ନୂଆଦିଲ୍ଲୀ,୮।୩: ବାଟଲା ହାଉସ୍ ଏନ୍କାଉଣ୍ଟର ମାମଲାରେ ଦିଲ୍ଲୀର ଏକ କୋର୍ଟ ଅଭିଯୁକ୍ତ ଆତଙ୍କବାଦୀ ଆରିଜ୍ ଖାଁଙ୍କୁ ଦୋଷୀ ସାବ୍ୟସ୍ତ କରିଛନ୍ତି। ଆରିଜ୍ଙ୍କ ଦଣ୍ଡାଦେଶ ସମ୍ପର୍କରେ ଘୋଷଣା ମାର୍ଚ୍ଚ ୧୫ରେ କରାଯିବ ବୋଲି କୋର୍ଟ ପକ୍ଷରୁ ସୋମବାର ସୂଚନା ଦିଆଯାଇଛି। ଆରିଜ୍ ଇଣ୍ଡିଆନ୍ ମୁଜାହିଦ୍ଦିନ୍ର ଜଣେ ସଦସ୍ୟ। ଭାରତୀୟ ପିଙ୍ଗଳ କୋଡ ଧାରା ୩୦୨, ୩୦୭ ଏବଂ ଆର୍ମସ୍ ଆକ୍ଟ୍ ଅନ୍ତର୍ଗତ ଆରିଜ୍ଙ୍କୁ ଦୋଷୀ ସାବ୍ୟସ୍ତ କରାଯାଇଛି। ୨୦୦୮ରେ ଦିଲ୍ଲୀରେ ବାଟଲା ହାଉସ୍ ଏନ୍କାଉଣ୍ଟର ପରେ ସେ ଫେରାର ଥିଲେ। ୨୦୧୮ରେ ତାଙ୍କୁ ନେପାଳରୁ ଗିରଫ କରାଯାଇଥିଲା। ଏନ୍କାଉଣ୍ଟର ସମୟରେ ଇନସ୍ପେକ୍ଟର ମୋହନ ଶର୍ମା ଶହୀଦ୍ ହୋଇଥିଲେ। ସେହିପରି ପୋଲିସ କର୍ମଚାରୀ ବଲଓ୍ବନ୍ତ ସିଂ ଏବଂ ରାଜବୀରଙ୍କୁ ଜୀବନରେ ମାରି ଦେବାକୁ ଉଦ୍ୟମ ହୋଇଥିଲା। ଆରିଜ୍ଙ୍କ ପରିବାରର ଆର୍ଥିକ ସ୍ଥିତି ସମ୍ପର୍କରେ ତଥ୍ୟ ଉପସ୍ଥାପନ କରିବାକୁ କୋର୍ଟ ନିର୍ଦ୍ଦେଶ ଦିଆଯାଇଛି। ପରିବାରର ଆୟ ଅନୁସାରେ ଜରିମାନା ସ୍ଥିର କରାଯିବ ବୋଲି କୋର୍ଟ କହିଛନ୍ତି। ଆରିଜ୍ଙ୍କ ଉପରେ ୧୫ ଲକ୍ଷ ଟଙ୍କାର ପୁରସ୍କାର ଘୋଷଣା କରାଯାଇଥିଲା। ଇଣ୍ଟରପୋଲ୍ ଦ୍ୱାରା ଆରିଜ୍ଙ୍କୁ ନେଇ ରେଡ୍ କର୍ନର ନୋଟିସ୍ ଜାରି ହୋଇଥିଲା।
