କୋଲକାତା, ୯ା୧୦ (ପି.ଟି.)-କରୋନା ଯୋଗୁ ଦେଶରେ ୭ ମାସ ହେବ କ୍ରୀଡ଼ା କାର୍ଯ୍ୟକଳାପ ସ୍ଥାଣୁ ହୋଇଯାଇଥିଲା। ଗୁରୁବାରଠାରୁ ଆରମ୍ଭ ହୋଇଛି ଫୁଟ୍ବଲ ପ୍ରତିଯୋଗିତା। ବିନା ଦର୍ଶକରେ ଅନୁଷ୍ଠିତ ଆଇ-ଲିଗ୍ କ୍ୱାଲିଫାୟାର୍ସର ଓପନିଂ ମ୍ୟାଚ୍ରେ ସହରର ଅନ୍ୟତମ କ୍ଲବ ଭବାନୀପୁର୍ ଏଫ୍ସି ୨-୦ ବେଙ୍ଗାଲୁରୁ ୟୁନାଇଟେଡ୍କୁ ହରାଇ ଦେଇଛି। ସଲ୍ଟଲେକ୍ ଷ୍ଟାଡିୟମରେ ଖେଳାଳିମାନଙ୍କ ଲାଗି ସାନିଟେଶନ ଟନେଲର ବ୍ୟବସ୍ଥା କରାଯାଇଥିଲା। ସାମାଜିକ ଦୂରତ୍ୱ ବଜାୟ ଉପରେ ଧ୍ୟାନ ଦିଆଯାଇଥିଲା। ମାର୍ଚ୍ଚ ୧୭ରେ ଇଣ୍ଡିଆନ ସୁପର ଲିଗ୍ ଫାଇନାଲ ପରେ ଫୁଟ୍ବଲ ଟୁର୍ନାମେଣ୍ଟ ବନ୍ଦ ରହିଥିଲା। ୫ଟି ଦଳକୁ ନେଇ ଆଇ-ଲିଗ୍ କ୍ୱାଲିଫାୟର୍ସ ରାଉଣ୍ଡ ରବିନ ଭିତ୍ତିରେ ଖେଳାଯାଉଛି।ଏହି ଟୁର୍ନାମେଣ୍ଟର ବିଜେତା ଡିସେମ୍ବରରେ ହେବାକୁଥିବା ଆଇ-ଲିଗ୍ ପାଇଁ ଯୋଗ୍ୟତା ଅର୍ଜନ କରିବ। ଗୁରୁବାର ଉଦ୍ଘାଟନୀ ମ୍ୟାଚ୍ରେ ଭବାନୀପୁର ଏଫ୍ସି ଦଳଠାରୁ ପ୍ରଭାବୀ ପ୍ରତିଆକ୍ରମଣ ଖେଳ ଦେଖିବାକୁ ମିଳିଥିଲା। ମ୍ୟାଚରେ ଦୁଇଥର ଜଳପାନ ବିରତି ହୋଇଥିଲା। ନୂଆ କୋଭିଡ୍-୧୯ ପ୍ରୋଟୋକଲ ଅନୁସାରେ ପ୍ରତିଟି ଦଳରେ ୫ ବଦଳ ଖେଳାଳି ଉପଲବ୍ଧ ହୋଇ ପାରିବେ। ଭବାନୀପୁର ତରଫରୁ ପ୍ରଥମାର୍ଦ୍ଧ ଖେଳ ଶେଷ ହେବାକୁ ଅଳ୍ପ ସମୟ ବାକି ରହିଥିବାବେଳେ ଘାନା ଫରଓ୍ବାର୍ଡ ଫିଲିପ୍ ଆଦ୍ଜା ପ୍ରଥମ ଗୋଲ ସ୍କୋର କରିଥିଲେ। ୬୦ତମ ମିନିଟ୍ରେ ଅଲ୍ଟାମାଶ ସୟଦ ଦ୍ୱିତୀୟ ଗୋଲ୍ଟିକୁ ସ୍କୋର କରିଥିଲେ।
