ପର୍ଯ୍ୟଟନ ଋତୁରେ ପ୍ରକୃତି ସହ କିଛି ସମୟ ବିତାଇବାକୁ କିଏ ବା ନ ଚାହେଁ! ସେଥିପାଇଁ ପର୍ଯ୍ୟଟକଙ୍କ ପ୍ରଥମ ପସନ୍ଦ ପାଲଟେ ଜଳପ୍ରପାତ। ସବୁଜ ବନାନୀ ପରିବେଷ୍ଟିତ ପାହାଡ଼ ଶିଖରରୁ ଝରିପଡ଼ୁଥିବା ଶୁଦ୍ଧ ଶୀତଳ ଜଳର ଆକର୍ଷଣ ଆଗନ୍ତୁକଙ୍କୁ କରିଥାଏ ଆନମନା। ଅନୁଗୋଳ ଜିଲା ଆଠମଲ୍ଲିକ ବ୍ଲକ ସାପଘରା ପଞ୍ଚାୟତଠାରେ ଥିବା ବନଘରା ଜଳପ୍ରପାତ ସେଥିମଧ୍ୟରୁ ଅନ୍ୟତମ।
ଅନୁଗୋଳ ଜିଲା ଆଠମଲ୍ଲିକ ବ୍ଲକରେ ଥିବା ବନଘରା ଜଳପ୍ରପାତ ବେଶ୍ ଜଣାଶୁଣା। ସେଥିପାଇଁ ବର୍ଷର ଅନେକ ସମୟରେ ଏଠାରେ ପର୍ଯ୍ୟଟକଙ୍କୁ ଦେଖିବାକୁ ମିଳିଥାଏ। ବିଶେଷକରି ସେପ୍ଟେମ୍ବରରୁ ମାର୍ଚ୍ଚ ଯାଏ ପର୍ଯ୍ୟଟନ ଋତୁରେ ଏହି ପର୍ଯ୍ୟଟନସ୍ଥଳୀରେ ପ୍ରବଳ ଗହଳି ହୁଏ। ଆଖପାଖ ଜିଲାର ଲୋକେ ଏହି ଜଳପ୍ରପାତର ମଜା ନେବାକୁ ଧାଇଁ ଆସନ୍ତି। ସେହିପରି ବଣଭୋଜି ପାଇଁ ଏଠାକାର ପରିବେଶ ମନଛୁଅଁା ହୋଇଥିବାରୁ ସ୍କୁଲ, କଲେଜ ପିଲା ଏଠାକୁ ପିକ୍ନିକ୍ ପାଇଁ ଆସନ୍ତି। ଘଞ୍ଚ ଜଙ୍ଗଲ ସାଙ୍ଗକୁ ବଡ଼ ବଡ଼ ପାହାଡ଼ ଥିବା ବନଘରା ଜଳପ୍ରପାତ ଅଞ୍ଚଳର ସୌନ୍ଦର୍ଯ୍ୟ ପର୍ଯ୍ୟଟକଙ୍କୁ ଏକ ନିଆରା ଅନୁଭୂତି ଦେଇଥାଏ। ବିଭିନ୍ନ ଔଷଧୀୟ ବୃକ୍ଷ ସହ ବହୁ ବନ୍ୟ ଜନ୍ତୁଙ୍କୁ ଏଠାରେ ଦେଖିବାକୁ ମିଳିଥାଏ। ଏଥିସହ ନିକଟରେ ମା ବନଘରା ଠାକୁରାଣୀ ଥିବା ଯୋଗୁ ବହୁ ଶ୍ରଦ୍ଧାଳୁ ଏଠାକୁ ପୂଜାର୍ଚ୍ଚନା ପାଇଁ ଆସିଥାନ୍ତି। ମା’ ବନଘରାଙ୍କ ନିକଟରେ ମାନସିକ କଲେ ଭକ୍ତଙ୍କ ମନସ୍କାମନା ପୂରଣ ହୋଇଥାଏ ବୋଲି ବିଶ୍ୱାସ ଥିବାରୁ ଦୂର ଦୂରାନ୍ତରୁ ଲୋକେ ଆସୁଥିବା ସ୍ଥାନୀୟ ବାତ୍ରାଖୋଳ ଗ୍ରାମବାସୀ ପ୍ରକାଶ କରିଛନ୍ତି। ଅପରୂପ ସୌନ୍ଦର୍ଯ୍ୟର ସମାହାର ସତ୍ତ୍ୱେ ଏହି ବନଘରା ଜଳପ୍ରପାତକୁ ଭଲ ରାସ୍ତାଟିଏ ଆଜିଯାଏ ନିର୍ମାଣ ହୋଇପାରି ନାହିଁ। ସେଥିପାଇଁ ଏଠାକୁ ଆସୁଥିବା ପର୍ଯ୍ୟଟକଙ୍କୁ ନାନା ଅସୁବିଧାର ସମ୍ମୁଖୀନ ହେବାକୁ ପଡ଼ିଥାଏ। ପର୍ଯ୍ୟଟକମାନେ ଅନୁଗୋଳ ଜିଲା ଆଠମଲ୍ଲିକ ଉପଖଣ୍ଡର ବଇଣ୍ଡା ଅଞ୍ଚଳରେ ପହଞ୍ଚିବା ପରେ ସେଠାରୁ ବଇଣ୍ଡା-ପାଇକସାହି ପୂର୍ତ୍ତ ବିଭାଗ ରାସ୍ତାର ବନ୍ତୁଲ ଛକ ଦେଇ ସାପଘରା ପଞ୍ଚାୟତରେ ପହଞ୍ଚିପାରିବେ। ସେଠାରୁ ରାଇନାଳୀ ରାସ୍ତାରେ ଗଲେ ପ୍ରଥମେ ପଡ଼ିବ ବାତ୍ରାଖୋଳ ଗ୍ରାମ। ଗ୍ରାମରୁ ୩ କି.ମି. ଦୂରରେ ରହିଛି ପ୍ରାକୃତିକ ଶୋଭାରେ ପରିପୂର୍ଣ୍ଣ ବନଘରା ଜଳ ପ୍ରପାତ।
