ଦୋହା, ୧୪।୧୨: ଦୁଇଥର ଚାମ୍ପିୟନ ଆର୍ଜେଣ୍ଟିନା ଚଳିତ ଫିଫା ବିଶ୍ୱକପର ଫାଇନାଲରେ ପ୍ରବେଶ କରିଛି। ମଙ୍ଗଳବାର ଲୁସେଲ ଷ୍ଟାଡିୟମରେ ଅନୁଷ୍ଠିତ ପ୍ରଥମ ସେମିଫାଇନାଲରେ ଲିଓନେଲ ମେସିଙ୍କ ଦଳ ୩-୦ ଗୋଲରେ କ୍ରୋଏସିଆକୁ ପରାସ୍ତ କରିଛି। ଫଳରେ ଗତ ସଂସ୍କରଣର ରନରଅପ୍ କ୍ରୋଏସିଆର ଟାଇଟଲ ଜିତିବା ଆଶା ଏଥର ମଧ୍ୟ ଅଧୁରା ରହି ଯାଇଛି। ଆର୍ଜେଣ୍ଟିନା ପକ୍ଷରୁ ମେସି ପେନାଲ୍ଟିରୁ ଏକ ଗୋଲ ଦେଇଥିବାବେଳେ ଅନ୍ୟ ୨ଟି ଗୋଲ ଦେଇଥିଲେ ଯୁବ ଷ୍ଟ୍ରାଇକର ଜୁଲିଆନ ଆଲ୍ଭାରେଜ। ୨୦୧୪ ପରେ ଆର୍ଜେଣ୍ଟିନା ପ୍ରଥମଥରପାଇଁ ବିଶ୍ୱକପର ଫାଇନାଲରେ ପ୍ରବେଶ କରିଛି। ୧୯୭୮ ଓ ୧୯୮୬ରେ ଚାମ୍ପିୟନ ଆର୍ଜେଣ୍ଟିନା ୧୯୩୦, ୧୯୯୦ ଓ ୨୦୧୪ରେ ରନରଅପ୍ ହୋଇଥିଲା। ୨୦୧୮ରେ ଦଳ ରାଉଣ୍ଡ ଅଫ୍ ୧୬ରୁ ବିଦାୟ ନେଇଥିଲା। ଏଥର ଫାଇନାଲରେ ପ୍ରବେଶ କରି ଦଳ ତୃତୀୟ ଥରପାଇଁ ବିଶ୍ୱକପ ଜିତିବା ଆଶା ଉଜ୍ଜୀବିତ ରଖିଛି। ମେସି ମଧ୍ୟ କ୍ୟାରିୟର ସାୟାହ୍ନରେ ବିଶ୍ୱକପ ଟାଇଟଲ ଜିତିବାର ନିକଟତର ହୋଇଛନ୍ତି। ଅନ୍ୟପକ୍ଷରେ ଗତ ସଂସ୍କରଣ (୨୦୧୮)ରେ କ୍ରୋଏସିଆ ରନରଅପ୍ ହୋଇ ବିଶ୍ୱକପରେ ଶ୍ରେଷ୍ଠ ସଫଳତା ପାଇଥିଲା। ୧୯୯୮ରେ ଦଳ ତୃତୀୟ ସ୍ଥାନ ଅଧିକାର କରିଥିବାବେଳେ ୨୦୦୨, ୨୦୦୬ ଓ ୨୦୧୪ରେ ଗ୍ରୁପ୍ ପର୍ଯ୍ୟାୟରୁ ବିଦାୟ ନେଇଥିଲା। ବୁଧବାର ଫ୍ରାନ୍ସ ଓ ମରକ୍କୋ ମଧ୍ୟରେ ଦ୍ୱିତୀୟ ସେମିଫାଇନାଲ ଅନୁଷ୍ଠିତ ହେବ। ଏହାର ବିଜେତାକୁ ଆର୍ଜେଣ୍ଟିନା ଆସନ୍ତା ରବିବାର ଫାଇନାଲରେ ଭେଟିବ।
