ଅଷ୍ଟ୍ରେଲିଆ କ୍ରିକେଟର ଉସ୍ମାନ ଖ୍ବାଜା ପ୍ରଥମଥର ପାଇଁ ପିତା ହୋଇଛନ୍ତି। ତାଙ୍କ ସ୍ତ୍ରୀ ରେଚେଲ ଏକ କନ୍ୟା ସନ୍ତାନ ଜନ୍ମ ଦେଇଛନ୍ତି। ଖ୍ବାଜା ଇନ୍ଷ୍ଟାଗ୍ରାମରେ ଝିଅର ଫଟୋ ଶେୟାର କରି ନିଜ ପ୍ରଶଂସକଙ୍କ ଏହି ଖୁସି ଖବର ଜଣାଇଛନ୍ତି। ଫଟୋରେ ସ୍ତ୍ରୀ ଏବଂ ଝିଅ ସହ ନିଜେ ନଜର ଆସିଛନ୍ତି ଖ୍ବାଜା। କୁନି ଝିଅଟି ହସୁଥିବା ଦେଖାଯାଇଛି। ଜୁଲାଇ ୨୧ରେ ଝିଅ ଆୟଶା ଜନ୍ମଗ୍ରହଣ କରୁଥିବା ଖ୍ବାଜା କହିଛନ୍ତି। ପ୍ରଥମ ଝିଅ ଜନ୍ମ ନେଇଥିବାରୁ ମୁଁ ବହୁତ ଖୁସି। ପ୍ରଥମଥର ପିତା ହେବାର ଖୁସି ସବୁବେଳେ ମନେ ରହିବ। ପିତା ଭଳି ଝିଅକୁ ମଧ୍ୟ ଥଣ୍ଡା ପସନ୍ଦ ବୋଲି ସେ କହିଛନ୍ତି। ସୂଚନାଯୋଗ୍ୟ, ଖ୍ବାଜା ୪୪ଟି ଟେଷ୍ଟ ଖେଳି ୨୮୮୭ ରନ କରିଥିବାବେଳେ ୪୦ଟି ଏକଦିବସୀୟ ମ୍ୟାଚ୍ ଖେଳି ୧୫୫୪ ସ୍କୋର କରିଛନ୍ତି।
