ବାଂଲାଦେଶର ପୂର୍ବତନ ପ୍ରଧାନମନ୍ତ୍ରୀ ଶେଖ୍ ହାସିନା କ୍ଷମତା ଯିବା ପରଠାରୁ ଅର୍ଥାତ୍ ଅଗଷ୍ଟ ୨୦୨୪ରୁ ଭାରତରେ ରହି ଆସୁଛନ୍ତି । ସେ କହିଛନ୍ତି ଯେ, ଚଳିତ ବର୍ଷ ଡିସେମ୍ବର ସୁଦ୍ଧା ତାଙ୍କ ଦେଶକୁ ଫେରିବାକୁ ଚାହାଁନ୍ତି । ସେ ଏହା ମଧ୍ୟ ସ୍ୱୀକାର କରିଛନ୍ତି ଯେ, ସେସମ୍ପୂର୍ଣ୍ଣ ସଚେତନ ଅଛନ୍ତି ଯେ ତାଙ୍କ ଫେରିବା ପରେ, ସେ ଗିରଫ, ଜେଲଦଣ୍ଡ କିମ୍ବା ତାଙ୍କ ଜୀବନ ପ୍ରତି ବିପଦର ସମ୍ମୁଖୀନ ହୋଇପାରନ୍ତି, ତଥାପି ସେ ଫେରିଯିବାକୁ ସ୍ଥିର ରହିଛନ୍ତି ।
ଏକ ସାକ୍ଷାତକାରରେ, ୭୮ ବର୍ଷୀୟ ଶେଖ୍ ହାସିନା ଇମେଲ୍ ମାଧ୍ୟମରେ ପ୍ରଶ୍ନର ଉତ୍ତର ଦେଇଥିଲେ । ସେ କହିଥିଲେ ଯେ ତାଙ୍କ ସାମ୍ନାରେ ଥିବା ସମସ୍ତ ବିପଦ ବିଷୟରେ ଅବଗତ । ସେ କହିଥିଲେ, “ମୋତେ ହତ୍ୟା କରାଯାଇପାରେ। ମୋତେ ଗିରଫ କରାଯାଇପାରେ। ମୋତେ ଜେଲଦଣ୍ଡ ଦିଆଯାଇପାରେ। ମୁଁ ମୋର ଭାଗ୍ୟ ବିଷୟରେ ସମ୍ପୂର୍ଣ୍ଣ ଅବଗତ। ତଥାପି, ମୁଁ ଫେରିବାକୁ ଚାହୁଁଛି କାରଣ ମୋ ଲୋକମାନେ ମୋତେ ଡାକୁଛନ୍ତି।”
ଅଗଷ୍ଟ ୨୦୨୪ରେ ଛାତ୍ର ନେତୃତ୍ୱାଧୀନ ଏକ ବିଶାଳ ଆନ୍ଦୋଳନ ପରେ ଶେଖ ହାସିନାଙ୍କ ୧୫ ବର୍ଷର ସରକାରର ପତନ ଘଟିଥିଲା। ଅଶାନ୍ତି ସମୟରେ, ପ୍ରଦର୍ଶନକାରୀମାନେ ତାଙ୍କ ସରକାରୀ ବାସଭବନ ଉପରେ ଆକ୍ରମଣ କରିଥିଲେ, ଯାହା ଫଳରେ ସେ ହେଲିକପ୍ଟର ଯୋଗେ ଭାରତ ପଳାଇ ଆସିଥିଲେ। ଜାତିସଂଘ ଅନୁଯାୟୀ, ସରକାର ବିରୋଧୀ ଆନ୍ଦୋଳନ ଏବଂ ପରବର୍ତ୍ତୀ କାର୍ଯ୍ୟାନୁଷ୍ଠାନ ସମୟରେ ପ୍ରାୟ ୧,୪୦୦ ଲୋକ ପ୍ରାଣ ହରାଇଥିଲେ। ନଭେମ୍ବର ୨୦୨୪ରେ, ଢାକାର ଏକ କୋର୍ଟ ଶେଖ ହାସିନାଙ୍କୁ ମାନବତା ବିରୋଧୀ ଅପରାଧ ପାଇଁ ଦୋଷୀ ସାବ୍ୟସ୍ତ କରି ମୃତ୍ୟୁଦଣ୍ଡ ଦେଇଥିଲେ। ତଥାପି, ଶେଖ ହାସିନା ଏହି ରାୟକୁ ସ୍ପଷ୍ଟ ଭାବରେ ପ୍ରତ୍ୟାଖ୍ୟାନ କରିଥିଲେ, ଏହାକୁ ଏକ ଆଇନଗତ ପ୍ରକ୍ରିୟାର ରୂପରେ ରାଜନୈତିକ ପ୍ରତିଶୋଧର କାର୍ଯ୍ୟ ବୋଲି ବର୍ଣ୍ଣନା କରିଥିଲେ ।