ମ୍ୟାଚର ୩୨ତମ ମିନିଟରେ ବକ୍ସ ଅଞ୍ଚଳ ମଧ୍ୟରେ ବଲ୍ ପାଇଁ ସଂଘର୍ଷ ସମୟରେ ଆର୍ଜେଣ୍ଟିନାର ଆଲ୍ଭାରେଜଙ୍କୁ ଟାଣି ତଳେ ପକାଇ ଦେଇଥିଲେ କ୍ରୋଏସିଆ ଗୋଲକିପର ଡୋମିନିକ୍ ଲିଭାକୋଭିକ୍। ଫଳରେ ରେଫରି ଲିଭାକୋଭିକ୍ଙ୍କୁ ୟେଲୋ କାର୍ଡ ଦେଖାଇଥିଲେ ଏବଂ ଆର୍ଜେଣ୍ଟିନାକୁ ବହୁ ଗୁରୁତ୍ୱପୂର୍ଣ୍ଣ ପେନାଲ୍ଟି ସୁଯୋଗ ଦେଇଥିଲେ। ଏଥିରେ ଉତ୍କ୍ଷିପ୍ତ ହୋଇ କ୍ରୋଏସିଆ ଖେଳାଳି ମାଟେଓ କୋଭାକିକ୍ ଅଣ ଖେଳୁଆଡ଼ ମନୋଭାବ ଦେଖାଇଥିଲେ। ଫଳରେ ରେଫରି ତାଙ୍କୁ ମଧ୍ୟ ୟେଲୋକାର୍ଡ ଦେଖାଇଥିଲେ। ୩୪ତମ ମିନିଟରେ ପେନାଲ୍ଟି ଶଟ୍ ମାରିଥିଲେ ଅଧିନାୟକ ଲିଓନେଲ ମେସି। ସେ ପ୍ରତିପକ୍ଷ ଗୋଲକିପରଙ୍କୁ ଚକ୍ମା ଦେଇ ରାଇଟ୍ କର୍ନରରେ ଗୋଲ ସ୍କୋର କରିବା ସହ ଆର୍ଜେଣ୍ଟିନାକୁ ୧-୦ରେ ଅଗ୍ରଣୀ କରାଇଥିଲେ। ଶୁଟ୍ଆଉଟକୁ ଛାଡ଼ିଦେଲେ ଏଥିସହ ସେ ୧୯୬୬ରେ ପର୍ତ୍ତୁଗାଲର ୟୁସେବିଓ ଏବଂ ୧୯୭୮ରେ ନେଦରଲାଣ୍ଡ୍ସର ରବ୍ ରେନସେନବ୍ରିଙ୍କ ସମକକ୍ଷ ମେସି ୨୦୨୨ ବିଶ୍ୱକପରେ ପେନାଲ୍ଟିରୁ ୪ଟି ଗୋଲ ଦେବାର ରେକର୍ଡ କଲେ। ଏହାଥିଲା ବିଶ୍ୱକପରେ ମେସିଙ୍କର ୧୧ତମ ଗୋଲ। ଯାହାକି କୌଣସି ଆର୍ଜେଣ୍ଟିନା ଖେଳାଳିଙ୍କ ପକ୍ଷରେ ସର୍ବାଧିକ। ମେସି ଗୋଲ ଦେବାର ୫ ମିନିଟ ପରେ ଅର୍ଥାତ୍ ୩୯ତମ ମିନିଟରେ ଜୁଲିଆନ ଆଲ୍ଭାରେଜ ଏକ ଗୋଲ ଦେଇ ଆର୍ଜେଣ୍ଟିନା ଅଗ୍ରଣୀ ବ୍ୟବଧାନକୁ ୨-୦ରେ ପହଞ୍ଚାଇ ଦେଇଥିଲେ। ମିଡ୍ଫିଲ୍ଡରୁ ମେସିଙ୍କଠାରୁ ବଲ୍ ପାଇ ଏହି ଯୁବ ଷ୍ଟ୍ରାଇକର କ୍ରୋଏସିଆର ରକ୍ଷଣଭାଗକୁ ଭେଦକରିବା ସହ ଗୋଲକିପରଙ୍କୁ ଚତୁରତାର