚିକିତ୍ସା ସେବା ଯୋଗାଯାଉଛି ସେଥିରେ ରୋଗୀଙ୍କ ଜୀବନ ଚାଲିଯିବା ବିପଦ ଦେଖାଯାଇଛି ବୋଲି କହିଥିଲେ। ଡାଇଲିସିସ୍ ମେଶିନ୍ର ଉପଯୁକ୍ତ ସର୍ଭିସିଂ କରାଯାଉ ନ ଥିବା, ନିର୍ଦ୍ଧାରିତ ବ୍ୟବଧାନରେ ଏଥିରେ ଉପକରଣ ପରିବର୍ତ୍ତନ କରାଯାଉନାହିଁ। ଏହାଫଳରେ ରୋଗୀମାନେ ଆରୋଗ୍ୟ ହେବା ପରିବର୍ତ୍ତେ ଅଧିକ ସଂକ୍ରମିତ ଏବଂ କଷ୍ଟ ପାଉଥିବା କହିଥିଲେ। ରାହି କେୟାର ସଂସ୍ଥାର କର୍ମଚାରୀ ଏବଂ ଅଧିକାରୀଙ୍କ ଦୁର୍ବ୍ୟବହାର ସମ୍ପର୍କରେ କହିଥିଲେ। ସମସ୍ତ ଅଭିଯୋଗ ଶୁଣିବା ପରେ ଏମ୍ପି ସିଂଦେଓ ଜିଲାପାଳ ରାଣାଙ୍କ ଉପସ୍ଥିତିରେ ଅଧୀକ୍ଷକଙ୍କୁ ରୋଗୀ ଓ ପରିଜନ କାହିଁକି ଗୁରୁତର ଅଭିଯୋଗ କରୁଛନ୍ତି ବୋଲି ପ୍ରଶ୍ନ କରିଥିଲେ। ଜିଲାପାଳଙ୍କୁ ସମାଧାନ ପନ୍ଥା କ’ଣ ବୋଲି ପଚାରିଥିଲେ। କେନ୍ଦ୍ର ଏବଂ ରାଜ୍ୟ ସରକାର ଲୋକଙ୍କ ଉତ୍ତମ ଚିକିତ୍ସା ସେବା ଏବଂ ହସ୍ପିଟାଲ ପରିଚାଳନା ପାଇଁ ଅନୁଦାନ, ଉନ୍ନତ ବୈଷୟିକ ଉପକରଣ ଯୋଗାଇ ଦେଉଥିଲେ ମଧ୍ୟ କାହିଁକି ଲୋକଙ୍କୁ ଚିକିତ୍ସାସେବା ଯୋଗାଇବା ପରିବର୍ତ୍ତେ ହଇରାଣ କରାଯାଉଛି ବୋଲି କହିଥିଲେ। ଜିଲାପାଳ ରାଣା ହସ୍ପିଟାଲ ଅଧୀକ୍ଷକ ଡା ପଣ୍ଡାଙ୍କ ସମେତ ଡାଇଲିସିସ ୱାର୍ଡର କର୍ମଚାରୀଙ୍କୁ ରୋଗୀଙ୍କ ପ୍ରତି ସଦୟ ହେବା, ଉତ୍ତମ ବ୍ୟବହାର ପ୍ରଦର୍ଶନ କରିବା ଏବଂ ଉପଯୁକ୍ତ ଚିକିତ୍ସା ଯୋଗାଇବା ଉପରେ ଦୀର୍ଘ ସମୟ ଧରି କହିଥିଲେ। ଜିଲାପାଳ ରାଣାଙ୍କୁ ପଚରାଯିବାରୁ ରୋଗୀଙ୍କ ଅଭିଯୋଗକୁ ଶୁଣିବା ପରେ ଆଗାମୀ ୭ ଦିନ ମଧ୍ୟରେ ସମସ୍ୟା ସମାଧାନ ଦିଗରେ ପଦକ୍ଷେପ ନିଆଯିବ ବୋଲି କହିଥିଲେ। ସ୍ଥାୟୀ ସମାଧାନ ବାଟ ବାରା କରାଯିବ। ଏଦିଗରେ ସରକାରଙ୍କୁ ମଧ୍ୟ ଜଣାଇବେ ବୋଲି ସେ କହିଥିଲେ।
