ନୂଆଦିଲ୍ଲୀ,୧୬।୯: ଆଶା କର୍ମୀ (ASHA Workers) ମାନଙ୍କୁ ଏକ ବଡ଼ ଉପହାର। ଦିଲ୍ଲୀ ସରକାର ଆଶା କର୍ମୀମାନଙ୍କୁ ମିଳୁଥିବା ମାସିକ ପ୍ରୋତ୍ସାହନ ଭତ୍ତାକୁ ୩,୦୦୦ ଟଙ୍କାରୁ ବୃଦ୍ଧି କରି ୬,୦୦୦ ଟଙ୍କା କରିବାକୁ ନିଷ୍ପତ୍ତି ନେଇଛନ୍ତି। ମୁଖ୍ୟମନ୍ତ୍ରୀ ରେଖା ଗୁପ୍ତାଙ୍କ ଅଧ୍ୟକ୍ଷତାରେ ଅନୁଷ୍ଠିତ କ୍ୟାବିନେଟ ବୈଠକରେ ଏହି ନିଷ୍ପତ୍ତି ନିଆଯାଇଛି। ସୂଚନା ଦିଆଯାଇଛି ଯେ, ଭତ୍ତାର ଏହି ବୃଦ୍ଧି ଦିଲ୍ଲୀରେ ବର୍ତ୍ତମାନ କାର୍ଯ୍ୟରତ ସମସ୍ତ ଆଶା କର୍ମୀଙ୍କ ପାଇଁ ଲାଗୁ ହେବ। ଅନ୍ୟପକ୍ଷରେ, ଅନ୍ୟାନ୍ୟ ପ୍ରୋତ୍ସାହନ ଭତ୍ତା ପୂର୍ୱପରି ହିଁ ମିଳିବା ଜାରି ରହିବ।
ମୁଖ୍ୟମନ୍ତ୍ରୀ ରେଖା ଗୁପ୍ତା କହିଛନ୍ତି ଯେ ଆଶା କର୍ମୀମାନେ ଦିଲ୍ଲୀର ପ୍ରାଥମିକ ସୱାସ୍ଥ୍ୟସେବା ବ୍ୟବସ୍ଥାର ଏକ ଗୁରୁତ୍ୱପୂର୍ଣ୍ଣ ଶୃଙ୍ଖଳ। ସେମାନେ ସୱାସ୍ଥ୍ୟ ସମ୍ପର୍କିତ ସୂଚନା ପ୍ରଦାନ ପାଇଁ ଘରକୁ ଘର ବୁଲନ୍ତି, ପରିବାରଗୁଡ଼ିକୁ ଟିକାକରଣ ପାଇଁ ଉତ୍ସାହିତ କରନ୍ତି ଏବଂ ଗର୍ଭବତୀ ମହିଳା ତଥା ନୂତନ ମାଆମାନଙ୍କ ଯତ୍ନ ସହିତ ଜଡ଼ିତ ସେବାରେ ସହାୟତା କରନ୍ତି। ଆଶା କର୍ମୀମାନେ ସୱାସ୍ଥ୍ୟ ଓ ପୋଷଣ ଦିବସ, ସୱାସ୍ଥ୍ୟ ସଚେତନତା କାର୍ଯ୍ୟକ୍ରମ, ସର୍ୱେକ୍ଷଣ ଏବଂ ଗୋଷ୍ଠୀଗତ ବୈଠକରେ ମଧ୍ୟ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରନ୍ତି। କୋଭିଡ-୧୯ ମହାମାରୀ ସମୟରେ ମଧ୍ୟ ଆଶା କର୍ମୀମାନେ ଗୁରୁତ୍ୱପୂର୍ଣ୍ଣ ସୱାସ୍ଥ୍ୟସେବା ଯୋଗାଇ ଦେଇଥିଲେ।
ଦିଲ୍ଲୀରେ ବର୍ତ୍ତମାନ ୬,୭୨୫ ଜଣ ଆଶା କର୍ମୀ କାର୍ଯ୍ୟ କରୁଛନ୍ତି। ସାଧାରଣତଃ ପ୍ରତ୍ୟେକ ଆଶା କର୍ମୀ ପ୍ରାୟ ୨,୦୦୦ ଲୋକ କିମ୍ୱା ୪୦୦ଟି ପରିବାର ସହିତ ଜଡ଼ିତ ରହିଥାନ୍ତି।
ମୁଖ୍ୟମନ୍ତ୍ରୀ କହିଛନ୍ତି ଯେ ଦିଲ୍ଲୀ ସରକାରଙ୍କ ନିକଟରେ ଆଶା କର୍ମୀଙ୍କ ପାରିଶ୍ରମିକ ବୃଦ୍ଧି କରିବା ପାଇଁ କ୍ରମାଗତ ଭାବେ ଦାବି ହୋଇଆସୁଥିଲା। ଏହା ସରକାରଙ୍କ ପ୍ରାଥମିକତା ତାଲିକାରେ ଅନ୍ତର୍ଭୁକ୍ତ ଥିଲା ଏବଂ ଏବେ ଏହା ଉପରେ ନିଷ୍ପତ୍ତି ନିଆଯାଇଛି। ମୁଖ୍ୟମନ୍ତ୍ରୀ କହିଛନ୍ତି ଯେ ମାସିକ ପ୍ରୋତ୍ସାହନ ଭତ୍ତା ବୃଦ୍ଧି ଆଶା କର୍ମୀଙ୍କ ଅବଦାନକୁ ସୱୀକୃତି ଦେବା ଏବଂ ସେମାନଙ୍କର ଆର୍ଥିକ ସୁରକ୍ଷା ନିଶ୍ଚିତ କରିବା ଦିଗରେ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ। ଏହାଦ୍ୱାରା ସେମାନଙ୍କ କାର୍ଯ୍ୟ ପ୍ରତି ଉତ୍ସାହ ବୃଦ୍ଧି ପାଇବ ଏବଂ ସେମାନଙ୍କୁ ନିଜ ସେବା ଜାରି ରଖିବାରେ ସହାୟତା ମିଳିବ। ଏଥିସହ, ଏହା ପ୍ରାଥମିକ ସୱାସ୍ଥ୍ୟସେବାକୁ ସୁଦୃଢ଼ କରିବା ଏବଂ ମହିଳାମାନଙ୍କ ଆର୍ଥିକ ସଶକ୍ତୀକରଣକୁ ପ୍ରୋତ୍ସାହିତ କରିବାରେ ମଧ୍ୟ ସାହାଯ୍ୟ କରିବ।