ସହ ଅତିକ୍ରମ କରି ଗୋଲ ସ୍କୋର କରିବାରେ ସକ୍ଷମ ହୋଇଥିଲେ। ପ୍ରଥମାର୍ଦ୍ଧରେ କ୍ରୋଏସିଆ ୬୨ ପ୍ରତିଶତ ବଲ୍କୁ ନିୟନ୍ତ୍ରଣରେ ରଖିଥିଲେ ହେଁ ଗୋଟିଏ ହେଲେ ଶଟ୍ ଟାର୍ଗେଟ କରିପାରି ନ ଥିଲା। ଅନ୍ୟପକ୍ଷରେ ଆଲଭାରେଜଙ୍କର ଚଳିତ ବିଶ୍ୱକପରେ ଏହା ତୃତୀୟ ଗୋଲ ଥିଲା। ୨୨ କିମ୍ବା ତା’ଠାରୁ କମ୍ ବୟସର ଖେଳାଳିଭାବେ କେବଳ ଗୋଞ୍ଜାଲୋ ହିଗୁଏନ ୨୦୧୦ ବିଶ୍ୱକପରେ ୪ଟି ଗୋଲ ଦେବାରେ ସକ୍ଷମ ହୋଇଥିଲେ। ମ୍ୟାଚର ୬୯ତମ ମିନିଟରେ ଆର୍ଜେଣ୍ଟିନା ୩ୟ ଗୋଲଟି ସ୍କୋର କରିଥିଲା। ମେସି ଏକାକୀ କ୍ରୋଏସିଆ ଖେଳାଳିଙ୍କୁ ଅତିକ୍ରମ କରି ବଲ୍କୁ ଗୋଲପୋଷ୍ଟର ନିକଟରେ ପହଞ୍ଚାଇବାପରେ ଜୁଲିଆନ ଆଲଭାରେଜଙ୍କ ନିକଟକୁ ପାସ୍ ଦେଇଥିଲେ। ଆଲଭାରେଜ କୌଣସି ଭୁଲ ନ କରି ତତ୍କ୍ଷଣାତ ବଲ୍କୁ କ୍ରୋଏସିଆ ଗୋଲପୋଷ୍ଟକୁ ବଲ୍ ପଠାଇ ଦେଇଥିଲେ। ଏହାକୁ ମିଶାଇ ମେସି ୧୯୬୬ପରେ ପ୍ରଥମ ଖେଳାଳିଭାବେ ଗୋଟିଏ ବିଶ୍ୱକପର ୩ଟି ଭିନ୍ନ ମ୍ୟାଚରେ ଗୋଲ ଦେବାସହ ଗୋଲ ଦେବାରେ ସହାୟକ ମଧ୍ୟ ହେଲେ।
ଲିଓନେଲ ମେସି ଏଠାରେ କ୍ୟାରିୟରର ୨୫ତମ ବିଶ୍ୱକପ ମ୍ୟାଚ ଖେଳିଥିଲେ। ଏ କ୍ଷେତ୍ରରେ ସେ ବିଶ୍ୱକପରେ ସର୍ବାଧିକ ମ୍ୟାଚ ଖେଳିବାରେ ଜର୍ମାନୀର ଲୋଥାର ମାଥ୍ୟୁସଙ୍କ ରେକର୍ଡର ସମକକ୍ଷ ହୋଇଥିଲେ। ଆର୍ଜେଣ୍ଟିନା ପକ୍ଷରୁ ୫୦ତମ ମ୍ୟାଚ ଖେଳିଥିଲେ ରୋଡ୍ରିଗୋ ଡି ପଲ୍ ଓ ଲିଆଣ୍ଡ୍ରୋ ପରେଡେସ। କୋଚ୍ ଜ୍ଲାଟ୍କୋ କ୍ରୋଏସିଆକୁ ୪-୩-୩ ଓ ଲିଓନେଲ ସ୍କାଲୋନି ଆର୍ଜେଣ୍ଟିନାକୁ ୪-୪-୨ ଲାଇନ୍ଅପ୍ରେ ଖେଳାଇଥିଲେ।
