ନୂଆଦିଲ୍ଲୀ, ୨୧।୧୨(ପି.ଟି.): ଜମ୍ମୁ-କଶ୍ମୀର ନିର୍ବାଚନମଣ୍ଡଳୀ ସୀମା ପୁନଃ ନିର୍ଦ୍ଧାରଣ କମିଶନ ଜମ୍ମୁ ଅଞ୍ଚଳ ପାଇଁ ଅତିରିକ୍ତ ୬ ଏବଂ କଶ୍ମୀର ପାଇଁ ଗୋଟିଏ ନିର୍ବାଚନ ମଣ୍ଡଳୀ ଗଠନ ପ୍ରସ୍ତାବ ଦେଇଛନ୍ତି। ଏଥିସହିତ ଅନୁସୂଚିତ ଜାତି ଓ ଜନଜାତିଙ୍କ ପାଇଁ ୧୬ଟି ଆସନ ସଂରକ୍ଷିତ ରଖିଛନ୍ତି କମିଶନ। ଏହି ପ୍ରସ୍ତାବକୁ ଜମ୍ମୁ-କଶ୍ମୀରର ବିଭିନ୍ନ ରାଜନୈତିକ ଦଳ ପକ୍ଷରୁ ତୀବ୍ର ବିରୋଧ କରାଯାଇଛି। କମିଶନ ଭାଜପାର ରାଜନୈତିକ କାର୍ଯ୍ୟସୂଚୀକୁ କାର୍ଯ୍ୟକାରୀ କରୁଥିବା ନ୍ୟାଶନାଲ କନ୍ଫରେନ୍ସ (ଏନ୍ସି) ଅଭିଯୋଗ କରିଛି। ପିପୁଲ୍ସ ଡେମୋକ୍ରାଟିକ୍ ପାର୍ଟି (ପିଡିପି), ଜମ୍ମୁ-କଶ୍ମୀର ଅପ୍ନି ପାର୍ଟି ଏବଂ ପିପୁଲ୍ସ କନ୍ଫରେନ୍ସ ମଧ୍ୟ କମିଶନଙ୍କ ଚିଠା ସୁପାରିସକୁ ଦୃଢ଼ ବିରୋଧ କରିଛନ୍ତି। ବର୍ତ୍ତମାନ କଶ୍ମୀର ଡିଭିଜନରେ ୪୬ ଓ ଜମ୍ମୁରେ ୩୭ ଆସନ ରହିଛି।
ସୁପ୍ରିମକୋର୍ଟର ପୂର୍ବତନ ବିଚାରପତି ରଞ୍ଜନ ଦେଶାଇଙ୍କ ଅଧ୍ୟକ୍ଷତାରେ ଗଠିତ କମିଶନଙ୍କ ଦ୍ୱିତୀୟ ବୈଠକ ସୋମବାର ଅନୁଷ୍ଠିତ ହୋଇଥିଲା। ଏଥିରେ ଜମ୍ମୁ-କଶ୍ମୀରର ୫ ଲୋକ ସଭା ସଦସ୍ୟ ସହଯୋଗୀ ସଦସ୍ୟ ଥିବାବେଳେ ମୁଖ୍ୟ ନିର୍ବାଚନ କମିଶନର ସୁଶୀଲ ଚନ୍ଦ୍ରା ଏକ୍ସ-ଅଫିସିଓ ସଦସ୍ୟ ରହିଛନ୍ତି। ନିର୍ବାଚନମଣ୍ଡଳୀ ବୃଦ୍ଧି ପ୍ରସ୍ତାବ ଉପରେ ଡିସେମ୍ବର ୩୧ ସୁଦ୍ଧା ମତାମତ ଦେବାକୁ ଦଳଗୁଡ଼ିକୁ କୁହାଯାଇଛି। କମିଶନଙ୍କ ସହ ହୋଇଥିବା ଆଲୋଚନା ସମ୍ପର୍କରେ ଦଳୀୟ ସହକର୍ମୀ ଏବଂ ଗୁପକାର ମେଣ୍ଟକୁ ଜଣାଇବେ ବୋଲି ଏହାର ଅଧ୍ୟକ୍ଷ ଫାରୁକ୍ କହିଛନ୍ତି। କମିଶନଙ୍କ ମାଧ୍ୟମରେ ଭାଜପା ଏହାର ରାଜନୈତିକ କାର୍ଯ୍ୟସୂଚୀ ଲଦିଦେବାକୁ ଯୋଜନା କରୁଥିବା ପୂର୍ବତନ ମୁଖ୍ୟମନ୍ତ୍ରୀ ଓମାର ଅବଦୁଲ୍ଲା ଟୁଇଟ୍ କରିଛନ୍ତି। କମିଶନଙ୍କ ଚିଠା ସୁପାରିସ ଗ୍ରହଣୀୟ ନୁହେଁ। ୨୦୧୧ ଜନଗଣନା ତଥ୍ୟ ଅନୁଯାୟୀ ଜମ୍ମୁରେ ୬ ଏବଂ କଶ୍ମୀରରେ ଗୋଟିଏ ଅତିରିକ୍ତ ଆସନ ପ୍ରସ୍ତାବ ଯଥାର୍ଥ ନୁହେଁ ବୋଲି ଓମାର କହିଛନ୍ତି। ସୀମା ନିର୍ଦ୍ଧାରଣ କମିଶନଙ୍କ ପ୍ରସ୍ତାବକୁ କଶ୍ମୀର ଅପ୍ନୀ ଦଳ ମଧ୍ୟ ପ୍ରତ୍ୟାଖ୍ୟାନ କରିଛି। ଭାଜପାର ରାଜନୈତିକ ସ୍ବାର୍ଥ ଚରିତାର୍ଥ କରିବା ପାଇଁ କମିଶନ ଗଠନ କରାଯାଇଛି ବୋଲି ପିଡିପି ଅଧ୍ୟକ୍ଷା ତଥା ପୂର୍ବତନ ମୁଖ୍ୟମନ୍ତ୍ରୀ ମେହବୁବା ମୁଫ୍ତି ଅଭିଯୋଗ କରିଛନ୍ତି। ଧର୍ମ ଓ ଆଞ୍ଚଳିକତା ଆଧାରରେ ଭାଜପା ଲୋକମାନଙ୍କୁ ଭାଗ ଭାଗ କରିବାକୁ ଚାହୁଁଛି। କେନ୍ଦ୍ର ସରକାରଙ୍କ ୨୦୧୯ ଅଗଷ୍ଟ ୫ରେ ଜମ୍ମୁ-କଶ୍ମୀରରୁ ସମ୍ବିଧାନର ଅନୁଚ୍ଛେଦ ୩୭୦ ଉଚ୍ଛେଦ କରାଯିବା ସହ ରାଜ୍ୟକୁ ଦୁଇଟି କେନ୍ଦ୍ରଶାସିତ ଅଞ୍ଚଳରେ ବିଭକ୍ତ କରାଯାଇଥିଲା। ଏହି ବେଆଇନ ତଥା ଅସାମ୍ବିଧାନିକ ନିଷ୍ପତ୍ତିକୁ ଆଇନସମ୍ମତ କରିବା ଭଳି ସରକାର ଭାଜପା ଜମ୍ମୁ-କଶ୍ମୀରରେ ଚାହୁଁଛି ବୋଲି ମେହବୁବା କହିଛନ୍ତି।
