ରାଓ୍ବଲପିଣ୍ଡି,୨୧।୨ : ଜମ୍ମୁ-କଶ୍ମୀର ଆତଙ୍କବାଦୀ ତଥା ହିଜବୁଲର ବରିଷ୍ଠ କମାଣ୍ଡର ବଶିର ଅହମ୍ମଦ ପିରଙ୍କ ମୃତ୍ୟୁ ଘଟିଛି। ପାକିସ୍ତାନର ରାୱଲପିଣ୍ଡିରେ ଜଣେ ଅଜ୍ଞାତ ଆକ୍ରମଣକାରୀଙ୍କ ଦ୍ୱାରା ବଶିରଙ୍କୁ ଗୁଳି କରି ହତ୍ୟା କରାଯାଇଛି। ମିଳିଥିବା ସୂଚନା ଅନୁଯାୟୀ, ବଶିର ନମାଜ ପାଠ କରିବା ପରେ ମସଜିଦରୁ ବାହାରି ଏକ ଦୋକାନରେ ଅଟକି ଯାଇଥିଲେ, ସେତେବେଳେ ତାଙ୍କୁ ଗୁଳି କରାଯାଇଥିଲା। ଜମ୍ମୁ-କଶ୍ମୀରରେ ଅନେକ ଆତଙ୍କବାଦୀ ଘଟଣାରେ ବଶିର ସମ୍ପୃକ୍ତ ଥିଲେ। ସେ ହିଜବୁଲର ଆତଙ୍କବାଦୀ ଅପରେଶନର ଶୀର୍ଷ କମାଣ୍ଡର ଥିଲେ।
ବର୍ତ୍ତମାନ ସୁଦ୍ଧା ବଶିରଙ୍କୁ କିଏ ହତ୍ୟା କରିଛି ତାହା ସ୍ପଷ୍ଟ ହୋଇନାହିଁ, ଯଦିଓ ତାଙ୍କ ମୃତ୍ୟୁ ଖବର ନିଶ୍ଚିତ ହୋଇଛି। ପ୍ରତ୍ୟକ୍ଷଦର୍ଶୀଙ୍କ ଅନୁଯାୟୀ ଦୁଇଜଣ ଅଜ୍ଞାତ ଆକ୍ରମଣକାରୀ ଦୋକାନ ବାହାରେ ଆତଙ୍କବାଦୀଙ୍କୁ ହତ୍ୟା କରିଥିଲେ। ଏହି ଆତଙ୍କବାଦୀଙ୍କୁ ଭାରତକ ସରକାର ଅଧିକ ଖୋଜୁଥିଲେ। ବର୍ତ୍ତମାନ ଆତଙ୍କବାଦୀଙ୍କ ମୃତ୍ୟୁକୁ ନେଇ ପାକିସ୍ତାନ ସରକାର ନୀରବ ରହିଛନ୍ତି। ଏ ସମ୍ପର୍କରେ ପ୍ରଧାନମନ୍ତ୍ରୀ ଶାହବାଜ ସରିଫ ସରକାରଙ୍କ ତରଫରୁ କୌଣସି ବିବୃତ୍ତି ଦିଆ ଯାଇନାହିଁ।
ସୂଚନାଯୋଗ୍ୟ ଯେ ଗତ ୨୦୨୨ ବର୍ଷ ଅକ୍ଟୋବର ୪ ରେ କେନ୍ଦ୍ର ସରକାର ଇମତିଆଜ ଆଲାମ ଓରଫ ବଶିର ଅହମ୍ମଦ ପିରଙ୍କୁ ବେଆଇନ କାର୍ଯ୍ୟକଳାପ ଅଧିନିୟମ ୟୁଏପିଏ ଅଧୀନରେ ଆତଙ୍କବାଦୀ ଘୋଷଣା କରିଥିଲେ। ବଶିର ଦୀର୍ଘ ସମୟ ଧରି ପାକିସ୍ତାନରେ ରହୁଥିଲେ ଏବଂ ସେଠାରୁ ସେ ଜମ୍ମୁ-କଶ୍ମୀରରେ ଆତଙ୍କବାଦୀ ଘଟଣା ଘଟାଉଥିଲେ। ଗତ ବର୍ଷ ବିଜ୍ଞପ୍ତି ଜାରି କରିବାବେଳେ ଭାରତ ସରକାର କହିଥିଲେ ଯେ ବଶିର ଅହମ୍ମଦ ହିଜବୁଲ ମୁଜାହିଦ୍ଦିନ ଏବଂ ଲଶ୍କର-ଇ-ତୋଏବା ଭଳି ଆତଙ୍କବାଦୀ ସଂଗଠନ ପାଇଁ କାର୍ଯ୍ୟ କରୁଛନ୍ତି । ଆତଙ୍କବାଦୀଙ୍କୁ ଏକତ୍ର କରିବା ସହିତ ସେ ଅନଲାଇନ ନୂତନ ନିଯୁକ୍ତି କାର୍ଯ୍ୟକଳାପରେ ଜଡିତ ଥିଲେ।
ବଶିର ମୂଳତଃ ଜମ୍ମୁ-କଶ୍ମୀରର କୁପୱାରାର ବାବରପୋରା ଅଞ୍ଚଳର ବାସିନ୍ଦା ଥିଲେ। ସେ ହିଜବୁଲ ମୁଖ୍ୟ ସୟଦ ସଲାହୁଦ୍ଦିନଙ୍କ ସହ ଅତି ନିକଟତର ଥିବା ଏବଂ ତାଙ୍କ ସହ ପାକିସ୍ତାନ ଯାଇଥିବା କୁହାଯାଉଥିଲା। ଗତ କିଛି ବର୍ଷ ଧରି ରାୱଲପିଣ୍ଡିରେ ରହୁଥିଲେ ଏବଂ ସେଠାରୁ ଆତଙ୍କବାଦୀ ଷଡଯନ୍ତ୍ର ଭାରତ ବିରୋଧରେ ରଚୁଥିଲେ।
