ହାଟଡିହୀ,୯।୫(ଶୁଭକାନ୍ତ ନାୟକ): କେନ୍ଦୁଝର ଜିଲା ହାଟଡିହୀ ବ୍ଲକ୍ ବିଜେଡି ଉପାଧ୍ୟକ୍ଷ ଭାଜପା ଦଳ ବିରୋଧରେ ଅଶାଳୀନ ମନ୍ତ୍ରବ୍ୟ ଦେବା ତଥା ଅଶ୍ଳୀଳ ଭାଷାରେ ଗାଳି ଦେବା ନେଇ ଏକ ଅଡିଓ ଭାଇରାଲ ହେଉଛି। ଫଳରେ ଭାଜପା ମହଲରେ ଅସନ୍ତୋଷ ଏବଂ ଉତ୍ତେଜନା ଦେଖାଯାଇଛି। ଅଡ଼ିଓକୁ ନେଇ ଅଞ୍ଚଳରେ ଏବେ ରାଜନୈତିକ ଛକାପଞ୍ଝା ପରିସ୍ଥିତି ଉପୁଜିଛି।
ଅଡ଼ିଓରେ ଜଣାପଡ଼ିଛି, ହାଟଡ଼ିହୀ ବ୍ଲକ୍ ବିଜେଡି ଉପାଧ୍ୟକ୍ଷ ରତିକାନ୍ତ ରାଉତ ଜଣେ ବ୍ୟକ୍ତିଙ୍କ ସହ କଥା ହେଉଥିବା ବେଳେ ଭାଜପା ଦଳକୁ ତାତ୍ସଲ୍ୟ କରି ଅଶ୍ଳୀଳ ଭାଷାରେ ଗାଳି ଦେଉଛନ୍ତି। ଅଡ଼ିଓକୁ ନେଇ ଆନନ୍ଦପୁର ଭାଜପା ବିଧାନସଭା ନେତା ଆଲୋକ ସେଠୀ, ଭାଜପା ଜିଲା କାର୍ଯ୍ୟକାରିଣୀ ସଦସ୍ୟ ହରମୋହନ ଶାସିନୀ, ଏମ୍ପିଙ୍କ ବ୍ଲକ୍ ପ୍ରତିନିଧି ଜ୍ଞାନ ରଞ୍ଜନ ସାମନ୍ତସିଂହାର କହିଛନ୍ତି, ବିନା କାରଣରେ ହାଟଡ଼ିହୀ ବ୍ଲକ୍ ବିଜେଡି ଉପାଧ୍ୟକ୍ଷ ରତିକାନ୍ତ ରାଉତ ଭାଜପା ଦଳକୁ ଗାଳି ଦେଉଥିବା ଅଡ଼ିଓ ଆମ ପାଖରେ ଅଛି। ସେ ନିଜ ସୀମା ଉଲ୍ଲଂଘନ କରିଛନ୍ତି l ଏପରି ଘଟଣାକୁ କଦାପି ବରଦାସ୍ତ କରାଯିବନି। ଏହାର ଜବାବ ଦିଆଯିବ। ବ୍ଲକ୍ ଉପାଧ୍ୟକ୍ଷ ରତିକାନ୍ତ ରାଉତ କହିଛନ୍ତି, ବଞ୍ଚୋ ସରପଞ୍ଚ ଅମର ରାଉତଙ୍କ ସହ ଫୋନ୍ରେ କଥା ହେଉଥିବା ବେଳେ ତାଙ୍କୁ ଅଗ୍ରହଣୀୟ କଥା କହିଥିଲେ। ଫଳରେ ସେ ତାଙ୍କୁ ଅସନ୍ତୋଷ ପ୍ରକାଶ କରି କିଛି କଥା କହିଥିଲେ। କୌଣସି ଦଳକୁ ସେ ଖରାପ ଭାଷାରେ ଗାଳି ଦେଇନାହାନ୍ତି। ସରପଞ୍ଚ ସବୁ ନାଟ ଲଗାଇଛନ୍ତି। ଭାଜପାର ପୂର୍ବତନ ଜିଲା ପରିଷଦ ପ୍ରାର୍ଥିନୀ ତୃପ୍ତିମୟୀ ଜେନା, ଏମ୍ପିଙ୍କ ପ୍ରତିନିଧି ସୁନୀଲ ନାୟକ ଏବଂ ସୁଶାନ୍ତ ଜେନା କହିଛନ୍ତି, ରାଜ୍ୟ ଏବଂ କେନ୍ଦ୍ରରେ ଭାଜପା ସରକାର ରହିଛି। ଭାଜପା ଦଳକୁ ଅଶ୍ଳୀଳ ଭାଷାରେ ଗାଳି ଦେବାର ଅର୍ଥ ହେଉଛି ସରକାର ଏବଂ ସର୍ବୋଚ୍ଚ ନେତାଙ୍କୁ ଗାଳି କରିବା। ଏପରି ଆଚରଣ ଅନୁଚିତ, ଏହାର ପ୍ରତି ଜବାବ ଦିଆଯିବ।
