ଦୁବାଇ, ୧।୯: ବିଶ୍ୱର ସବୁଠାରୁ ବ୍ୟୟବହୁଳ ଟି୨୦ କ୍ରିକେଟ୍ ଟୁର୍ନାମେଣ୍ଟ ଇଣ୍ଡିଆନ୍ ପ୍ରିମିୟର ଲିଗ୍ (ଆଇପିଏଲ୍)ର ୧୩ତମ ସଂସ୍କରଣ ଆସନ୍ତା ୧୯ରୁ ୟୁଏଇରେ ଆରମ୍ଭ ହେବ। ଚଳିତ ବର୍ଷ କରୋନା ମହାମାରୀ ଲାଗି ଆଇପିଏଲ୍କୁ ଭାରତ ପରିବର୍ତ୍ତେ ୟୁଏଇରେ ଆୟୋଜିତ କରାଯାଇଛି। ସମସ୍ତ ଫ୍ରାଞ୍ଚାଇଜ ୟୁଏଇରେ ପହଞ୍ଚି ସାରିଛନ୍ତି। ଆଇପିଏଲ୍ ଆରମ୍ଭ ହେବାକୁ ୨ ସପ୍ତାହରୁ ଅଧିକ ସମୟ ବାକି ରହିଥିବାବେଳେ ବିରାଟ କୋହଲିଙ୍କ ନେତୃତ୍ୱାଧୀନ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର (ଆର୍ସିବି) ଦଳରେ ସାମାନ୍ୟ ପରିବର୍ତ୍ତନ କରାଯାଇଛି। ଅଷ୍ଟ୍ରେଲୀୟ ଦ୍ରୁତ ବୋଲର କେନ୍ ରିଚାର୍ଡସନଙ୍କ ସ୍ଥାନରେ ସ୍ପିନର ଆଡାମ ଜାମ୍ପାଙ୍କୁ ଦଳରେ ସାମିଲ କରାଯାଇଛି। ଅଷ୍ଟ୍ରେଲୀୟ ଲେଗ୍-ସ୍ପିନର ଜାମ୍ପା ଦଳରେ ସାମିଲ ହୋଇଥିବା ନେଇ ଆର୍ସିବି ପକ୍ଷରୁ ଏହାର ଅଫିସିଆଲ ଟୁଇଟର୍ ଆକାଉଣ୍ଟରେ ସୂଚନା ଦିଆଯାଇଛି। ଜାମ୍ପା ଏକମାତ୍ର ସ୍ପିନର ଭାବେ ଆଇପିଏଲ୍ରେ ଗୋଟିଏ ମ୍ୟାଚ୍ରେ ୬ ଉଇକେଟ୍ ଅକ୍ତିଆର କରିଛନ୍ତି। ୨୦୧୬ରେ ସେ ରାଇଜିଂ ପୁନେ ସୁପର୍ ଜିଆଣ୍ଟ୍ସ ପକ୍ଷରୁ ପ୍ରତିନିଧିତ୍ୱ କରି ସନ୍ରାଇଜର୍ସ ହାଇଦ୍ରାବାଦ୍ ବିପକ୍ଷରେ ୧୯ ରନ୍ ବ୍ୟୟରେ ଏହି ସଫଳତା ପାଇଥିଲେ। ୟୁଏଇ ପରିବେଶରେ ସେ ବାଙ୍ଗାଲୋର ପାଇଁ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିବେ ବୋଲି ଟିମ୍ ମ୍ୟାନେଜମେଣ୍ଟ ଆଶା ରଖିଛି। ଜାମ୍ପାଙ୍କ ପୂର୍ବରୁ ବାଙ୍ଗାଲୋର ଦଳରେ ୟୁଜବେନ୍ଦ୍ର ଚହଲ, ଓ୍ବାଶିଂଟନ ସୁନ୍ଦର, ପଓ୍ବନ ନେଗୀ, ମୋଇନ ଅଲୀ ଓ ଶାହବାଜ ଅହମ୍ମଦଙ୍କ ରୂପରେ ୫ ଜଣ ସ୍ପିନର ରହିଛନ୍ତି।
