ବରଗଡ଼,୬।୫(ପ୍ରେମାନନ୍ଦ ଖମାରୀ):ବରଗଡ଼ ଜିଲା ପୋଲିସ ସଟ୍ଟା ଧରପଗଡ଼କୁ ଜୋରଦାର୍ କରିଛି। ସୋମବାର ସ୍ଥାନୀୟ ଗ୍ରାମାଞ୍ଚଳ ଥାନା ଅନ୍ତର୍ଗତ ତୋରା ସୂତାମିଲ୍ ପାଖରେ ଚାଲିଥିବା ଏକ ସଟ୍ଟା ଆଡ୍ଡା ଉପରେ ଚଢ଼ାଉ କରିଥିଲା। ଚଢ଼ାଉରେ ପୋଲିସ ୪ ଅଭିଯୁକ୍ତଙ୍କୁ ଗିରଫ କରିଛି। ସେମାନେ ହେଲେ ବରଗଡ଼ ସହର ଉପକଣ୍ଟ ତୋରା ଚିନିକଳ ନିକଟ ଆମପଡ଼ାର ପ୍ରକାଶ ସେନାପତି, ତୋରା ଟାଙ୍ଗରପଡ଼ାର ଭୋଜରାଜ ଦୀପ, ହେମନ୍ତ ଦୀପ ଏବଂ ତୋରା କେନାଲପଡ଼ାର ସୁଦାମ ଦୀପ। ପୋଲିସ ଅଭିଯୁକ୍ତମାନଙ୍କ ପାଖରୁ ନଗଦ ୧୦ହଜାର ୬୫୦ ଟଙ୍କା, ସଟ୍ଟା ନମ୍ବର ଲେଖାଥିବା ବୋର୍ଡ଼, ୨ସଟ୍ଟା ଚିଟ୍ସ, ଗୋଟିଏ ହୋଣ୍ଡା ଆକ୍ଟିଭା ସ୍କୁଟି(ନଂ-ଓଡ଼ି୧୭ଏଡ଼ି ୮୩୫୧) ଏବଂ ୪ ମୋବାଇଲ ଜବତ କରିଛି। ଗିରଫ ଅଭିଯୁକ୍ତମାନଙ୍କୁ ମଙ୍ଗଳବାର ପୋଲିସ କୋର୍ଟଚାଲାଣ କରିଛି। ସେମାନଙ୍କ ବିରୋଧରେ ବରଗଡ଼ ଗ୍ରାମାଞ୍ଚଳ ଥାନାରେ ଏକ ମାମଲା(ନଂ-୯୨/୨୦୨୬) ରୁଜୁ ହୋଇଛି।
ସୂଚନା ଅନୁଯାୟୀ, ଗିରଫ ଅଭିଯୁକ୍ତମାନେ ଗ୍ରାମାଞ୍ଚଳ ଥାନା ଅଞ୍ଚଳରେ ସଟ୍ଟା କାରବାର ଚଲାଇଥିବା ନେଇ ପୋଲିସକୁ ସୂଚନା ମିଳିଥିଲା। ସେହି ସୂଚନାକୁ ଆଧାର କରି ଏଏସଆଇ ଅଭୟ କୁମାର ଦଲାଇଙ୍କ ନେତୃତ୍ୱରେ ପୋଲିସର ଏକ ଟିମ୍ ତୋରା ସୂତାମିଲ ଛକରେ ଚାଲିଥିବା ସଟ୍ଟା କାରବାର ଆଡ୍ଡା ଠାବ କରିବା ସହିତ ସେଠାରେ ଅତର୍କିତ ଚଢ଼ାଉ କରିଥିଲା। ତେବେ ଗିରଫ ଅଭିଯୁକ୍ତମାନଙ୍କ ମଧ୍ୟରୁ ହେମନ୍ତ ଏବଂ ସୁଦାମ ତୋରା ଅଞ୍ଚଳରେ ଚାଲିଥିବା ସଟ୍ଟା କାରବାରର କିଙ୍ଗପିନ୍ ଥିଲେ ଏବଂ ସେମାନେ ଏଜେଣ୍ଟ ନିୟୋଜନ କରି ଅଞ୍ଚଳରେ ଏହି କାରବାର ଚଲାଇ ଆସୁଥିଲେ ବୋଲି ପୋଲିସ ସୂଚନା ଦେଇଛି। ସେହିପରି ଗିରଫ ଅଭିଯୁକ୍ତ ହେମନ୍ତଙ୍କ ବିରୋଧରେ ପୂର୍ବରୁ ବରଗଡ଼ ଟାଉନ ଥାନାରେ ୨ଟି, ବରଗଡ଼ ଗ୍ରାମାଞ୍ଚଳ ଥାନାରେ ଗୋଟିଏ ଏବଂ ବରପାଲି ଥାନାରେ ଗୋଟିଏ ମାମଲା ରହିଥିବା ପୋଲିସ ପକ୍ଷରୁ ସୂଚନା ଦିଆଯାଇଛି।
Dharitri – Odisha’s No.1 Odia Daily
